Read Mizo Lushai Deuteronomy 2 Bible Online

Deuteronomy 2 - Mizo Lushai bible

Deuteronomy 2

¹“A tâwpah zawng LALPA thupêk angin kan kîr leh ta nge nge a; Tuipui Sen lam kan pan a, Edom tlângram chu rei tak kan hêl a.

³‘Hêng tlâng hi in hêl rei lutuk ta, hmâr lam pan rawh u,’ min ti a.

⁴Edom tlângram in kal tlang dâwn a, in laichîn hla tawh tak, Esauva thlahte ram chu in kal tlang dâwn, an lo hlau hle ang che u.

⁵Mahse, in bei tûr a ni lo, an ram chu tawng hnih khat lek pawh ka pe dâwn lo a che u. Seir tlângram chu Esauva thlahte tân ka pe tawh a ni.

⁶Chaw leh tui in duh chuan an hnên aṭangin in lei tûr a ni,” a ti a.

⁷“LALPA in Pathian chuan kawng tinrêngah mal a sâwm che u a, thlalêr zau taka in vah lai te khân a enkawl zêl che u a, in Pathian LALPA chuan kum sawmli chhûng chu a awmpui che u a, eng mah in tlâkchham loh kha.

⁸“Tichuan, kan kal zêl a, kan unau Esauva thlah, Seir tlânga awmte chu kan hêl a. Elath leh Ezion-geber aṭangin Jordan phai kawngah kan kal a; hmârchhak lam hawiin Moab ram kan pan ta a.

⁹LALPA chuan ka hnênah, ‘Lota thlah, Moab-ho chu tibuai suh u, in bei tûr a ni lo. Ar khawpui chu an neih atâna ka pêk a ni, an ram chhetê pawh ka pe dâwn lo che u a ni,’ a ti a.

¹⁰(Ar khuaah hian milian chak tak tak Em an tihte chu an awm ṭhîn. Milian chi dang, Anak an tihho tluka sâng bawk an ni.

¹¹Refa-ho tih an ni bawk, mahse, Moab-ho chuan Em-ho an ti ṭhîn.

¹²Edom ramah hian Hor-ho an awm ṭhîn a; mahse, Esauva thlahte hian an ûm chhuak a, an tidarh vek a, an ram chu an luah ta a ni. Chutiang bawkin Israel pawhin LALPAN ram a pêka lo awmte chu an hnawt chhuak a ni.)

¹³“LALPA thupêk angin Zered lui kan kân a,

¹⁴Kades-barnea kan chhuahsan aṭang khân kum sawmthum leh pariat a vei tawh a; khatih laia râlkai chin zawng zawng chu LALPA sawi ang ngei khân an thi vek tawh a ni.

¹⁵LALPAN chûng mite chu a ngaimawh tlat a, an thi zo ta nge nge a ni.

¹⁶“An thih zawh vek hnuin,

¹⁷LALPA chuan ka hnênah,

¹⁸‘Vawiin hian Moab-ho ramri, Ar khawpui kiangah in kal tlang dâwn a.

¹⁹Amon-ho, Lota thlahte ram in va thleng ang a, anni chu chawk buai suh ula, bei hek suh ang che u, an ram chu an awmna atân ka pe tawh a ni, chhetê pawh ka pe lo vang che u,’ a ti a.

²⁰(Chûng ram chu Refa-ho ram tih a ni ṭhîn. Amon-ho chuan hêng mite hi Zamzum-ho an ti.

²¹Anak-ho ang bawka sâng an ni, tam tak an ni a, hnam chak tak an ni ṭhîn; mahse, LALPA chuan a tihlum zo va; Amon-hovin an ram chu an nei a, an luah ta a ni.

²²Esauva thlah, Edom mite tân Seir chu LALPAN chutiang bawk chuan a tihsak a ni. LALPA chuan Hor-ho chu a tiral a; Edom-hovin an ram chu an luah ta a ni.

²³Mediteranean tuipui kamah Kret thliarkâr mite an lo awm a, a tîra awm Av-ho chu an tiboral a, an ram chu an luah a, Gaza thlengin an neihsak ta vek a ni.)

²⁴“Moab ram kan pelh hnuin LALPA chuan, ‘Tho la, Arnon lui hi kân rawh u, Amor lal Sihona, Hesbon khaw lal chu, a ramte nên, in kutah ka pe ta a; bei ula, a ram chu chhuhsak rawh u.

²⁵Vawiin aṭang hian in hmaah vân hnuaia awm zawng zawng ka tizâm dâwn a ni, in hming mai pawh an hriatin an khûr zawih zawih ang,’ min ti a.

²⁶“Kedemot thlalêr aṭangin Hesbon lal Sihona hnênah remthu kengin palai ka tîr a.

²⁷‘I ramah kan lo kal tlang ang e, lamlianpui chauh kan zawh ang a, ding lam leh vei lamah kan pêng lo vang.

²⁸Kan ei tûr chaw leh kan in tûr tui pawh in hnên aṭangin kan lei vek ang; kan Pathian LALPA min pêk ram, Jordan râl kan thlen hma hian kan lo kal tlang ang e.

²⁹Seir rama chêng Esauva thlahte leh Ar khuaa Moab awmte hnêna kan tih ang bawk khân i ram kan kal tlang ringawt min phalsak teh khai’ ka ti a.

³⁰Hesbon lal Sihona chuan a rama kan kal tlang chu a phal lo va; kan hneha a ram kan neihsak theih nân LALPA chuan a rilru a tikhauh va, a tiluhlul a ni; tûn thlengin a ram chu kan neihsak ta rêng a.

³¹“LALPA chuan, ‘Sihona leh a ram chu i kutah ka pêk tâk che hi, a ram pawh neihsak ula, luah rawh u,’ a ti a.

³²Sihona leh a ho zawng zawngte chuan Jahaz-ah min rawn bei a.

³³Kan Pathian, LALPA chuan ani chu a fate leh a ho zawng zawngte nên min pe a, kan that vek a.

³⁴A khua zawng zawng kan la a, khuaa awmte chu a hmei a pa, a lian a te, kan tiboral vek a, tu mah kan zuah lo.

³⁵An rante erawh chu râllâk sumah kan la a, khuaa râllâk sum dangte nên kan nei a.

³⁶“Arnon luiruam chung tlânga khua Aroer aṭanga a luidunga khawpui awmte chu Gilead thlengin kan lâk theih loh rêng a awm lo, LALPA kan Pathianin min pe vek a ni.

³⁷Amon-ho ram erawh chu kan tlawh lo, Jabok lui kan kai lo; luidunga khawpuite leh tlângrama khawpuite, LALPA kan Pathianin tlawh a khapah te chuan kan kal lo.