Read Mizo Lushai Deuteronomy 11 Bible Online

Deuteronomy 11 - Mizo Lushai bible

Deuteronomy 11

¹“Tin, LALPA in Pathian chu hmangaih ula, a thuruat te, awm dân tûr a tih te, a thupêk te chu zâwm reng rawh u.

²LALPA chungchâng, nangmahni ngeiin in hriatte kha ngaihtuah ṭhîn rawh u. Chûng thil hretute chu in fate an ni lo, nangmahni ngei hi in ni, LALPA in Pathian thununna natzia te, a ropuizia te, thu a neihzia te leh thil a tihtheihzia te in hmu a;

³Aigupta lal Farawa leh a ram chhûnga chhinchhiahna thil mak tak tak a tih te,

⁴Aigupta sipaiho, an sakawrte leh an sakawrtawlailîr a sawisak dân te leh an ûm lai che ua Tuipui Sen a chîmpiltîr dân te, vawiin thlenga a tihchhiat tâk thu te in hre vek a ni.

⁵He hmun in lo thlen hma, thlalêra in awm laia in chunga a thiltih te,

⁶Reubena thlah zînga Eliaba fa Dathana leh Abirama te chu an chhûng te, an puan in te, an chhiahhlawh te leh an ran te nên lam bûk dang kiang maia awm an ni na a, lei a lo kak a, an tlâk tâk bîkzia te kha in hria a,

⁷LALPA thil ropui tak tak tihte chu in mit ngeiin in hmuh kha.

⁸“Thupêk, vawiina ka hrilh zawng zawng che u hi zâwm ula; tichuan, in lo chak ang a, in kalna tûr ramah chuan in lût ang a, in nei mai thei ang a,

⁹khawizu leh hnutetuia luang ram, in pate hnên pawha pêk a tiam tawh che u ramah chuan in dam rei thei ang.

¹⁰In ram, in neih tûr hi, in awmna ṭhin Aigupta ram ang kha a ni ve lo; chuta in thlai chînte chu tuia châwmin in duat a ṭûl ṭhîn.

¹¹In neih tûr ram chu tlâng leh ruama khat a ni a, vân ruahtui dawng tam ram a ni.

¹²LALPA in Pathian chuan chu ram chu a duat hle a, kum tîr aṭanga kum tâwp thlengin a vil reng a ni.

¹³“Tichuan, vawiina ka hrilh che u thupêkte hi zâwm rawh u, LALPA in Pathian hi hmangaih ula, tihtakzetin a rawngbâwl rawh u.

¹⁴Ruah hmasa leh ruah hnuhnûngte chu in ramah a hun takah a sûrtîr ang a, in buh te, in grep te, in oliv te, a hun takah in seng thei ang a;

¹⁵in ran ei tûr hnimte pawh a tiduah ang. Nangni pawhin puar taka ei tûr in nei reng ang a, in tlai hle ang.

¹⁶“Fîmkhur rawh u, mahni inbum chawpin in pêng hlauh ang e, pathian dangte chibai bûkin an rawng in bâwl ve dah ang e.

¹⁷LALPA chu a thinur ang a, vânte khi khârin ruahte a sûrtîr lo vang a, leiah eng mah a rah lo mai ang. LALPA pêk che u ram ṭha tak aṭang hian in boral thuai mai ang.

¹⁸Chuvângin, a thute hi in rilru leh in thinlungah vawng ṭha ula, hlut hle rawh u, in hriat reng theih nân in bânah te phuar bet ula, in mit inkâr chalhrênah te dah rawh u.

¹⁹In fate pawh zirtîr rawh u, in chhûnga in ṭhut lai te, kawnga in kal lai te, in mut dâwnah te leh in thawh dâwnah te sawi sawi ṭhîn ang che u.

²⁰In kawngka biangah te ziak ula, in tual kawngkhârah te târ ang che u;

²¹tichuan, in pate hnêna pêk a tiam ramah hian, lei hi vânin a khuh chhûng chu in fate nên rei tak in dam ang.

²²“A thupêk ka hrilh zawng zawng che u hi zâwm ula, ti ṭhîn rawh u. LALPA in Pathian chu hmangaih ula, a duh ang chuan awm ula, amah chu vuan tlat rawh u.

²³LALPA chuan in hmaah hêng hnam zawng zawng hi a ûm chhuak ang a, in aia hnam tam zâwk leh chak zâwkte chu an ram in luhchhuahsak ang.

²⁴In rah apiang chu in ram a ni zêl ang. Thlalêr leh Lebanon inkâr, Eufretis lui leh Mediteranean tuipui inkâr ram chu in ram a ni vek ang.

²⁵Tu mah lo dang thei che u an awm lo vang. LALPA in Pathian chuan a sawi tawh angin in kalna apiangah in hmaah mite a tizâm zêl dâwn a ni.

²⁶“Ngai teh u, vawiinah hian malsâwmna dawn theihna leh ânchhe dawn theihna kawng ka hrilh che u hi.

²⁷Vawiina ka hrilh che u LALPA, in Pathian thupêk zawm hi malsâwm dawn theihna kawng chu a ni.

²⁸Vawiina ka hrilh che u LALPA in Pathian thupêk awih duh lo te, tih tûr ka hrilh che u ti lova pêng bo te, in la hriat ngai hleih loh pathian dang biakte hi ânchhe dawnna kawng chu a ni.

²⁹“LALPA in Pathianin in luah tûr ram a hruai thlen hunah che u chuan Gerizim tlângah malsâwmna kawng hi puang ula, Ebal tlângah ânchhe dawnna kawng hi puang bawk ang che u.

³⁰Hêng tlângte hi Jordan lui thlang lam, Kanan ram chhûnga awm Jordan ruam khawthlang lam, More sasaw thing kiang, Gilgal khaw bula awm a ni.

³¹Jordan lui in kân ṭêp tawh a, LALPA in Pathianin ram a pêk che u chu in luah dâwn hnai ta. Chûng ram chu in lâka, awmhmun in benbel hunah chuan,

³²thuruatte leh awm dân tûr vawiina ka hrilh che u zawng zawng hi zâwm ngei ang che u.