Read Mizo Lushai Deuteronomy 12 Bible Online

Deuteronomy 12 - Mizo Lushai bible

Deuteronomy 12

¹“LALPA in Pathian pêk che u ram in luaha, in dam chhûnga ngun taka in zawm tûr thuruatte leh awm dân tûrte chu hêng hi a ni:

²In va luahlan tûr hnamten an pathian an biakna hmun, tlâng sâng tak taka mi te, muala mi te, thingbuk tinrêng hlima mi te chu in tihchhiatsak vek tûr a ni.

³An maichâmte chu in theh darh ang a, an lungphunte chu in chhu chhia ang a, Aseri lem an thingphunte chu in hâl ang a, thinga milim an tukte chu in chêk chhe vek ang a, hêng hmaahte hian chibai bûka an kûn leh tawh lohna tûr khawpin tichhe hlauh ang che u.

⁴“Hêng mite biak dân ang hi chuan LALPA in Pathian chu in be ve tûr a ni lo.

⁵Israel hnam zawng zawng ram chanpual aṭangin LALPA chuan a hming awmna tûr hmun pakhat a thlang ang a, chutah chuan, a hmaah in lo kal khâwm ṭhîn tûr a ni.

⁶Chutah chuan in hâlral thilhlante leh in thilhlan dangte in rawn hlân tûr a ni; in sâwma pakhat te, in thilpêk te, in intiamkam tlâkna thilhlan te, mahni duh thu-a thilhlan te, in ran no piang hmasa ber te in rawn dah ṭhîn tûr a ni.

⁷Chutah chuan LALPA in Pathian hmaah, in hnathawh mal a sâwm avânga in thil ṭha neihte chu in chhûngin hlim takin in ei ṭhîn dâwn nia.

⁸“Chumi hunah chuan tûna mahni duh duha in tih ang hian in ti tawh tûr a ni lo.

⁹Tûnah zawng, LALPA, in Pathianin a pêk tûr che u ramah lûtin in la châwl rih lo va.

¹⁰Jordan lui in kai a, LALPA in Pathianin a pêk tûr che u rama in chên a, in vêla in hmêlmate laka râlmuang taka in awm hunah erawh chuan,

¹¹LALPA in Pathianin a hming awmna tûr hmun a thlanah chuan, ka hrilh zawng zawng che u kha in rawn keng tûr a ni in hâlral thilhlan te, in inthawina te, in sâwma pakhat te, in thilpêk te, LALPA hnêna intiamkam tlâkna thilhlan te chu rawn keng ṭhîn ang che u.

¹²In fanu fapa te, in bawihpa leh in bawihnu te, in khuaa awm Levia chite nên LALPA, in Pathian hmaah hlim takin eiin bâr ang che u.

¹³In duh duhna hmunah in hâlral thilhlante hi in hlân tûr a ni lo.

¹⁴In zînga hnam khat ram chanpual LALPA hmun thlanah chauh in hâlral thilhlante hi in hlân ang a, tih tûr ka hrilh zawng zawng che u hi in ti tûr a ni.

¹⁵“In ran vulhte erawh chu in awmna apiangah in talh thei ang. LALPA in Pathianin sa a pêk apiang che u chu in ei thei ang; mi bawlhhlawh leh mi thiangte pawhin sakhi leh sazuk sa angin in ei thei ang.

¹⁶Sa thisen erawh chu in ei tûr a ni lo, leiah a luang ral tûr a ni.

¹⁷Sâwma pakhat in pêk buh te, uain te, oliv hriak te, in ran no neih hmasak te, in intiamkam tlâkna sa te, mahni duh thua thilhlan sa te leh in thên thilhlan sa rêng rêng te chu mahni khuaah in ei tûr a ni lo.

¹⁸LALPA in Pathian hmun thlanah chuan a hmaah ngei in ei tûr a ni. In fanu in fapa te, in bawihpa leh in bawihnu te, in khuaa awm Levia chi te nên, LALPA hmaah chuan in thawhrah te chu hlim leh lâwm takin in ei tûr a ni.

¹⁹In rama in awm chhûng chuan Levia chite hi ngaihthah hauh suh ang che u.

²⁰ LALPA in Pathianin a tiam anga in ramri a tihzau hunah chuan in duhna apiangah in sa châkzâwng chu in ei thei ang.

²¹LALPA in Pathianin a hming dahna tûr hmun a thlan chu, in awmna aṭanga a hlat viau chuan LALPA pêk che u in ran vulhte chu ka hrilh che u ang hian in talh thei ang: in duh tâwkin mahni inah a sa chu in ei thei ang.

²²Sakhi leh sazuk sa in ei angin mi thiangte leh mi bawlhhlawh lai te pawhin a sa chu an ei thei ang.

²³Sa thisen erawh chu ei rêng rêng suh u, nunna chu thisenah a awm a, a nunna chawpin in ei tûr a ni lo.

²⁴Thisen chu tui angin leiah leihbua ula, ei suh u.

²⁵A thu anga in tih chuan, LALPA chu a lâwm ang a, in thlahte leh in tân a la ṭha ang.

²⁶LALPA hnêna hlan in tiam thil serhte erawh chu a hmun ruatah chuan in rawn dah tûr a ni.

²⁷LALPA, in Pathian maichâma hâlral thilhlan chi te, maichâma thisen theha, a sa ei ho tûr chite chu, chutah ngei chuan in rawn dah tûr a ni.

²⁸Hêng ka thu hrilh zawng zawng che u hi zâwm thlap ula, LALPA ṭha tihzâwng leh a lâwmzâwng chu in ti a ni ang a, in thlahte leh nangni hian kumkhuain in ṭhatpui ang.

²⁹“LALPA, in Pathianin, in va luhchhuah tûr hnamte chu a tihboral a, an ram in neih a, in luahsak hunah chuan,

³⁰a tihboral phahna ang thil kha in ti ve hauh tûr a ni lo; an biak pathiante chu zawng chhuakin, ‘Engtin nge an biak ṭhin le?’ tiin, an tih anga biak ve tum suh ang che u.

³¹An pathiante an biak angin LALPA in Pathian hi in be tûr a ni lo; LALPA tenzâwng, thil chi tinrêng tih an chîng ṭhîn. An maichâmahte chuan an fanu leh fapate ngei pawh hâlral thilhlanah an hâl ṭhîn a ni.

³²Ka hrilh zawng zawng che u hi ti ngei ang che u; eng mah belh suh ula, eng mah hmaih bawk hek suh ang che u.