Read Mizo Lushai CHANCHIN ṬHA LUKA ZIAK 5 Bible Online

CHANCHIN ṬHA LUKA ZIAK 5 - Mizo Lushai bible

CHANCHIN ṬHA LUKA ZIAK 5

¹Ni khat chu Pathian thu ngaithla tûra mipuiin an bâwr huai huai lai chuan Genesaret dîl kamah a ding a;

²dîl kama lawng pahnih awm chu a hmu a, sangha mantute chu an chhuak a, an lênte an sûksan a ni.

³Lawng pakhat, Simona ta zâwkah chuan a chuang a; a hnênah vaukam ata dîla tlêma tawlh luh deuh a dîl a. Lawnga ṭhu chung chuan mipui chu a zirtîr ta a.

⁴A thu sawi zawhah chuan, Simona hnênah, “Li thûk lam pan la sangha man tûrin in lênte dêng rawh u,” a ti a.

⁵Simona chuan, “Hotupa, tlaivâr zakin kan dêng tawh a, eng mah kan man lo asin; nimahsela, i thuin lênte chu ka han dêng ang e,” tiin a chhâng a.

⁶A han den chuan sangha an khuh ta ṭeuh mai a, an lênte pawh chu a ṭet dâwn ta mai a.

⁷Tichuan, lawng danga an pâwlpui awmte chu anmahni pui tûrin an hui a. Anni chu an lo kal a, lawng pahnih chu pil lek lek khawpin an chhûng khat ve ve a.

⁸Chu chu Simon Petera chuan a hmuhin Isua ke bulah chuan a kûn a, “Lalpa, min kalsan rawh, mi sual ka nih hi,” a ti a;

⁹an sangha man chu ani leh a ṭhiante chuan mak an ti êm a ni.

¹⁰Simona pâwla mi, Zebedaia fapa Jakoba leh Johana te pawh chuan mak an ti êm êm a. Isuan Simona hnênah, “Hlau suh, tûna chinah zawng mihring i man tawh ang,” a ti a.

¹¹An lawngte chu vaukamah an kar kai a, engkim kalsanin amah chu an zui ta a.

¹²Vawi khat chu khaw pakhata a awm laiin pa pakhat, a taksa puma phâr hian Isua chu a hmu a, bawkkhupin tihdam a dîl a, “Lalpa, i duh chuan mi tithianghlim thei e,” a ti a.

¹³Ani chuan a han ban a, a dek a, “Ka duh e, lo thianghlim tawh ang che,” a ti a. A phâr chu a lo dam ta nghâl a.

¹⁴A hnênah chuan, “Tu mah hrilh suh; amaherawhchu, puithiam va inentîr la, i dam ngei tih miten an hriat theih nân Mosia thupêk angin i inthen nân thil hlân rawh,” a ti a.

¹⁵Nimahsela, a chanchin chu a thang zual ta sauh va; mipui tam tak a thu hriat duh leh an nâte tihdamsak duhin an lo kal khâwm tup tup a.

¹⁶Ani erawh chu fianrialah a ṭawngṭai ṭhîn.

¹⁷Chûng lai chuan ni khat chu mite a zirtîr a. An zîngah chuan Galili leh Judai ram khaw tin aṭang leh Jerusalem aṭangtea lo kal khâwm Farisai-te leh Dân zirtîrtute chu an awm ve a; tin, mi tihdam nân Lalpa thiltihtheihnain amahah chuan a thawk a.

¹⁸Chutih lai chuan tlangvâlhovin zeng pakhat, a mutna chawpin an rawn zâwn a; zâwn luha a hmaa dah an tum a ni;

¹⁹nimahsela, mipui avâng chuan zâwn luh ngaihna a awm lo va; in chungah an lâwn a, in chung chu an phawk a, chuta ṭang chuan a mutna nên a laia Isua hma takah chuan hruiin an thlâk thla a.

²⁰An rinzia chu a hmuhin a hnênah, “Ṭhiana, i sualte ngaihdam a ni ta e,” a ti a.

²¹Dân zirtîrtute leh Farisai-te chuan, “Pathian pawisawi hi tu nge maw a nih le? Pathian chauh lo chuan tu nge sual ngaidam thei?” an inti hlawm a.

²²Tichuan, Isuan an thu sawi chu a hriatin an hnênah, “Engati nge rilrua chutianga in ngaihtuah?

²³‘I sualte ngaihdam a ni ta,’ tih nge awl a, ‘Tho la, kêin kal tawh rawh,’ tih hi?

²⁴Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh ka ti a che,” a ti a.

²⁵An mit hmuhah chuan a tho ta mai a, a mutna chu a la a, Pathian fak chung zêlin a in lamah a haw ta a.

²⁶An za chuan mak an ti êm êm a, Pathian an fak a, “Vawiin chu thil mak dang lam tak kan hmu alâwm,” an ti a, an hlau hle a.

²⁷Chumi zawh chuan a chhuak a, chhiah khawnna hmuna ṭhu, chhiahkhawntu pakhat, a hming Levia chu Isuan a hmu a, “Mi zui rawh,” a ti a.

²⁸Ani chu a tho va, engkim kalsanin a zui ta a.

²⁹Tin, Levia chuan a inah ruai ropui tak a ṭhehsak a; tichuan, chhiahkhawntute leh mi dang tam takin chawhlui chu an rawn kîlpui hlawm a.

³⁰Farisai-te chu Dân zirtîrtute nên chuan a zirtîrte chungah an lo phunnawi a, “Engah nge chhiahkhawntute leh mi sualte nêna in eia in inho le?” an ti a.

³¹Isua chuan a chhang a, “Mi hrisêlten daktor an ngai lo va, mi bawrhsâwmten an ngai zâwk a ni.

³²Mi felte lam tûr ni lovin, an sim theih nân mi sualte lam tûra lo kal ka ni zâwk,” a ti a.

³³Anni chuan a hnênah, “Johana zirtîrten chaw nghei an chîng hle a, an ṭawngṭai chhên bawk a; chutiang bawkin Farisai zirtîrte pawhin an chîng a, i hote lah hian an eiin an in zêl mai si,” an ti a.

³⁴Isuan an hnênah, “An zînga moneitu a awm chhûng chuan mo hruaitute chu chaw in ngheitîr ngai em ni?

³⁵Moneitu chu an hnên ata hruai bo hun a lo la awm ang; chûng hunah erawh chuan an la nghei ve ang chu,” a ti a.

³⁶An hnênah chuan tehkhin thu pawh a sawi a, “Tu man puan thar pawt thlain puan hluiah an bel ngai lo, bel teh rêng pawh ni se, a thar chu an tithlêr chhe mai mai a, a thar them lahin a hlui chu a rem bawk hek lo vang.

³⁷Uain thar pawh tu man savun ip hluiah an thun ngai hek lo, thun se, uain thar chuan savun ip chu a tâwn keh ang a, a baw ral ang a, savun ip pawh chu a chhia ang.

³⁸Uain thar chu savun ip tharahte thun zâwk tûr a ni.

³⁹Tin, an in ṭhan uain an in hnuin a thar an duh ngai lo, ‘a hlui nge nge a ni tui,’ an ti ṭhîn,” a ti a.