Read Mizo Lushai Deuteronomy 10 Bible Online

Deuteronomy 10 - Mizo Lushai bible

Deuteronomy 10

¹“LALPA chuan ka hnênah, ‘Lungphêk pahnih, a hmaa mi ang kha chher la, tlângah ka hnênah lo chho leh ang che; a bâwm tûr thingrem siam bawk rawh.

²I tihkeh tâk lunga chuang ang kha, chûng lungah chuan ka lo ziak leh ang e, bâwmah chuan i dah dâwn nia’ a ti a.

³Tichuan, Sitim thingin thingrem ka siam a, a hmaa mi angin lungphêk pahnih ka chher a, a pahnih chuan ka chhohpui ta a.

⁴Lungphêkahte chuan a hmaa thu ziak ang chiah, thupêk sâwm kha a lo ziak leh a; tlâng bula in pun khâwm ni-a mei aṭanga in hnêna a thu sawi chu LALPA chuan min pe a.

⁵Tlâng aṭang chuan ka lo kîr a, bâwm ka siamah chuan LALPA min hrilh angin lung phêkte chu ka dah a, tûn thlengin a la awm ta a ni.

⁶“Israel-te chu Beerot-bene-jaakan aṭangin Mosera-ah an insawn a, chutah chuan Arona chu a thi a; kan phûm a, a fapa Eleazara chuan puithiam lalber hna chu a thawk ta a.

⁷Chuta ṭang chuan Gudgod-ah an insawn a, tui tam tak awmna hmun Jotbata-ah chuan an insawn a.

⁸“Chutih lai chuan Levia thlahte chu LALPA chuan Thuthlung Bâwm enkawltu atân leh zâwn ṭhîntu atân a ruat a; LALPA hmaa dinga, a rawng bâwl a, a hminga mipui mal sâwmsak ṭhîn tûrin tûn thlengin a ruat ta a ni.

⁹Chuvâng chuan, Levia chite chuan an unau dangte angin ram bîk leh chanpual hran an nei ve dâwn lo va, LALPA in Pathian sawi angin LALPA hnêna thilhlan hi an chanpual ve tûr chu a ni.

¹⁰“Tlângah chuan ni sawmli leh zan sawmli ka awm a, LALPA chuan chumi ṭum pawh chuan ka thu a lo ngaithla a, LALPA chuan tihhlum loh che u a remti ta a.

¹¹LALPA chuan, ‘Tho la, i mite hma hruai rawh, an pate hnêna pêk ka tiam tawh ram chu luah tûrin kal zêl rawh se,’ mi ti a.

¹²“Khai le, Israel-te u, LALPA in Pathian hian in lakah eng nge a phût? LALPA, in Pathian chu ṭih a, a duhzâwng apiang tih a, tihtakzeta rilru zawng zawnga amah chauh hmangaih leh a rawngbâwl te,

¹³in ṭhatna tûra vawiina ka hrilh che u, a thupêk leh a thuruat zawm te hi a ni lâwm ni?

¹⁴Vân pum pui te, lei leh a chhûnga awm zawng zawng te neitu hi LALPA chu a ni;

¹⁵chuti taka mi ropui chuan in pute chu a hmangaih êm êm a, hnam dang zawng zawng aiin a thlang ta hial che u a ni.

¹⁶Tichuan, tûn chinah zawng LALPA thu chu awih ula, luhlul tawh suh u.

¹⁷LALPA in Pathian hi pathiante Pathian, lalte Lal, Pathian ropui, thiltithei leh ṭihbaiawm tak chu a ni; tu mah thlei bîk a nei lo va, tlawn lungawi theih lah a ni hek lo.

¹⁸Fahrahte leh hmeithaite thu chu dik takin a ngaihtuahsak ṭhîn a, in zînga hnam dang awmte pawh a hmangaih a, an ei tûr te, silh tûr te a pe tho a ni.

¹⁹Chuvângin, in zînga awm ram dang mite chu hmangaih ve ula, Aigupta ramah mikhual in zu nih tawh kha.

²⁰LALPA in Pathian chu ṭih ula, a rawng bâwl ula, amah chu vuan tlat rawh u; intiamkam nân a hming chauh chhâl ṭhîn ang che u.

²¹In mit ngeia in hmuh, thil ropui tak tak leh mak tak tak tia chawimawitu che u chu in Pathian hi a ni.

²²In pute, mi sawmsarih chu Aigupta ramah an chhuk a, tûnah zawng LALPA in Pathian chuan arsi zâta tamin a tihpun tâk che u hi.