Read Mizo Lushai Deuteronomy 14 Bible Online

Deuteronomy 14 - Mizo Lushai bible

Deuteronomy 14

¹“LALPA in Pathian mite in ni a, lu in sûnin inzai thi suh ula, in chalsam ziat kawlh ve hek suh u.

²Khawvêla awm zawng zawng zîngah nangni hi LALPA in Pathian tâna hnam serh, a pual bîk atâna LALPA thlan chhuah chu in ni e.

³“Thil tenawm rêng rêng in ei tûr a ni lo.

⁴An sa in ei theih tûr rante chu hêngte hi a ni: bâwng, kêl leh berâm,

⁵sakhi, sangai, sazuk, sathâr, saza, ramsial, ram berâm te hi.

⁶Sa tinrêng, a ke tin kâk phak leh chaw ṭhial nawn chi chu in ei thei ang.

⁷Chaw ṭhial nawn a, tin kâk lo, tin kâka chaw ṭhial nawn lo sa chu in ei tûr a ni lo. Sanghâwngsei te, sazupui te, sangawi te hi in ei tûr a ni lo; chaw chu an ṭhial nawna, an tin a kâk lo a ni; in tân a bawlhhlawh a ni.

⁸Vawk hi a tin a kâk; mahse, chaw a ṭhial nawn lo va, a sa in ei tûr a ni lo, in tân a bawlhhlawh a ni. An sa in ei tûr a ni lo va, a thisâwn chu khawih pawh in khawih tûr a ni lo.

⁹“Tuia awm hêngte hi in ei thei ang: phuhlip leh pângparh nei zawng zawng sa in ei thei ang.

¹⁰Pângparh nei lo, phuhlip pawh nei lo sa chu in ei tûr a ni lo, in tân a tenawm a ni.

¹¹“Sava ei thiang apiang chu in ei thei ang.

¹²Hêngte erawh hi chu in ei tûr a ni lo: mupui, lungdûp, muârla,

¹³mulukawlh, ngawihûp, mutê chi rêng rêng te,

¹⁴choak chi rêng rêng te;

¹⁵sava sâng vabak, tuifinriat sava mu chi rêng rêng,

¹⁶hrângkir, chhimbuk, chingpirinu, chhimbuksialki,

¹⁷tuivalawng, mulukawlh, luidung mu,

¹⁸kânghlai, dîl sava chi rêng rêng, chhuangtuar, bâk te hi.

¹⁹Rannung thla nei, ke pali-a vâk chi rêng rêng chu in tân a bawlhhlawh a, ei tûr a ni lo.

²⁰Thlâwk thei chi sa thiang tawh phawt chu in ei thei ang.

²¹“Amaha thi chu eng sa mah in ei tûr a ni lo, in khaw chhûnga ram dang mi awm vete ei atân an hnênah in pe thei ang a, in hralh thei bawk ang. LALPA in Pathian tâna inserh thianghlim tûr hnam in ni. Kêl notê chu a pui hnutein in chhûm tur a ni lo.

²²“In lo rama thlai tharte chu sâwma pakhat kum tin dah hrang rawh u.

²³LALPA in Pathianin a hming awmna tûra a thlan hmunah chuan kalpui ula, a hmaah chuan in buh te, uain te, oliv hriak te; in bâwng leh berâmno hrin hmasak ber sâwma pakhat in pêkte chu ei ṭhîn ang che u. LALPA in Pathian chu ṭih nachâng in lo hriat theih nân.

²⁴In awmna chu a hlat hle a, LALPA, in Pathian malsâwmna in dawn chu ken a harsat chuan,

²⁵hralh ula, a man chu têl ula, LALPA in Pathianin a thlan hmunah chuan kalpui ang che u.

²⁶Chu chuan bâwng te, berâm te, uain te, zu te, in châk zawng apiang lei ula, in chhûngkuain LALPA in Pathian hmaah hlim leh lâwm takin ei ho ang che u.

²⁷In khuaa Levia chi awm vete chu in ngaihthah tûr a ni lo, in zîngah ram chanpual an nei ve lo a nih kha.

²⁸“Kum thum kuma in sâwma pakhat chu in awmna khuaa hmun pakhatah la khâwm ṭhîn ang che u.

²⁹Ram chanpual an neih ve loh avângin Levia chite chuan chu chu an ei ang; mikhual te, fahrah leh hmeithai, in khaw chhûnga awmte pawhin an ei tûr a ni; puar takin an ei ve tûr a ni. Hetiang hian ti ula, LALPA, in Pathian chuan in thiltih apiang a tihmuingîl ang che u.