Read Mizo Lushai Deuteronomy 17 Bible Online

Deuteronomy 17 - Mizo Lushai bible

Deuteronomy 17

¹“LALPA in Pathian hnênah hmêlhemna nei bâwng emaw, berâm emaw in hlân tûr a ni lo, a tenzâwng tak a ni.

²LALPA in Pathianin khua a pêk che u chhûngah rêng rêng chuan mipain emaw, hmeichhiain emaw in Pathian ngaimawh zawng tak tiin a thuthlung bawhchhiain,

³pathian dangte ûmin an rawng a bâwla, biak loh tûr ka tih - nî te, thla te leh thil dang tam tak te khi bia sela,

⁴chutiang mi chu an awm tih in hriat chuan ngun takin in zâwt chhuak ang a, Israel-te zîngah chutiang thil tenawm ti in hriat chian chuan,

⁵kulh kawngkaah, chutiang mi, mipa emaw, hmeichhia emaw chu in rawn hruai ang a, chu mi chu lungin in dêng hlum tûr a ni.

⁶Thuhretu pahnih tal thu avâng chauhvin in tihlum thei ang; mi pakhat thu avâng mai chuan in tihlum tûr a ni lo.

⁷Thuhretute chuan lung chuan an dêng hmasa ang a, mipuiin an dêng ve chauh vang. Chutiang chuan in zînga thil ṭha lote chu in thian fai tûr a ni.

⁸“Mihring thah chu tihpalh a nih leh nih loh thu-ah te, rûkrûk leh rûk loh thu ah te, invuak palh leh palh loh thu-ah te dânin a huam loh tihthlûk harsa in khuaa in neih chuan, LALPA in Pathianin a thlan hmunah chuan in kalpui tûr a ni.

⁹Levia chi, puithiamte leh chûng laia rorêltu tûra ruatte chu in râwn ang a, anni chuan a rêl dân tûr an hrilh ang che u.

¹⁰LALPA hmun thlan aṭanga tih dân tûr an hrilh che u ang ngei chuan in rêl tûr a ni.

¹¹An hrilh che u ang ngei leh an thu tihthlûk ang chiah chuan in rêl ṭhîn tûr a ni.

¹²“LALPA, in Pathian rawngbâwltu puithiam thu emaw, rorêltu tûra dah thu emaw duh lova tidanglam hlektu chu tihhlum tûr a ni, Israel ram chhûngah chutiang thil ṭha lo chu in thian fai tûr a ni.

¹³Mi tinin an hria ang a, an hlau vang a, thil an ti mai mai tawh lo vang.

¹⁴“LALPA in Pathianin ram a pêk tûr che u in thlena, in neiha, awmhmun in benbel hnu chuan, ‘Kan vêla hnamte angin lal i nei ve ang,’ in la ti ang.

¹⁵In lal tûr chu LALPA in Pathian mi thlan ngei ni rawh se; nangmahni mi a ni ngei tûr a ni; hnam dang chu in lalah siam suh u.

¹⁶Lal chuan a sipaite tân sakawr a ngah viau tûr a ni lo, Aigupta ramah sakawr lei belh tûrin mi a tîr tûr a ni hek lo; LALPA chuan ‘Chu lamah chuan in kîr leh tawh tûr a ni lo,’ a ti si a.

¹⁷Nupui pawh a nei ṭeuh tûr a ni lo, Pathian a hawisan phah ang e. Tangka leh rangkachak pawh a ngah viau tûr a ni lo.

¹⁸“A ram lalṭhutthlênga a ṭhut hun chuan Levia chi, puithiamhovin an kawl Dân bu hi a ziak chhâwntîr ang a;

¹⁹chu chu a kawl ang a, a dam chhûngin a chhiar ṭhîn tûr a ni; hênga dânte leh thuruatte hi uluk takin a zâwm ang a, LALPA a Pathian chu a chawimawi ṭhîn tûr a ni.

²⁰Chutichuan, a chipui Israel dangte aiin a indah sâng lo vang a, LALPA thupêk pakhat tê pawh a namnûl lo vang a, rei tak a dam ang a, a thlahte pawhin Israel-te chungah ro an rêl reng ang.