Read Mizo Lushai CHANCHIN ṬHA LUKA ZIAK 8 Bible Online

CHANCHIN ṬHA LUKA ZIAK 8 - Mizo Lushai bible

CHANCHIN ṬHA LUKA ZIAK 8

¹Chûng hnu lawkah chuan khaw lian leh khaw tête fangin Pathian ram Chanchin Ṭha chu hrilin a puang zêl a; Sâwmpahnihte pawh an tel ṭhîn.

²Nu ṭhenkhat, thlarau bawlhhlawh pai tihdamte leh na dam lehte pawh an tel bawk; Magdala khaw mi, a kawchhûng ata ramhuai pasarih chhuak ta Mari an tih te,

³Heroda sum enkawltu Chuza nupui Joani te, Susani te leh mi dang tam takte chu; chûngte chuan anmahni neihin Isua leh a hote rawng an bâwlsak ṭhîn.

⁴Tin, mipui nasa tak an lo pung khâwm a, khaw tin ata miin an rawn pan huai huai a; tehkhin thu hmangin thu a lo hrilh a.

⁵“Buh chi thehtu chu buh chi thehin a feh a; chutia a han theh chuan a ṭhen kawngah a tla a, miten an rap mai mai a, chunglêng savaten an tlân zo ta thuai a.

⁶A ṭhen pialtlêp chungah a tla a, ṭo chu a han ṭo thuai a; mahse, a hnâwn loh avângin a râwp ta mai a.

⁷A ṭhen hnimhlîngnei zîngah a tla a, hnim chuan a ṭhan khalh a, a dîp ral ta a.

⁸A ṭhen lei ṭhaah a tla a, a lo ṭhang lian a, a lêt za-in a rah ta a,” a ti a. Chûng thu chu a sawi a, “Ngaihthlâkna beng nei chuan ngaithla ngun rawh se,” tiin a au va.

⁹A zirtîrte chuan chu tehkhin thu chu eng tihna nge tih an zâwt a.

¹⁰Ani chuan, “Pathian ram thu ril chu nangni hriat atâna tih a ni a, mi dangte tân erawh chuan thu harsa a ni; hmu reng mah se an hmuh fiah theih lohva, hre mah se an hriatthiam loh nân.

¹¹“Tehkhin thu awmzia chu hei hi a ni: Buh chi chu Pathian thu hi a ni.

¹²Kawnga mi chu thu ngaithlatute an ni, an awih lohva chhandam an nih loh nân Diabola a lo kal a, an thinlunga thu chu a lâk zawhsak ṭhîn.

¹³Pialtlêp chunga mi chu, an hriat veleh thu chu lâwm taka pawm tate hi an ni; nimahsela, zung rêng an kai lo va, rei lo tê zawng an awih mai a, thlêmna an han tâwk hlek a, an tlûksan leh mai ṭhîn.

¹⁴Hnimhlîngnei zînga tlate chu thu chu an hria a, a han ṭhang ve a; mahse, dam chhûng khawsak engtona leh nawmsak duhna chuan a rawn dîp a, rah puitling a chhuah ve ta lo va ni.

¹⁵Lei ṭhaa mi chu hêngte hi an ni, thu chu hriaa, rilru dik leh ṭha pua, vawng tlata, bei hrâm hrâma rah chhuah tate hi an ni.

¹⁶“Tu man an khâwnvâr hâl chu bêlin an khuh ngai lo, khum hnuaiah pawh an dah ngai hek lo, a lût apiangin a êng an hmuh theih nân a dahnaah an dah zâwk ṭhîn.

¹⁷Eng mah puan leh loh tûra zêp a awm lo, hriat loh tûr leh tihlan loh tûrin eng mah thuhrûk a awm hek lo.

¹⁸Chutichuan, in thu dawnsawn dânah fîmkhur rawh u, a nei apiang chu an pêk belhchhah ang a, a nei lo chu neia a inhriat chhun pawh an lâksak ang,” a ti a.

¹⁹A nu leh a unaute pawh a hnênah an lo kal a; nimahsela, mipui avângin an pawh thei lo va.

²⁰“I nu leh i unauten hmuh tum chein pâwnah sâwn an nghâk a che,” tiin an hrilh a.

²¹Ani chuan a chhâng a, “Pathian thu hriaa zâwmte hi ka nu leh ka unaute an ni e,” a ti a.

²²Ni khat chu a zirtîrte nên lawngah an chuang a, an hnênah, “Dîl râl lehlamah sâwn i kai ang u,” a ti a, an chhuak ta a.

²³Chutia an kal lai chuan a lo muhîl a, dîlah chuan thlipui a lo tleh chhuk phut a, an lawng chu tuiin a khat dâwn ta mai a, an ngaihtuahawm ta hle a.

²⁴A hnênah an kal a, an kai tho va, “Hotupa, hotupa, kan boral dâwn e,” an ti a. Ani chu a lo tho va, thli leh tuifâwn chu a hau va; a bâng a, a reh ta ṭhuap a.

²⁵An hnênah chuan, “Khawiah nge in rinna?” a ti a. An hlau va, mak an ti êm êm a, “He mi hi tu nge ni le? Thli leh tui lam pawh thu a pe a, an awih mai hi!” an inti hlawm a.

²⁶Galili ram zâwn Gerasin mite ramah chuan an va kai a.

²⁷Khawmuala a chhuah chuan khuaa mi, ramhuai man pakhat hian a rawn pan a. Chu mi chu rei tawh tak puan sin lovin inah pawh awm lovin thlânahte a chêng ṭhîn a.

