Read Mizo Lushai Deuteronomy 1 Bible Online

Deuteronomy 1 - Mizo Lushai bible

Deuteronomy 1

¹Hei hi Jordan lui chhak lam thlalêra Israel-ho an awm laia an hnêna Mosia thu sawi ziakna bu a ni. Jordan lui phai, Sufa ruama Tofel khua te, Laban khua te, Hazerot khua te, Dizahab khua te leh Paran thlalêr inkâra an awm lai a ni.

²Horeb tlâng aṭangin Kades-barnea chu Edom tlângrama kalin ni sâwm leh pakhat kal a ni.

³Aigupta ram an chhuahsan kum sawmlina, thla sâwm leh pakhat, ni khat ni chuan an hnêna hrilh tûr LALPA sawi zawng zawng chu Mosia chuan Israel-te chu a hrilh a.

⁴LALPA chuan Amor mi, Hesbon khaw lal Sihona chu a hneh a, Basan rama Astarot leh Edrei khaw lal Oga pawh a hneh tawh a.

⁵Moab ram, Jordan lui chhak lama an awm lai khân Pathian dân leh thupêkte chu Mosian a sawi fiah a ni.

⁶Ani chuan, “Horeb tlânga kan awm lai khân LALPA kan Pathian chuan, ‘He tlângah hian in awm rei tâwk ta.

⁷In bûk ṭhiat ula, tawlh sawn rawh u. Amor-ho ram, tlângramah chuan kal ula, a vêl ramte fang rawh u. Jordan lui phai te, tlângram te, chhim lam ram te, Mediteranean tuipui kam thlengin kal rawh u. Kanan-ho ram te, Lebanon tlâng piah Eufretis lui thlengin kal rawh u.

⁸He ram hi a ni, in thlahtu Abrahama te, Isaka te, Jakoba te leh an thlahte hnêna pêk ka tiam ram chu, fang ula, va hneh rawh u le,” a ti a.

⁹Mosia chuan mipui hnênah, “Horeb tlânga kan awm lai khân ka hrilh che u kha. Keimah ngawt chuan rit ka ti lutuk ta che u a, ka tlin ta lo.

¹⁰LALPA, in Pathian chuan vâna arsi zâtin a titam ta che u a.

¹¹In thlahtute Pathian, LALPA chuan tûna in lêt sângin tipung che u sela, a tiam angin tihmuingîl che u rawh se.

¹²In thubuai rem chu hahthlâk tham a ni ta; keimah maia tih sên a ni ta lo.

¹³Mi fing, thil chhût thiam leh hre zau, hnam tin aṭangin thlang chhuak ula, an kutah ka hlân ang che u:

¹⁴chu chu thil tih âwm tak a nih pawh in hria a.

¹⁵Tichuan, mi fing leh thil hre zau te, in hnam zawng zawng zînga thlan chhuahte chu ka kawltîr ta che u a; ṭhenkhat chu mi sâng chungah rorêl tûr an ni a, a ṭhen chu za chungah, a ṭhen chu sawmnga chungah. Chûng bâkah pawh hnam tina hotu tûr ka ruatsak bawk che u a.

¹⁶“Anni chu hetiang hian ka hrilh a: In mite zînga thubuai awm rêng rêng chu ngun takin ngaithla ula, nangmahni mi chauh inkâr thu a ni emaw, in zînga hnam dang awm vete nêna in inkâr thu emaw dik takin, hleih nei lovin rêl ṭhîn ang che u.

¹⁷Duhsak bîk nei suh ula, tu pawh ni se, thuhmun veka enin an thu rêlsak ang che u. Tu mah vênthâwn nei suh ang che u, in thu rêl thlûk chu Pathian aṭanga lo chhuak a ni. In tâna rêl khirh lutuk chu ka hnênah in rawn thlen ṭhîn ang a, ka lo rêl ang.

¹⁸In tih tûr dangte pawh ka hrilh che u kha.

¹⁹“Kan Pathian LALPA thu ang chuan kan ti a. Horeb tlâng kan chhuahsan a, thlalêr ram zau tak leh râpthlâk taka Amor-ho awmna tlângram kawng chu kan kal tlang a, Kades-barnea kan va thleng a.

²⁰Kei chuan, ‘Amor-ho tlângram in lo thleng ta, LALPA kan Pathian min pêk ram chu.

²¹En teh u, LALPA, in Pathian chuan ram chu a pharh duai hi, lût ula, in pate Pathian, LALPA sawi angin nei rawh u, hrilhhaiin hlauthâwng suh u,’ ka ti a.

