Read Mizo Lushai CHANCHIN ṬHA LUKA ZIAK 7 Bible Online

CHANCHIN ṬHA LUKA ZIAK 7 - Mizo Lushai bible

CHANCHIN ṬHA LUKA ZIAK 7

¹Mite hriat atâna a duh ang a sawi zawh chuan Kapernaumah a lût ta a.

²Sipai za hotu pakhat bawih duh tak a dam lo va, a thi lek lek a.

³Isua chanchin a lo hriat chuan a bawih tidam tûra ngên tûrin Juda upate a tîr a.

⁴Anni chuan Isua hnên an va thleng a, ṭhahnemngai takin an ngên a, “Hei hi i tihsak tlâk a ni e,

⁵kan hnam hi a hmangaih a, sunagog pawh min saksak a ni,” an ti a.

⁶Tichuan, Isua chu an rualin a kal ve ta a. In a thlen dâwn chuan sipai za hotu chuan a ṭhiante a tîr a, “Lalpa, lo kal harsa duh suh,

⁷ka in chhûng i luhna tlâk a ni lo va, i hnêna lo kal tlâkah pawh ka inngai lo va ni; thu pe la, ka nau chu a dam mai ang.

⁸Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tiha chu a kal a, ‘lo haw rawh,’ ka tiha chu a lo haw mai a, ka bawih pawhin ‘hei hi ti rawh,’ ka tih chu a ti mai ṭhîn,” a ti a.

⁹Tin, Isuan chu chu a hriatin chu mi chu mak a ti hle a, a lehhawi a, a zuitu mipui hnênah, “Ka hrilh a che u, heti êma ring nasa hi Israel-te zîngah tu mah ka hmu lo,” a ti a.

¹⁰Mi tirhte kha inah an va haw leh chuan bawih chu damin an va hmu a.

¹¹A hnu lawkah khaw pakhat Nain an tihah chuan a kal a, a zirtîrte leh mipui nasa tak an kal ve a.

¹²Khaw kulh kawngka a thlen dâwn chuan, ngai teh, mitthi an rawn zâwn chhuak a; a nu chu hmeithai a ni a, a fapa mal a ni. Khuaa mi tam tak pawh an lo kal ve a.

¹³Lalpa chuan a han hmuhin chu nu chu a khawngaih ta êm êm a, “Ṭap tawh suh,” a ti a.

¹⁴A va hnaih a, hlâng chu a chelh a, a zâwntute pawh chu an ding ta a; “Tlangvâl, tho rawh, ka ti a che,” a ti a.

¹⁵Mitthi chu a ṭhuchhuak a, a lo ṭawng ta a, a nu hnênah chuan a pe a.

¹⁶Mi zawng zawngin an hlau ta a, Pathian an fak a, “Kan zîngah zâwlnei ropui tak a lo awm ta a nih hi,” an ti a; “Pathianin a mite a rawn tlawh ta a nih hi,” an ti bawk a.

¹⁷Chûng thu chu Judai ram zawng zawngah leh a kiang vêl ram tinah a thang chhuak ta a.

¹⁸Chûng thu zawng zawng chu Johana zirtîrte chuan an pu chu an hrilh a.

¹⁹Johana chuan a zirtîr pahnih a ko va, Lalpa hnênah chuan a tîr a, “Lo kal tûra chu i ni nge, mi dang kan la nghâk ang?” tiin.

²⁰Chu mite chu Isua hnên an va thleng a, “Baptistu Johanan, ‘Lo kal tûra i ni nge mi dang kan la nghâk ang?’ tiin i hnênah min tîr a ni,” an ti a.

²¹Chutih lai tak chuan Isuan mi tam tak, natna tuar te, hripui vei te, thlarau bawlhhlawh paite a tidam a, mitdel tam tak pawh an mit a lo tihvârsak a.

²²Tichuan, anni chu a chhâng a, “Kal leh ta ula, in thil hmuh leh in hriatte hi Johana chu va hrilh tawh u; mitdelte chu an mit a vâr a, kebaite kein an kal a, phârte an thianghlim a, bengngawngte pawh an beng a vâr a, mitthite kaihthawh an ni ta a, pachhiate hnênah Chanchin Ṭha hrilh a ni ta.

²³Tu pawh ka laka beidawng lo chu an nihlawh e,” a ti a.

²⁴Johana mi tirhte an haw hnu chuan mipui hnênah Johana chungchâng a sawi ta a. “Eng ennawm en tûrin nge thlalêrah in kal? Thli chhêm nghîn luang maw?

²⁵A nih leh tu en tûrin nge in kal? Puan nêm sina inchei maw? Puan nêm sin leh mi neinungte chu lal inah asin an awm.

