Read Mizo Lushai Deuteronomy 19 Bible Online

Deuteronomy 19 - Mizo Lushai bible

Deuteronomy 19

¹“In luahlan tûr hnamte chu LALPA in Pathian chuan a tihborala, an ram chu in lâk a, an khuate in neih a, an inahte in chên hunah chuan,

²LALPA in Pathianin a pêk che u ram chu hmun thumah ṭhen ula, ram bung tinah, pan awlsam tûr, khaw pakhat ṭheuh ruat ang che u. Miin mihring tihlum sela, chûng khuaah chuan an tualtlân thei ang a, an lo hum tûr a ni.

⁴Miin mahni hmêlma ni lo, mi dang that palh sela, chûng khuaah chuan an tlân ang a, an him thei ang.

⁵Mi pakhat chuan a ṭhian nên thing kit dûn sela, a hreipui fang chu chêk thlawnin, a ṭhianpa chu dêng hlum ta sela, hêng khaw eng berah hian emaw a tlân ang a, a him thei ang.

⁶A tualtlânna tûr khua chu a hlat viau chuan a tihhluma thisen phuba latu thinur ling chuan a ûm pha ang a, tûn hma pawha inhuatna nei lo thah ve kher loh tûr chu a that mai dah ang e.

⁷Chuvângin, khaw pathum ruat tûrin ka ti che u a nih kha.

⁸“LALPA in Pathian chuan a tiam ang ngeia ram a pêk belh che u a, in pate hnêna pêk a tiam ram zawng zawng a pêk hunah che u chuan,

⁹khawpui pathum dang thlan belh leh ang che u. (LALPA in Pathian chu in hmangaih takzeta, a thu anga awm in tum tlat a, vawiina ka hrilh che u zawng zawng hi in zawm phawt chuan ram chu a pe ngei dâwn si che u a ni.)

¹⁰LALPA in Pathianin ram a pêk che u-ah hian chutiang chuan ti ula, pawi khawih lo thisen chhuah suh u, a mawh in phurh loh nân.

¹¹“Miin a hmêlma chu lo châng ruin lo beiin, lo tihlum ta sela; hêng tualtlânna khuaah hian tlân ve mah sela,

¹²chutiang thilah chuan ama awmna khaw upaten an ko ang a, a thaha laichîn hnai, thisen phuba latu tûr hnênah chuan an pe ang a, a lo tihlum ang.

¹³Khawngaih hauh suh u, Israel-te zîngah tual thah tibo rawh u; tichuan, kawng engkimah in hmuingîl ang.

¹⁴“LALPA in Pathianin ram hi a pêk lai che ua phun tawh, in ṭhenawmte ramri lung chu sawn suh.

¹⁵“Thuhretu pakhat mai avângin mi an thil tihah thiam loh chantîr tûr a ni lo; mi pahnih pathum thu-a nemngheh tûr a ni.

¹⁶Mi pakhatin mi dang tihchhiat tumin dâwtin hêk sela,

¹⁷an pahnih chuan LALPA hmun ruatah chuan an kal ang a, chuta puithiamte leh rorêltu tûra ruatte hmaah chuan an ding dûn tûr a ni.

¹⁸Rorêltu chuan ngun takin a chhui ang a, a hêktu chuan dâwta hêk a nih chuan,

¹⁹a hêka tihchhiat a tumna ang chiah chuan a hêktu chungah chuan an ti tûr a ni; chutiang thil ṭha lo chu in zîng ata in tibo tûr a ni.

²⁰Chutiang ti ve lote chuan an hriatin an hlau ang a, chutiang thil ṭha lo chu in zînga tu mahin an ti ve dâwn lo nia.

²¹In lainat tûr a ni lo, nun aiah nun, mit aiah mit, hâ aiah hâ, kut aiah kut, ke aiah ke a ni ang.