Read Mizo Lushai CHANCHIN ṬHA LUKA ZIAK 6 Bible Online

CHANCHIN ṬHA LUKA ZIAK 6 - Mizo Lushai bible

CHANCHIN ṬHA LUKA ZIAK 6

¹Sabat vawi khat pawh buhpui hmunahte a kal tlang a; a zirtîrte chuan a vui an thliak a, an kutin an nuai fai a, an bâr a.

²Farisai tute emaw chuan, “Engati nge Sabat nia tih thiang lo chu in tih ni?” an ti a.

³Isuan anni chu a chhâng a, “A ṭhiante nên an rilṭâm laia Davida thil tih kha in chhiar lâwm ni?

⁴Pathian inah a lût a, puithiamte chauh ei thian chhangdah chu a la a, a ei a, a ṭhiante pawh a pêk ve thu kha?” a ti a.

⁵An hnênah, “Mihring Fapa hi Sabat ni Lalpa a ni,” a ti bawk a.

⁶Sabat ni dang lehah chuan sunagog-ah a lût a, a zirtîr a. Chutah chuan mi pakhat kut ding lam zeng a awm ve a.

⁷Dân zirtîrtute leh Farisai-te chuan a hêkna tûr an hmuh theih nân Sabat nia a tihdam dâwn leh dâwn loh an lo châng a.

⁸An rilru chu a hriatin kut zeng hnênah chuan, “Tho la, a laiah hian ding chhuak teh,” a ti a. Ani chu a tho va, a laiah chuan a ding chhuak a.

⁹Isuan an hnênah, “Sabat niah tihṭhat nge thiang tihchhiat, mi chhandam nge thiang tihhlum - ka zâwt a che u,” a ti a.

¹⁰Tin, an za chuan a han en vêl a, zeng hnênah chuan, “I kut phar rawh,” a ti a. A han phar a, a kut chu a lo dam ta a.

¹¹Anniho chu thin tâwtin an puakkeh lek lek a, Isua chu engtia tih tûr nge tih an inrâwn ta a.

¹²Chutih lai vêl chuan zan khat chu tlângah ṭawngṭai tûrin a kal a. Pathian hnênah a ṭawngṭai zânkhua a.

¹³Khua a lo vâr chuan a zirtîrte chu a ko va, an zîng ata sâwm leh pahnih a thlang a, an hmingah tirhkoh a vuah a;

¹⁴Simona, Petera a vuah te, a unau Andria te, Jakoba leh Johana te, Filipa leh Bartholomaia te,

¹⁵Mathaia leh Thoma te, Alfaia fapa Jakoba te, Simona, Zealota an vuah te,

¹⁶Jakoba fapa Juda te, a mantîrtu ni ta Juda Iskariota teho chu an ni.

¹⁷An rual chuan a chhuk a, phaizâwlah a ding a. Chutah chuan a zirtîrte tam tak leh Judai ram zawng zawng ata te, Jerusalem ata te, Tura leh Sidon vêl tuifinriat kam ata te mipui nasa tak, a thu ngaihthlâk duh leh an nâte tihdam beiseia lo kalte chu an awm a;

¹⁸thlarau bawlhhlawh sawisakte pawh an lo dam ta a.

¹⁹Mipui zawng zawng chuan amah deh an tum a, a hnên ata thiltihtheihna a chhuak a, mi tin a tidam zêl si a.

²⁰Tin, a hawi vêl a, a zirtîrte chu a en a: Pachhiate u, in chan a ṭha e, Pathian ram in ta a ni si a.

²¹Tûna rilṭâmte u, in chan a ṭha e, in la tlai dâwn si a, Tûna ṭapte u, in chan a ṭha e, in la nui dâwn si a.

²²“Mihring Fapa avânga miten an huat che u a, an ensan che u a, an hau che ua, hmingchhe taka an hnâwl hunah che u chuan in chan a va ṭha dâwn êm.

²³Chumi hunah chuan lâwm ula, hlimin zuang ang che u, ngai teh u, vânah in lâwmman a awm hnêm si a; in chunga an tih ang bawkin an thlahtute pawhin zâwlneite chungah an tih ṭhin kha.

²⁴“Nangni hausate u, in chung a pik e, nuam in chên zo dêr tawh si a;

²⁵“Tûna tlai puarte u, in chung a pik e, in ril a la ṭâm dâwn si a; Tûna nuite u, in chung a pik e, lusûna lungngaiin in la ṭap dâwn si a.

²⁶“Mi zawng zawngin an fak hle che u chuan in va khawngaihthlâk dâwn êm; chutiang bawkin an thlahtuten zâwlnei derte an fak ṭhîn.