²⁶Eng ber en tûrin nge in kal? Zâwlnei en tûrin maw? A nih ngei kha; ka hrilh a che u, ani chu zâwlnei ai pawha ropui zâwk a ni. He mi hi alâwm:

²⁷‘Ngai teh, ka tirhkoh i hmaah ka tîr a, Ani chuan i hmaah i kawng a buatsaih ang,’ tia a chanchin an ziak kha.

²⁸Ka hrilh a che u, hmeichhe hrin zîngah Johana aia ropui zâwk an awm lo; amaherawhchu, Pathian rama mi tê ber pawh ani ai chuan a ropui zâwk,” a ti a.

²⁹Vântlângho leh chhiahkhawntute chuan Johana thu an hriatin Pathian thiltih dik tak chu pawmin a baptisma an chang hlawm a;

³⁰Farisai-te leh Dân hremite erawh chuan baptisma chu an chang ve duh lo, anmahni tâna Pathian remruat chu an duh lo a ni.

³¹Isuan, “Tûnlai mite hi eng nên nge ka tehkhin ang? Eng ang nge an nih? Naupang dâwrpui hmuna ṭhu-a, inau tawna,

³²‘Phênglâwng kan tumsak che u a, in lâm lo va, kan ṭap vak a, in ṭap chuang bawk si lo,’ intite ang hi an ni.

³³Baptistu Johana chu a lo kal a, chhang a ei lo va, uain a in hek lo va, nangnin ‘ramhuai a zâwl a nih hi,’ in ti a.

³⁴Mihring Fapa a lo kal a, a eiin a in a, nangnin, ‘En teh u, mi vir, uain heh mi, chhiahkhawntute leh mi sualte ṭhian saw,’ in ti leh si a.

³⁵Nimahsela, Pathian finna dikzia chu a pawmtuteah a lang chhuak a ni,” a ti a.

³⁶Farisai zînga pakhatin chaw eiah a sâwm a, Farisai inah chuan a lût a, chaw a kîl a.

³⁷Ngai teh, chumi khuaa hmeichhe sual pakhatin Farisai inah chaw a ei tih a hriat chuan alabasta bûrin hriak rimtui a rawn keng a.

³⁸A hnungah, a ke bulah chuan ṭap chungin a ding a; a mittui chuan a ke chu a far huh a, a sam chuan a zu hru a, a ke chu a fâwp ta ngawih ngawih a, hriak rimtui chu a leih a.

³⁹A sâwmtu Farisai chuan a hmuhin, “He mi hi zâwlnei ni tak tak se chu a dektu hmeichhia hi tu nge a niha, eng ang mi sual nge a nih hi a hre tûr,” a ti rilru a.

⁴⁰Isuan a hnênah, “Simon, i hnênah thu kam khat sawi tûr ka nei,” a ti a. Ani chuan, “Sawi ta che, Zirtîrtu,” a ti a.

⁴¹Isuan, “Mi pahnihin tangka pûktîrtu hnênah lei an ba a, pakhat chuan duli zanga, pakhat chuan duli sawmnga. Rulhna an neih loh avângin a ngaidam ve ve ta a.

⁴²Chutichuan, tu zâwk chuan nge ani chu hmangaih zâwk ang?” a ti a.

⁴³Simona chuan, “A ngaihdam tam zâwk chuan a ni ang chu,” a ti a. Ani chuan, “I ti dik e,” a ti a.

⁴⁴Hmeichhe lam chu a hawi a, Simona hnênah, “He hmeichhia hi i hmu êm? I inah ka lo lût a, nangin ka ke silna tûr tui mi pe lo va, ani hi chuan a mittuiin ka ke a tihuh a, a samin a hru a.

⁴⁵Nangin mi lo fâwp lo va, ani hi chuan a lo luh tirh ata ka ke fawh a bâng lo.

⁴⁶Nangin ka luah hriak mi thih lo va, ani erawh hi chuan hriak rimtui a leih a ni.

⁴⁷Chuvângin, ka hrilh a che, a sual zawng zawng chu ngaihdam a ni ta, ani pawhin heti tak hian a hmangaih a ni. Ngaihdamsak nêp chuan a hmangaih nêp ṭhîn,” a ti a.

⁴⁸Hmeichhe hnênah chuan, “I sualte ngaihdam a ni ta,” a ti a.

⁴⁹A chaw kîlpuite chuan, “Sualte pawh ngaidam ta mai chu tu nge maw a nih le?” an inti a.

⁵⁰Tin, anin hmeichhe hnênah chuan, “I rinna hian a chhandam che a ni, thlamuang takin kal rawh,” a ti a.