Read Mizo Lushai CHANCHIN ṬHA LUKA ZIAK 3 Bible Online

CHANCHIN ṬHA LUKA ZIAK 3 - Mizo Lushai bible

CHANCHIN ṬHA LUKA ZIAK 3

¹Tiberia Kaisara a lal kum sâwm leh panga kum chuan, Pontia Pilata chu Judai ram awptu a ni a, Heroda chu Galili ram lal a ni. A unau Filipa chu Ituria leh Trakonitis ram lal a ni a, Lusania chu Abilene ram lal a ni;

²Anna leh Kaiafa chu Puithiam lalber an ni a; thlalêrah, Zakaria fapa Johana hnênah, Pathian thu a lo thleng a.

³Jordan lui ruam ram a fang vêl a, sual ngaihdam nân sima baptisma chan tûr thu a hril zêl a;

⁴zâwlnei Isaia lehkhabua, “Thlalêra mi au aw chuan Lalpa lamlian chei ula, A kal nân kawng tluang siam rawh u.

⁵Kawr tin chhûn khah vek a ni ang a, Tlâng tin mual tin râwt hniam a ni ang. A kawite chu a lo ngîl ang a, A bumbohte chu a lo rual bawk ang.

⁶Pathian chhandamna chu mi tinin an hmu ang,” tih ziak ang khân.

⁷Tichuan, mipui lo kalte hnênah chuan, “Rûl thlahte u, thinur lo thleng tûr pumpelh nân tu nge baptisma chang tûra fuih che u?

⁸In sim ngei a ni tih tilang tûrin thil ti zâwk rawh u. ‘Kan pa chu Abrahama asin,’ in lo ti rilru mai dah ang e; ka hrilh a che u, Pathian chuan hêng lung hi Abrahama thlahah a din thei asin.

⁹Tûn apangin hreipui chu thing bul tinah an dah ta; thing eng pawh rah ṭhaa rah lo chu kiha meia tuah mai tûr a ni,” a lo ti a.

¹⁰Mipui chuan, “Chuti chu eng nge kan tih tûr le?” tiin an zâwt a.

¹¹Ani chuan, “Tu pawh, kawr pahnih nei chuan a nei ve lo pe rawh se; chutiang bawkin ei nei chuan a nei ve lo pe rawh se,” a ti a.

¹²Chhiahkhawntute pawh baptisma chang tûrin an lo kal a, “Zirtîrtu, eng nge kan tih tûr?” an ti a.

¹³Ani chuan “Chhiah bi tûr aia tam phût suh u,” a ti a.

¹⁴Sipaite pawh chuan, “Anih, keini hi, eng nge kan tih ve tûr?” an ti a. Ani chuan “Tihluihnain emaw, dâwtin emaw tu ma thil lâksak suh ula, in hlawhah lungawi rawh u,” a ti a.

¹⁵Mite beisei chu a sâng hle a, Johana chu ‘Krista a ni mai âwm e,’ tia an ngaihtuah rilrûk lai chuan,

¹⁶Johana chuan an za-in a hrilh a, “Kei zawngin tuiin ka baptis che u a; nimahsela, kei aia ropui zâwk a lo kal dâwn a, kei hi chu a pheikhawk hrui phelh tlâk pawh ka ni lo. Ani zawngin Thlarau Thianghlim leh meiin a baptis ang che u.

¹⁷A hruiha buh zâp faia zêma khung mai tûrin a sisêp chu a keng tawh a, a site erawh chu tihmih rual loh meiah a hâl ral ang,” a ti a.

¹⁸Chutiang chuan fuihna thu dang tam tak nên mite hnênah Chanchin Ṭha chu a hril ṭhîn a.

¹⁹Lal Heroda pawh kha, a nau nupui Herodi nêna an chungchâng thu-ah leh thil sual dang a tih zawng zawng chungthu-ah a zilhhau va.

²⁰Heroda chuan ama thil sual tih tâk zawng zawng belhchhahin Johana chu tân inah a khung a.

²¹Tin, mi zawng zawngin baptisma an chang a. Isua pawhin a chang ve a, a ṭawngṭai laiin vân a lo inhawng a,

²²Thlarau Thianghlim chu taksa neiin ṭhuro angin a chungah a lo chhuk a, “Nang, ka Fapa, ka Duhtaka chu i ni, i chungah ka lâwm êm êm e,” a rawn ti a.

²³Rawng a bâwl ṭan chuan Isua chu kum sawmthum laia upa a ni tawh a, mi ngaih chuan Josefa fapa a ni. Chu mi chu Helia fa a ni a,

²⁴ani chu Matthata fa a ni; ani chu Levia fa a ni; ani chu Melkia fa a ni; ani chu Jannaia fa a ni; ani chu Josefa fa a ni;

²⁵ani chu Mattathia fa a ni; ani chu Amosa fa a ni; ani chu Nahuma fa a ni; ani chu Eslia fa a ni; ani chu Naggaia fa a ni;

²⁶ani chu Maatha fa a ni; ani chu Mattathia fa a ni; ani chu Semeia fa a ni; ani chu Joseka fa a ni; ani chu Joda fa a ni;

²⁷ani chu Joana fa a ni; ani chu Resa fa a ni; ani chu Zerubabela fa a ni; ani chu Salathiela fa a ni; ani chu Neria fa a ni;

²⁸ani chu Melkia fa a ni; ani chu Addia fa a ni; ani chu Kosama fa a ni; ani chu Elmadama fa a ni; ani chu Era fa a ni;

²⁹ani chu Isua fa a ni; ani chu Eliezara fa a ni; ani chu Jorima fa a ni; ani chu Matthata fa a ni; ani chu Levia fa a ni;

³⁰ani chu Simeona fa a ni; ani chu Juda fa a ni; ani chu Josefa fa a ni; ani chu Jonama fa a ni; ani chu Eliakima fa a ni;

³¹ani chu Melea fa a ni; ani chu Menna fa a ni; ani chu Mattatha fa a ni; ani chu Nathana fa a ni; ani chu Davida fa a ni;

³²ani chu Jesaia fa a ni; ani chu Obeda fa a ni; ani chu Boaza fa a ni; ani chu Sala fa a ni; ani chu Nasona fa a ni;

³³ani chu Aminadaba fa a ni; ani chu Admina fa a ni; ani chu Arnia fa a ni; ani chu Esroma fa a ni; ani chu Faresa fa a ni; ani chu Juda fa a ni;

³⁴ani chu Jakoba fa a ni; ani chu Isaka fa a ni; ani chu Abrahama fa a ni; ani chu Tera fa a ni; ani chu Nahora fa a ni;

³⁵ani chu Seruga fa a ni; ani chu Hragaia fa a ni; ani chu Falega fa a ni; ani chu Ebera fa a ni; ani chu Sala fa a ni;

³⁶ani chu Kainana fa a ni; ani chu Arfaksada fa a ni; ani chu Sema fa a ni; ani chu Nova fa a ni; ani chu Lameka fa a ni;

³⁷ani chu Methusela fa a ni; ani chu Enoka fa a ni; ani chu Jareda fa a ni; ani chu Mahalaleela fa a ni; ani chu Kainana fa a ni;

³⁸ani chu Enosa fa a ni; ani chu Setha fa a ni; ani chu Adama fa a ni; ani chu Pathian fa a ni.