Read Mizo Lushai Deuteronomy 21 Bible Online

Deuteronomy 21 - Mizo Lushai bible

Deuteronomy 21

¹“LALPA in Pathianin a pêk che u ram chhûngah mi ruang hmu ula, a thattu hre si lo ula,

²in hruaitute leh rorêltuten ruangin tu khua nge a hnaih ber tih an teh tûr a ni.

³A hnaih ber khaw hotute chuan bâwngla, la chhawr ngai loh, an thlang chhuak ang a.

⁴Lui kang ngai lo bulah an kai chhuk ang a, lei la leh ngai lohvah, eng mah la chînna ngai lovah bâwngla ring chu an elhtliak tûr a ni.

⁵Levia chi puithiam pawh an tel ve tûr a ni; tual thah thubuai rêng rêng hi a remtu tûr an ni si a. LALPA in Pathianin ama rawngbâwltuah leh a hminga malsâwmna sawi ṭhîntuah a ruat a ni.

⁶Tual thi ruang hnaih ber khaw upate chuan, lui kama bâwngla, a ring an elhtliah chungah chuan an kut an sil ang a,

⁷‘He mi hi kan thah a ni lo va, a thattu pawh kan hre lo.

⁸Aw LALPA, i mi Israel, Aigupta ram aṭanga i hruai chhuahte hi ngaidam teh. Ngaidam la, pawi khawih lote thisen mawh chu i mite phurhtîr suh ang che,’ an ti ang.

⁹Chutia LALPA tuk anga an tih chuan tual thah mawh chu in phur lo vang.

¹⁰“LALPA in Pathianin indona a hnehtîr che u a, mi in man ṭeuhva,

¹¹chûng zînga nula hmêlṭha in tih zâwng tak nupuia in duh in hmuh chuan

¹²hâwn ula, an lu an ziat kawlh ang a, an tin an hlep vek bawk ang a.

¹³Man laia a kawr hâk chu an thlâk ang a, in inah chuan an awm reng tawh ang, thla khat chhûng chu an nu leh pate an hmuh tawh loh tûrte chu an sûn ang. Chumi hnu chuan nupuiah in nei thei ang a, in nupui an ni tawh ang.

¹⁴Nupuia in duh loh leh chuan an duhna apiangah in kaltîr ang a, nupuia in neih tawh avângin, bawih angin in en tûr a ni tawh lo va, in hralh tûr a ni hek lo.

¹⁵“Miin nupui pahnih nei sela, fapa hrinsak ve ve sela; a nupui ngainat loh zâwka fa chu a ngainat zâwka fa ai chuan upa zâwk sela,

¹⁶a fate hnêna ro a sem dâwn hunah, a nupui ngainat zâwk fa chu, duhsakin fa u chan a pe tûr a ni lo,

¹⁷a fapa upa zâwk chu, a nupui ngainat zâwka fa ni lo mah sela, chan hnih a pe tûr a ni. Fa tîrte hi ngaih pawimawh tûr an ni a, dân ang taka an chanvo pêk tûr a ni.

¹⁸“Miin fapa luhlul, tihmawh deuh mai nei sela, a nu leh a pate chuan hrem ṭhîn mah se, sâwt si lo sela;

¹⁹a nu leh pate chuan an awmna khaw hotute ṭhu khâwm hmaah chuan an rawn hruai ang a;

²⁰upate hnênah chuan, ‘Kan fapa hi a luhlul a, mi ngawltâwt tak a ni, kan thu rêng rêng a awih duh lo va, zu leh sa ngawt a ngaihtuah mai,’ an ti ang a.

²¹Khuaa mi zawng zawng chuan lungin an dêng hlum tûr a ni; chutiang thil ṭha lo chu in zîng ata in thian fai vek tûr a ni. Israel mi zawng zawngin an hria ang a, an hlau ang.

²²“Thil eng emaw a tihsual avânga tihhlum chu thinglêra khai a nih chuan,

²³a ruang chu a zânriak tûr a ni lo, a thih ni la lain phûm tûr a ni. Chutiang mi khai hlum chu Pathian ânchhe dawng a ni a, LALPA in Pathianin a pêk che u ram hi in tibawrhbâng tûr a ni lo.