Read Mizo Lushai Deuteronomy 20 Bible Online

Deuteronomy 20 - Mizo Lushai bible

Deuteronomy 20

¹“Indo tûra in thawh chhuahin sakawr-tawlailîr te, sakawr te leh in aia tam sipai in hmuhin in hlau tûr a ni lo. LALPA in Pathian, Aigupta ram aṭanga hruaichhuaktu che u chu in lamṭang a ni si a.

²Hmêlma bei tûra in chhuah dâwn hunah chuan puithiam lalber a lo kal ang a, mite chu a rawn fuih ang.

³‘Aw Israel-te u, hre rawh u, vawiin hian in hmêlma in do dâwn ta a, zâm suh ula, hlau hek suh u; thlaphâng suh ula, huphurh hek suh u.

⁴LALPA in Pathianin a awmpui che u a, a chhan him dâwn a che u,’ a ti ang.

⁵Mipui hotute chuan mite hnênah, ‘In thar sa, la hlân lo in awm em? A in lamah haw rawh se, indonaah a thi palh ang a, a in sak chu mi dangin an hlansak dah ang e.

⁶Grep phuna a rah la ei lo in awm em? A in lamah haw rawh se, a grep rah chu mi dangin an ei dah ang e.

⁷Nupui huala, la nei si lo in awm em? Inah haw rawh se, chutilo chuan indonaah a thi hlauh ang a, mi dangin an neihsak dah ang e,’ an ti tûr a ni.

⁸Chumi zawhah chuan sipai hotute chuan, ‘Zâm leh hlau in awm em? In awm chuan in lamah haw mai rawh u, a sipaipuite rilru a tizâm dah ang e,’ an ti ang.

⁹Sipai hotuten chutia an tih zawh hnu chuan sipai pâwl tin tân hruaitu ruat thliah tûr a ni.

¹⁰“Khawpui in beih dâwnin khuaa mite chu inpe tûrin ngên hmasa ṭhîn ang che u.

¹¹An kulh kawngkhâr an lo hawnsak che u a, in hnêna inpe an nih chuan in bawihah an awm ang a, duh duhin in chhawr thei ang.

¹²An inpêk duh lohva, indo an thlan chuan in hual tlat tûr a ni.

¹³LALPA in Pathianin khua chu a lâktîr hunah che u chuan mipa zawng zawng chu that vek ang che u.

¹⁴Hmeichhia te, naupang te, ran te leh khaw chhûnga thil dang te chu mahni tân in nei thei ang. In hmêlmate thil chu LALPA in Pathian chuan a pe tawh che u a, in duh duhin in ti thei ang.

¹⁵In luah tûr rama khawpui ni lo, ram pâwn daiha khawpuite in lâk hunah pawh chutiang chuan in sawisa tûr a ni.

¹⁶“LALPA in Pathianin in rochan atâna a pêk che u khawpuite in lâk hunah chuan, a chhûnga mi thaw thei tawh phawt chu pakhat mah zuah suh u.

¹⁷In that fai vek tûr a ni. Hit mi te, Amor mi te, Kanan mi te, Periz mi te, Hiv mi te, Jebus mi te chu LALPA in Pathian thupêk awihin that vek ang che u.

¹⁸An pathian biaknaa thil tenawm tak tak an tih ṭhinte chu an zirtîr loh nân che u, that ula, LALPA in Pathian lakah thil sual in ti dâwn lo nia.

¹⁹“Khua lâk in tum a, rei tak hual a ṭûl pawhin a vêla thei kûng chu kit suh ang che u. A rah chu in ei thei ang, a kûng erawh chu kit suh u, thingte chu in hmêlma an ni lo ve.

²⁰A rah ei theih a ni lo tih in hriat chian thing erawh chu in kit thei ang, hmêlma khua chu in lâk hma chuan in hmêlmate beihna hmanruaah in hmang thei ang.