²⁷“Ka thu ngaithlatute u, nangni zawng ka ti a che u, in hmêlmate chu hmangaih ula, a hawtu che u chungah chuan ṭhat chhuah ula,

²⁸ânchhe lawhtu che u chu malsâwmna dîlsak ula, a tiduhdahtu che u chu ṭawngṭaisak rawh u.

²⁹“I biang lehlam bêngtu hnênah a lehlam pawh dawh rawh. I puan lâksaktu che chuan i kawr a lâk pawh hnial suh.

³⁰A dîltu apiang che chu pe la, i sum lâksaktu che chu dîl leh tawh suh.

³¹In chungah miin ti se in tih ang ngeiin mi chungah pawh ti ve rawh u.

³²“Nangmahni hmangaihtu chauh in hmangaihin eng nge mi sualte aia in danglam bîkna? Anni pawhin anmahni hmangaihtute chu an hmangaih ṭhîn asin.

³³In chunga ṭhate lakah chauh ṭhat in chhuah hian eng nge mi sualte aia in danglam bîkna? Anni pawhin chutiang bawkin an ti ṭhîn asin.

³⁴Hmuh kîr leh beisei theihna hnên chauhva thil in pûktîr hian eng nge mi sualte aia in danglam bîkna? Anni pawhin a ngai hmu kîr leh tûr chuan mi sualte hnênah an pûktîr ṭhîn asin.

³⁵In hmêlmate chu hmangaih zâwk rawh u, an chungah thil ṭha ti ula, hmuh kîr leh beisei kher lovin pûktîr rawh u; tichuan, lâwmman tam tak in hmu ang a, Chungnungbera fate in ni dâwn nia; Ani zawngin lâwm nachâng hre lote leh mi sualte pawh a khawngaih vek a ni.

³⁶In Pain mi a khawngaih ṭhîn ang bawkin nangni pawhin mi khawngaih ṭhîn rawh u.

³⁷“Mi sawisêl suh u; tichuan, sawisêl in ni lo vang; tu mah thiamlovah ruat mai hek suh u; tichuan, thiam loh in ni lo vang; ngaidam rawh u; tichuan, ngaihdam in ni ang.

³⁸Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” a ti a.

³⁹Tin, an hnênah tehkhin thu a sawi a, “Mitdelin mitdel vêk a hruai thei dâwn êm ni? Khuarkhurumah an tla dûn mai lâwng maw?

⁴⁰Zirlai chu an zirtîrtu chungah an awm lo, an zir zawhah erawh chuan an zirtîrtu an tluk tawh ang.

⁴¹“Engtizia nge mahni mita thingtum awm chu hre si lovin i unau mita thil tê tak tê awm chu i hmuh ni? Mahni mita thingtum awm chu ngaimawh si lovin,

⁴²i unau hnênah, ‘Unau, i mita thil tê tak tê kha mi lâk chhuahtîr rawh,’ engtin nge i tih theih le? Mi vervêk, i mita thingtum awm kha la chhuak hmasa zet rawh; chutichuan, i unau mit ata thil tê tak tê lâk chhuah tûr awm chu fiah takin i hmu thei ang.

⁴³“Thing ṭha a rah chhe ngai lo, thing chhia lah a rah ṭha ngai hek lo. Thing chu a rah aṭangin eng ang nge a nih a hriat a ni.

⁴⁴Tu man hlîng bukah theipui an lo ngai lo, hnimhlîngnei kûngah pawh grep rah an lo ngai bawk hek lo.

⁴⁵Mi ṭha chuan a thinlung robâwm ṭha ata thil ṭhate a phawrh chhuak ṭhîn, mi sual erawh chuan a thinlung robâwm ṭha lo ata thil ṭha lote a phawrh chhuak ṭhîn; thinlunga liam khawpa khat hi a ni kâin in sawi chhuah ṭhin.

⁴⁶“‘Lalpa, Lalpa’ mi ti siin engati nge ka thu in zawm loh?

⁴⁷Tu pawh ka hnêna lo kala, ka thu hriaa, zâwmtu chu tu ang nge a nih ka hrilh ang che u.

⁴⁸In satu, thûk taka lei laia, lungpui chunga lungphûm remtu ang chu a ni: in chu tuilianin rawn hrût mah se, a tinghîng thei lo, a sak ngun êm avângin.

⁴⁹Amaherawhchu, ka thu hriaa zâwm lo chu lungphûm nei lova lei chung maia in satu ang chu a ni; in chu tuilianin a rawn hrût a, a chhe ta nghâl a, a tlu sawp rem rum mai a ni,” a ti a.