Read Mizo Lushai CHANCHIN ṬHA LUKA ZIAK 24 Bible Online

CHANCHIN ṬHA LUKA ZIAK 24 - Mizo Lushai bible

CHANCHIN ṬHA LUKA ZIAK 24

¹Thupêk angin sabat ni chuan an châwl a, Pathianni chuan vârṭianah rimtui an siamte chu kengin thlânah chuan an va kal a.

²Thlân kawngka ata lung chu lum sawnin an hmu a,

³an han luh chuan Lalpa Isua ruang rêng an hmu ta lo va.

⁴Chutia hrilhhai taka an awm lai chuan, mi pahnih puan vâr taka inthuam an kiangah an lo ding a.

⁵An hlau va, lei bihin an kun tlat a. Chu mite chuan an hnênah, “Engati nge mitthi zîngah mi nung in zawn?

⁶Hetah a awm tawh lo, kaihthawh a ni ta. Galili rama a awm laia in hnêna a sawi kha hre reng rawh u;

⁷‘Mihring Fapa hi mi sualte kuta mantîr a ni ang a, krawsah an khêngbet ang a, ni thum ni-ah a tho leh tûr a ni,’ a tih ṭhin kha?” an ti a.

⁸A thu sawi kha an hre chhuak leh ta a.

⁹Thlân ata chu an hâwng a, Sâwmpakhatte leh mi dangte chu chûng thu chu an hrilh a.

¹⁰Chûng thu tirhkohte rawn hrilhtute chu Magdala mi Mari te, Joani te, Jakoba nu Mari te leh an zînga kal ve hmeichhe ṭhenkhatte an ni.

¹¹Nimahsela, chûng thu chu thu tak takah an lo ngaihsak lo va, an awihsak hek lo.

¹²Petera erawh chu a tho va, thlânah chuan a va tlân a, kûna a han bih chuan puan zai sîn awmte chauh chu a hmu a; tichuan, thil awm dân chu mak ti tak chungin in lamah a haw leh ta a.

¹³Ngai teh, chumi ni tak chuan an zînga pahnih chu khaw pakhat Emmau an tihah chuan kal tûrin an chhuak a. Chu khua chu Jerusalem aṭanga km. sâwm leh pakhat vêla hla a ni.

¹⁴Thil lo thleng zawng zawng chu an sawi dûn a.

¹⁵Chutia an titia thu an sawi dun lai chuan amah Isua ngei chuan a rawn hnaih a, an kal tlâng ta a;

¹⁶nimahsela, a hmêl an hriat theih loh nân an mit chu tihvaih a ni a.

¹⁷An hnênah chuan, “Kal paha in sawi kha eng thu nge?” a ti a. Ngui takin an ding ta a.

¹⁸A hming Kleopa zâwk chuan a chhâng a, “Nangmah chauh hi i ni âwm e, Jerusalem tlawh si tûnlai chanchin hre lo chu!” a ti a.

¹⁹Ani chuan, “Eng chanchin maw?” a ti a. Anni chuan, “E le, Nazaret Isua chanchin hi; Pathian leh mi zawng zawng mit hmuha thu-ah leh thil tiha zâwlnei thiltithei tak chanchin kha.

²⁰Ani chu kan puithiam lalte leh kan rorêltuten tihhlum tûrin an pêka, krawsah an khenbeh tâk thu kha.

²¹Keini lahin Israel-te tlantu tûra kha a nih kan lo beisei vei nên. Chu mai pawh a ni lo, vawiin hi a ni thumna a ni a;

²²kan pâwla hmeichhe ṭhenkhat pawh tûkin zîngah khân thlânah an va kal a, a ruang an va hmu si lo;

²³‘Vântîrhkoh inlâr kan hmu a, chu mite chuan, ‘a nung leh ta an ti,’ te an rawn ti a, min timangang nasa mai a.

²⁴Kan awmpui zînga ṭhenkhat pawh thlânah an va kal ve a, hmeichheho sawi ang chiah khân thil an va hmu a; mahse, amah chu an hmu bîk si lo,” an ti a.

²⁵Ani chuan an hnênah, “Mi â te u, zâwlneite thu sawi tinrêng awih kawnga ngawngte u!

