Read Mizo Lushai Deuteronomy 18 Bible Online

Deuteronomy 18 - Mizo Lushai bible

Deuteronomy 18

¹“Israel-te zîngah Levia chi, puithiamte chuan ram chanpual an nei ve tûr a ni lo, LALPA hnêna thil hlan hâl bâng chu an nei ang a, chu chu an chanpual tûr chu a ni.

²Hnam dangin ram chanpual an nei angin ram an nei ve tûr a ni lo, LALPAN a tiam angin an chanpual chu LALPA chu a ni.

³‘Bâwng emaw, berâm emaw miin LALPA hnêna an hlan apiang a dâr te, a khabe khing hnih te leh a pumpui te chu puithiam sa tûr a ni.

⁴In buh thar hmasa te leh in uain sâwr hmasak te leh in oliv hriak her chhuah hmasak ber te chu puithiam in pe tûr a ni; in berâm hmul meh hmasak ber pawh pe ang che u.

⁵LALPA in Pathian chuan in zîng ata anni hi an thlah zêlte nên a hmaa ding a, a rawngbâwl tûrin kumkhua atân a ruat a ni.

⁶“A duh phawt chuan Levia chi rêng rêng chu, khawii khua aṭang pawhin LALPA hmun ruatah chuan a lo kal thei ang.

⁷Chutah chuan Levia chi mi dangte ang bawkin LALPA a Pathian rawng chu a bâwl ve thei ang.

⁸Puithiam dangte dawn ang ei tûr chu a dawng ve vek tûr a ni, ama chhûngten thil an rawn thawn erawh chu a nei bil thei ang.

⁹“LALPA in Pathianin a pêk che u ram in thlen hunah, chuta lo awmte thil tenawm tih ang chu ti ve suh ang che u.

¹⁰In zînga tu mahin maichâma hâl ral tûrin in fate in hlân ve tûr a ni lo; aien te, ṭhumvâwr te, aisân te, dawi te,

¹¹kêl mei awrh te, ramhuaizâwl rawih te, thlarau zâwl te, mitthi thlûk te chîng ve suh u.

¹²Chutiang tih chîng chu LALPA tenzâwng tak an ni; chuvâng alâwm LALPA, in Pathianin hêng thil tenawm tih chîngte hi in hmaa a hnawh chhuah ni.

¹³LALPA, in Pathian hmaah chuan hêng thil tenawm lakah hian in fihlîm vek tûr a ni.

¹⁴“Hêng hnam, in luhchhuah tûrte hian aisân an chîng a, ramhuaizâwl thu an ngaithla ṭhîn; nangni zawng LALPA in Pathian hian chutiang in tih ve a phal lo.

¹⁵In zînga mi, keimah ang, zâwlnei a rawn pe ang che u, ani thu chu in zâwm dâwn nia.

¹⁶“Horeb tlâng bula in pun khâwm ni khân LALPA in Pathian hmaah, ‘LALPA kan Pathian aw chu hre tawh lo ila, a mei râpthlâk tak pawh chu hmu tawh lo ila, kan thi mai dâwn alâwm,’ tiin in ngên a.

¹⁷LALPA chuan ka hnênah, ‘An sawi chu a dik e,

¹⁸An zînga mi ngei zâwlnei ka ruatsak ang a, an hnêna sawi tûr ka hrilh ang a, ka thupêk chu a hrilh chhâwng ang.

¹⁹Ka hminga thu sawi ngaithla duh lo apiang chu keiman a chungthu ka ngaihtuah ang.

²⁰Ka tirh ni si lova, ka hminga thu sawitu zâwlnei emaw, pathian dang hming sawitu zâwlnei emaw chu tihhlum tûr a ni,’ a ti a.

²¹‘LALPA sawi a nih leh nih loh engtin nge kan hriat ang?’ in tih chuan, hei hi a thliar dân tûr chu a ni.

²²Zâwlneiin LALPA hminga thu a sawi chu a lo thlen lohva, a dik loh chuan, chu chu LALPA hminga sawi a ni lo vang, ama duh thu-a sawi a ni, hlau suh ang che u.