Read Mizo Lushai Deuteronomy 15 Bible Online

Deuteronomy 15 - Mizo Lushai bible

Deuteronomy 15

¹“Kum sarih dan zêlah in leiba in ngaidam tûr a ni.

²Hetiang hi ngaihdam dân tûr chu a ni: Israel mi rêng rêngin a Israel-pui tangka pûktîr sela, a kum sarih tâwpah chuan a ngaidam tûr a ni, a tangka ba chu a ṭhîng tûr a ni lo; LALPA ngeiin a ba chu a nuai bosak tawh a ni.

³Hnam dangin in lei an bat chuan in ṭhîng thei ang; nangmahni miin in hnêna lei an bat chu in ṭhîng tûr a ni lo.

⁴LALPA in Pathianin a pêk che u ramah chuan mal a sâwm dâwn che u avângin in zîngah tu mah rethei in awm tûr a ni lo.

⁵LALPA in Pathian aw chu ngaithla ula, vawiina ka hrilh che u, a thupêk zawng zawng hi zâwm phawt mai teh u.

⁶LALPA in Pathian hian a tiam tawh angin mal a sâwm ang che u a, hnam tam tak in pûktîr ang a, nangni chuan in pûksak lo vang; hnam tam tak chungah thu in nei ang a, in chungah erawh chuan thu an nei lo vang.

⁷“LALPA in Pathianin a pêk che u ramah chuan in khaw chhûnga awm ve, in chipui ngei tlachham lakah inchhungêng suh ula, ṭanpui hreh suh ang che u.

⁸Phal takin an mamawh zât zât chu pûktîr rawh u.

⁹Rilru sual pu suh ang che u, ‘Kum sarihna, leiba ngaihdamna hun a lo hnai ta si,’ tiin in unau rethei chu huphurhin melh suh ula, eng mah kawmpui suh ang che u; in chunga a vui thu LALPA hnêna a sawi hlauh chuan thil sual ti in ni mai ang.

¹⁰Ui rilru chungin pe suh u, phal takin pe ula; chutianga in tih chuan LALPA in Pathian chuan in kutkawih mal a sâwm ang a, in tih apiangah in hmuingîl ang.

¹¹In ramah rethei an awm reng dâwn a; chuvângin, thu ka pe a che u, in rama rethei te, tlachham te leh in unau te lakah thilphal hle rawh u.

¹²“In Israel-pui, mipa emaw, hmeichhia emaw bawihah an rawn inhralh chuan, kum ruk in chhawr ang a, in chhuah tûr a ni. A kum sarihnaah chuan in zalêntîr tûr a ni.

¹³Chutia in chhuahtîr chuan, kut ruakin in kaltîr tûr a ni lo.

¹⁴Berâm emaw, uain emaw LALPA hnên aṭanga malsâwmna in dawn chu phal takin pe ve ang che u.

¹⁵Aigupta ramah khân bawih in nih kha hre reng rawh u; LALPA in Pathianin bawih ata a chhuahtîr che u a nih kha.

¹⁶“In bawih chuan nangni leh in chhûngkua a ngainat che u avângin ‘Ka chhuak lo vang’ lo ti ta sela.

¹⁷Chuti a nih chuan in kawngka bulah in dintîr ang a, a beng in verh ang a; tichuan, a dam chhûng chuan in bawih a ni tawh ang. In bawihnu pawh chutiang bawk chuan ti ang che u.

¹⁸Ui chungin in bawih chu chhuah suh u; in hna kum ruk a thawk tawh a, hlawhfa ruai ni ula in sum let hnih in sêng tawh ang. Chutiang chuan ti ula, kawng engkimah in Pathian chuan a tihmuingîl ang che u.

¹⁹“In bâwng leh berâmno hrin hmasak berte chu LALPA in Pathian tân dah hrang ang che u. Bâwng chu chhawr suh ula, berâm pawh a hmul mêt hek suh u.

²⁰Kum tin LALPA hun ruatah chuan, LALPA in Pathian hmaah in chhûngkuain in ei ṭhîn tûr a ni.

²¹A kebai emaw, a mitdel emaw, hmêlhem nasa deuh emaw chu LALPA in Pathian hnênah chuan in hlân tûr a ni lo.

²²In khaw chhûngah erawh chuan in ei thei ang, sakhi sa leh sazuk sa in ei angin mi thiangte leh bawlhhlawh lai te pawhin an ei thei ang.

²³A thisen erawh chu in ei tûr a ni lo; tui angin leiah leihbaw rawh u.