²⁸Isua a han hmuh chuan a au va, a hmaah a bawkkhup a, ring takin “Isu, Pathian chungnungbera Fapa, ka chungthu-ah rawn inrawlh i tum elo? Mi nghaisa lul lo tûrin ka ngên a che,” tiin a au va.

²⁹Chu mi kawchhûnga thlarau bawlhhlawh chu chhuak tûrin thu a lo pe tawh si a. Ramhuai chuan vawi tam tak a buan tawh ṭhîn a, khaidiat te, kawlte an buntîr a, an vêng ṭhîn a; nimahsela, an hlinnate chu a tichat a, ramhuai chuan thlalêrahte a hruai ṭhîn.

³⁰Tin, Isuan, “Tu nge i hming?” a ti a. Ani chuan “Sângruka” a ti a, a chhûnga ramhuai lût chu an tam êm vâng a ni.

³¹Leilâwta paih thla lo tûrin amah an ngên chûl a.

³²Chumi tlângah chuan vawk rual, tam tak an tla a, an kawchhûnga luh phal tûrin a hnênah an ngên a; ani chuan a phalsak ta a.

³³Ramhuaite chuan chu mi chu an chhuahsan a, vawk kawchhûngah chuan an lût a, vawk rual chu khâm kovah chuan an tlân liam a, tuiah an tla hlum ta a.

³⁴A enkawltute chuan thil lo thleng chu an hmuhin an tlânchhia a, khuaa mite leh a chhehvêla mite chu an hrilh a.

³⁵Tichuan, eng thil nge lo thleng ta tih en tûrin mite chu an thawk chhuak a, Isua hnên an lo thlen chuan ramhuai chhuahsan tâka kha puan sina, rilru ngai puin Isua ke bula a ṭhu chu an rawn hmu a, hlauhawm an ti êm êm a.

³⁶Chûng thil hmutute chuan ramhuai man lo dam tâk dân chu an lo hrilh bawk a.

³⁷Gerasin rama mi zawng zawng chuan hlauhawm an tih êm avâng chuan an hnên ata chhuak tûrin an ngên a; tichuan, ani chu lawngah a chuang a, kîr leh a tum a.

³⁸Ramhuai chhuahsana khân a hnêna tel ve zêl a ngên a.

³⁹Nimahsela, Isuan, “I in lamah haw la, Pathianin thil a tihsak che hi va hril zâwk tawh,” tiin a kirtîr ta a. Tichuan, a kal a, khawpui chhûng zawng zawngah chuan Isuan thil a tihsak chu a va tlângaupui ta a.

⁴⁰Tin, Isua lo kîr leh chu mipuite chuan an lo nghâk ṭuai a, an lo lâwm a.

⁴¹Ngai teh, mi pakhat, a hming Jaira, sunagog hotu chu a lo kal a, Isua ke bulah a bawkkhup a,

⁴²a fanu mal kum sâwm leh pahnih vêl mi chu thi chhâwnga a lum reng avângin a ina kalah a ngên a. A kal ta a, innêk tûlh tûlh khawpa mipui nasain an zui a.

⁴³Tin, hmeichhe pakhat kum sâwm leh pahnih thi pût tawh, a sum neih zawng zawng pawh daktor laka sêng zo tawh, tu man an tihdam theih loh chu a hnungah a lo kal a, a puan fêm chu a rawn dek a,

⁴⁴chawplehchilhin a thi pût chu a reh ta nghâl a.

⁴⁵Isuan, “Mi dek kha tu nge ni?” a ti a. ‘Kei chu ka ni lo’ an ti ṭheuh va, Peteran “Hotupa, mipuiin an zîm huai huai che a, an nêk nuk nuk che alâwm,” a ti a.

⁴⁶Nimahsela Isuan, “Tu emaw zawngin mi dek a ni, thiltihtheihna ka chhûng ata a chhuak tih ka hria a ni,” a ti a.

⁴⁷Tin, hmeichhia chuan inthup rual a ni ta lo tih a hriatin, khûr chungin a lo kal a, a hmaah a bawkkhup a, a deh chhan leh chawplehchilha a dam tâk mai thu mi zawng zawng hmaah a hrilh ta a.

⁴⁸Ani chuan, “Ka fanu, i rinna hi i dam phah a ni e, thlamuang takin kal rawh,” a ti a.

⁴⁹A la ṭawng lai mêkin Jaira in ata mi pakhat a lo kal a. “I fanu a thi ta, zirtîrtu hi tihah duh suh,” a rawn ti a.

⁵⁰Isuan a lo hria a. Jaira hnênah, “Hlau suh, ring mai la, a dam leh ang,” a ti a.

⁵¹In chu a va thlen chuan Petera te, Johana te, Jakoba te leh naupang nu leh pa chauh lo chu tu ma luh ve a phal lo va.

⁵²An za chuan an âwm chûm vak vakin an lo ṭah tuar tuar a. Nimahsela, ani chuan, “Ṭap suh u, a thi lo ve, a muhîl a ni zâwk,” a ti a.

⁵³A thi tawh ngei tih an hriat avângin an nuihsan mai a.

⁵⁴Isua chuan a kut a chelh a, “Mami, tho rawh,” a ti a, a ko va.

⁵⁵A thlarau chu a lo kîr leh a, a tho ta nghâl a, “Ei tûr eng emaw pe rawh u,” a ti a.

⁵⁶A nu leh pa chuan mak an ti êm êm a; nimahsela, thil awm dân chu mi dang hrilh a khap tlat a.