²²“Mahse, in zain in lo kal a, ‘Ram chu va ena, kan kalna tûr te, kan luhna tûr khawpui chanchin te rawn thlen leh tûrin en thlithlaitu i tîr ang u,’ in ti a.

²³Ṭha ka ti ve bawk a, hnam tin zîng aṭangin mi pakhat zêl, mi sâwm leh pahnih kan thlang chhuak a.

²⁴An kal ta a, tlângramah chuan an han chho va, Eskol ruam an thleng a, an en thlithlai vek a.

²⁵Theirahte chu an rawn hâwn a, thu an rawn thlen a, ‘LALPA, kan Pathian min pêk ram chu a lo ṭha kher mai!’ an ti a.

²⁶“Nimahsela, in kal duh lo va, LALPA in Pathian thupêk chu in nawrhsan ta a.

²⁷In phunnawi a, ‘LALPA hian min hua a ni; Aigupta ram aṭangin min hruai chhuak a, Amor-ho kutah min pe dâwn a lo ni, min tihchhiat a lo tum a nih hi.

²⁸Engah tehlul nge kan chhoh vang, chuta awmte chu keini aia lian leh sâng pui pui an ni a, an khuate lah a lian a, vân tawng tawnga kulh nei an ni; Anak-ho pawh kan hmu, tia kan unauten an rawn sawi kha kan hlau a ni’ in ti a.

²⁹Anniho chu hlau suh ula, zâm phah hek suh u,

³⁰LALPA in Pathian chu in hmahruaitu a ni a, ani chuan a dopui dâwn che u alâwm; Aigupta ramah in hmuh ngeiah in tân thil a tih ṭhin ang khân a ti zêl dâwn a ni.

³¹Thlalêra in thang chhûng zawng pawh khân kawng engkimah a hruai che u a, pain a fa a pua angin he hmun hi a paw thleng che u tih in hre reng si a.

³²He thilah hian LALPA in Pathian chu in ring ngam lo a ni;

³³in hma a hruai zêl a, in bûk khuarna tûr a zawn chhuahsak che u a, zânah mei êng, chhûnah chhûm dingin a hruai ṭhîn che u a nih kha.

³⁴“LALPA chuan in thâwm a lo hria a, a thinur hle a.

³⁵‘He chhuan sual tak zînga pakhat mah hian, ram ṭha tak an pate hnêna pêk ka tiam chu an hmu hauh lo vang.

³⁶An zînga mi pakhat Jefunea fapa Kaleba chauh hian a hmu ang, a rah apiang ram chu a fate rochan zêl tûrin ka pe ang, LALPA chu a zui tlat avângin’ tiin thu a tiam tlat a.

³⁷Nangmahni avângin LALPA chu ka chungah pawh a thinur a, ‘Nang pawhin ram chu i hmu lo vang,

³⁸Nuna fapa, i kaihza vêngtu Josua erawh hi chuan a hmu ang: fuih sauh sauh rawh, he ram hi Israel-te a neihtîr dâwn a ni.

³⁹In fanau tê tê, ‘râl man mai mai tûr’ in tihte, a chhia a ṭha la hre pha lote erawh hi chu, chu ramah chuan an lût ang a, an nei ang.

⁴⁰In za hian kîr leh ula, Tuipui Sen lam panin thlalêrah kal rawh u,’ a ti a.

⁴¹“Nangni chuan ka hnênah, ‘LALPA chungah thil sual kan ti a ni, tlângramah chuan kan han chho vang a, kan Pathian, LALPA thupêk ang chuan kan han bei ang e,’ in ti a. Hriam in keng ṭheuh va, tlângrama han chhoh chu awlsam hle tûrah in ngai vei a.

⁴²LALPA chuan ka hnênah, ‘Chho teh suh u, han bei hek suh u, in zîngah ka awm lo, an lo that ngei ang che u,’ tiin hrilh rawh min ti a.

⁴³Chu chu ka hrilh che u a, in ngaithla duh lo va; LALPA thupêk chu in zâwm duh lo va, tlângramah chuan in kal chho lui ta a.

⁴⁴Chûng lai tlângrama awm, Amor mite chuan an rawn bei lêt che u a, khuaiin mi a ûm ang maiin an ûm che u a. Horma thleng rawkin an ûm thla che u a, Edom tlângramah an hneh ta che u a nih kha.

⁴⁵LALPA lam in lo hawi a, a hnênah in ṭap a; mahse, LALPA chuan in aw a lo hre duh lo va, a lo ngaithla duh hek lo.

⁴⁶Tichuan, Kades-barnea-ah chuan rei tak in awm ta a.