Read Mizo Lushai Deuteronomy 16 Bible Online

Deuteronomy 16 - Mizo Lushai bible

Deuteronomy 16

¹“Abib thla hian LALPA, in Pathian chuan Aigupta ram aṭangin zânah a hruai chhuak che u a; Abib thla hian LALPA in Pathian tân Kalhlên kût hi hmang ṭhîn rawh u.

²A hming awmna tûr LALPA hmun thlanah chuan, in bâwng emaw, berâm emaw, kêl emaw Kalhlên kût atân LALPA in Pathian hnênah hlân rawh u.

³A sa chu chhang dawidim telh nên in ei tûr a ni lo; Aigupta ram in chhuahsan dâwna hmanhmawh taka in ei ang khân tuarna entîrna chhang dawidim telh loh chu, ni sarih chhûng in ei tûr a ni. In dam chhûngin Aigupta, in retheihna ram in chhuahsan ni in hriat reng nân ei ṭhîn ang che u.

⁴“In ram chhûngah rêng rêng ni sarih chhûng chu dawidim a awm tûr a ni lo. A ni hmasa ber tlaia in thilhlan, in ran talh in ei bâng sa a tûk atân dah tûr a ni lo.

⁵LALPA in Pathianin luah tûra a pêk che u khaw chhûngah pawh Kalhlên kût sa hi in hlân tûr a ni lo;

⁶LALPA in Pathianin a hming awmna tûra a thlanah ngei chuan in Kalhlên kûtna tûr chu, tlai ni tlâk dâwn, Aigupta ram in chhuahsan hun angah khân in hlân ṭhîn tûr a ni.

⁷LALPA, in Pathian hmun ruatah chuan in chhûm ang a, in ei ang a, a tûk zîngah chuan in puan in lamah in haw leh tûr a ni.

⁸Ni ruk chhûng chu dawidim telh loh chhang in ei ang a, a ni sarih ni chuan LALPA in Pathian tân inkhâwmpui urhsûn tak nei ula, chumi ni chuan hna rêng rêng thawk suh ang che u.

⁹“Favaha buh in hleh ṭan ni aṭangin hapta sarih chhiar ula;

¹⁰tichuan, Pentikos kût chu hmang ang che u. LALPA in Pathianin malsâwmna tam tak a vûr che u aṭangin amah chawimawi nân in thilthlâwn pêkte chu hlân rawh u.

¹¹LALPA hmaah chuan in fa te, in chhiahhlawh te, a hmei a pain in khuaa Levia chi te, hnam dang te, fahrah te leh hmeithai te in zînga awm ve te nên chuan hlim takin LALPA in Pathianin a hming awmna tûra a thlanah chuan ruai ṭheh rawh u.

¹²Hêng thuruatte hi ngun takin zâwm ula, Aigupta ramah bawih in nih ṭhin kha hre reng ang che u.

¹³“Buh te in seng zawh vek a, in grepte in sâwr zawh vek hnuah, ni sarih chhûng Bâwkte kût hmang ṭhîn ang che u.

¹⁴In fa te, in bawihnu leh bawihpa te, Levia chi te, ram dang mi awm ve te, fahrahte leh hmeithai, in khuaa awm te nên hlim takin ruai ṭheh ang che u.

¹⁵LALPA in Pathianin a hming awmna tûra a thlanah chuan ni sarih chhûng hmang ang che u. LALPA in Pathian chuan in kutkawihte chu mal a sâwm a, a tihhmuingîl che u avângin in lâwm hle tûr a ni.

¹⁶“In zînga mipa zawng zawng chu LALPA in Pathian hmun thlanah chuan kum tin ṭum thum in lo kal ṭhîn tûr a ni: Kalhlên kûtah te, Pentikos kûtah te, Bâwkte kûtah te, LALPA hmaah chuan eng mah keng lovin in lo kal tûr a ni lo.

¹⁷Mi tinin LALPA in Pathian malsâwmna in dawn ang zêlin in theih ang ang in pe tûr a ni.

¹⁸“LALPA in Pathianin khawpui a pêk che u apiangah rorêltu leh hotu tûrte ruat ṭhîn ang che u.

¹⁹Dik takin ro an rêl ang a, hleih an nei tûr a ni lo. Thamna an la tûr a ni lo, thamna hian mi fingte mit pawh a tidel ṭhîn a, mi dikte chungthu pawh dik lo takin a rêltîr ṭhîn.

²⁰Eng lai pawhin a âwm tâwk tak leh dik takin thil ti ṭhîn ang che u; tichuan, LALPA in Pathianin ram a pêk che u hi dam takin in luah reng thei ang.

²¹LALPA in Pathian maichâm in siamna bulah chuan Aseri lim, thing in phun tûr a ni lo.

²²LALPA in Pathian huatzâwng lung pawh in phun tûr a ni lo.