²⁶Kristan chûng thil chu tuarin a ropuinaah a lût tûr a ni rêng lâwm ni?” a ti a.

²⁷Tichuan, Mosia aṭanga ṭanin zâwlnei zawng zawng thu chhuiin, Lehkha Thua a chanchin ziakna apiang anmahni a hrilh fiah a.

²⁸An kalna tûr khua chu an thleng dâwn ta a; ani erawh chu kal zêl tûr ni âwm takin a lang a.

²⁹Kâin an chelh a, “Kan hnênah riak ve mai rawh, khua a tlai ta a, ni pawh a tlâk dâwn tawh hi,” an ti a. Tichuan, an hnêna riak tûrin a lût ta a.

³⁰Zanriah an han kîl ho va, chhang a la a, malsâwmna a sawi a, a phel a, an hnênah a pe a.

³¹An mit chu a lo vâr a, a hmêl an hre ta a; ani erawh chu a ral ta mai a.

³²Anni chuan, “Kalkawnga min biak laia Lehkha Thute min hrilh fiah lai khân kan thinlung a harh huai rêng lâwm ni kha?” an inti a.

³³Tichuan, an tho va, Jerusalem-ah an kîr leh ta nghâl a. Sâwmpakhatte leh an ṭhiante awm khâwm chu an han hmu a.

³⁴“Lalpa chu a lo tho leh ngei alâwm, Simona hnênah pawh a inlâr asin,” an lo ti a.

³⁵Anni pawh chuan kalkawnga thil lo thleng leh chhang a phela, amah an lo hriat tâk dânte chu an sawi a.

³⁶Chûng thu chu an sawi laiin Isua ngei chu an zîngah a lo ding a, an hnênah, “In chungah thlamuanna awm rawh se,” a ti a.

³⁷Râpthlâk an ti a, an hlau ta êm êm a, thlarau hmuah an inruat a.

³⁸Ani chuan, “Engati nge chuti êm êma in hlauh? Engtizia nge in inngaihtuah buai tâk?

³⁹Ka kut te, ka kephah te hi en ta che u, keimah ngei kha ka ni alâwm. Mi dek ula, en rawh u; kei mi hmuh ang hian thlarauvin tisa leh ruh a nei hlei nêm,” a ti a.

⁴⁰A sawi zawhin a kut te, a kephah te a entîr a,

⁴¹an lâwm lutuk chuan an la awih ta lo cheu va; mak an tih êm avângin an hnênah, “hetah englo ei tûr in nei êm?” a ti a.

⁴²Sangha hem hmin hrang khat an pe a.

⁴³A la a, an hmaah chuan a ei ta a.

⁴⁴An hnênah chuan, “In zînga ka awm lai khân hêng thu hi ka hrilh ṭhin che u kha, Mosia Dânah te, zâwlnei Lehkhabu-ah te, Fakna Hla bu-ah te ka chanchin an ziak apiang chu a thleng tûr a ni, tiin,” a ti a.

⁴⁵Tichuan, Lehkha Thu hrethiam thei tûrin an rilru a hawnsak ta a.

⁴⁶An hnênah, “Krista chuan a tuar ngei tûr a ni, ni thum ni-ah mitthi zîng ata a tho leh bawk tûr a ni;

⁴⁷‘simna leh sual ngaihdamna thu chu Jerusalem-a ṭanin hnam tin hnênah ama hminga hril tûr a ni tih ziak a nih kha.

⁴⁸Hêng thil hi a hretute in ni e.

⁴⁹Ngai teh u, Pa thil tiam chu in chungah ka rawn tîr dâwn e.

⁵⁰Chung lam aṭanga thiltihtheihnaa thuam in nih hma loh chuan khawpuiah hian awm reng ang che u,” a ti a.

⁵¹Tin, Bethani dai kiang thlengin a hruai chhuak a, a bân a phar a, anni chu mal a sâwm a.

⁵²Chutia mal a sâwm lai chuan anni chu a ṭhen a, vâna hruai chhoh a ni ta a.

⁵³Chibai an bûk a, hlim takin Jerusalem-ah an kîr leh ta a; tin, Tempulah chuan Pathian fakin an kal fo ṭhîn a.