Read Mizo Lushai Deuteronomy 13 Bible Online

Deuteronomy 13 - Mizo Lushai bible

Deuteronomy 13

¹“In zînga zâwlneiin emaw, mang neih chîngin emaw thil mak tak tak leh chhinchhiahna hrilh lâwk che u sela,

²an hrilh lâwk ang thil mak tak tak leh chhinchhiahna te chu thleng dik ṭhîn mah se, ngaihven suh u. ‘Ti rawh u, pathian dang biak tûr i zawng ang, in la hriat ngai lohte rawng i bâwl ang,’ ti mah se;

³chutianga ti zâwlnei leh mang neih chîngte thu chu bengkhawn suh ang che u; LALPA in Pathian chu tihtakzet leh rilru zawng zawngin in hmangaih nge hmangaih lo tih LALPA in Pathianin a fiahna che u a ni.

⁴LALPA in Pathian hnung chu zui ula, a rawng chu bâwl rawh u.

⁵Chutiang zâwlnei leh mang neih chîngho chu in tihlum tûr a ni, LALPA in Pathian, Aigupta ram aṭanga hruaichhuaktu che u lakah an heltîr che u a, LALPA in Pathianin awm dân tûr a kawhhmuh che u ata an pêntîr che u a ni, in zînga chutiang mi sual awm chu in thian fai tûr a ni.

⁶“In unau, in nu hrin ve ngeiin emaw, in fapain emaw, in fanuin emaw, in nupui pawm laiin emaw, in ṭhian bul berin emaw in nu leh in pate la hriat ngai loh pathian be tûra an thlêm che u chuan duh suh ang che u.

⁷In bul hnaia chêngte pathian emaw, ram hla taka awmte pathian emaw, leia chêng rêng rêng mi dang pathian emaw be tûra an sâwm che u chuan,

⁸an thu chu ngaithla suh ula, ngaihven hek suh ang che u; anni chu khawngaih suh ula, lainat hek suh u, hum pawh tum hek suh u.

⁹Chûngho chu in tihlum tûr a ni, nangin kut i thlâk hmasa ang a, an chungah mipui an che ve dâwn nia.

¹⁰Bawih in nihna Aigupta ram aṭanga hruaichhuaktu che u LALPA in Pathian laka pên botîr che u an tum avângin lungin in dêng hlum tûr a ni.

¹¹Tichuan, Israel mi zawng zawngin an hria ang a, an hlau vang; in zîngah chutiang thil sual chu a awm leh tawh ngai lo vang.

¹²“LALPA in Pathianin a pêk che u khawpuiah te in awm hunah,

¹³in zînga mi sual, tlâktlai lo tak takten an awmna khuaa mite chu in la biak ngai loh pathian be tûrin an thlêm thlu ta tih in hriat chuan,

¹⁴in chhui ang a, ngun takin in zâwt vêl ang a, in zîngah chutiang thil tenawm ti chu an awm ngei a ni tih in hriat chuan,

¹⁵chu khuaa mite chu khandaihin in that tûr a ni, a chhûnga mi zawng zawng leh an rante chu in that vek tûr a ni.

¹⁶An thil neih zawng zawng in lâkte chu khawpui tual zau laiah in la khâwm ang a, an khua leh an sum in lâksakte chu in hâl vek tûr a ni; LALPA tâna serh hran tawh chu tu man la suh se; LALPA in Pathian tâna hâlral thilhlana hâl ral vek tûr a ni; chu khua chu thil chim chhe awm khâwm mai a ni kumkhua ang a, tu man an din leh tûr a ni lo.

¹⁷LALPA tâna serh hran tawh chu tu man la suh se; tichuan, LALPA thinur chu a dai ang a, a khawngaih ang che u a, in chungah ngil a nei ang a, in pate hnêna a tiam tawh angin a tipung leh ang che u.

¹⁸LALPA in Pathian aw hi ngaithla ula, a thupêk ka hrilh che u hi zâwm ula, LALPA in Pathian duhzâwng chu ti phawt mai teh u.