Read Mizo Lushai Deuteronomy 22 Bible Online

Deuteronomy 22 - Mizo Lushai bible

Deuteronomy 22

¹“I chipui, Israel mi bâwng emaw, berâm emaw thlun chhuak i hmuh chuan hai der suh, khalh hâwnsak rawh.

²A neitu chu khaw dang hla taka awm a nihin emaw, a neitu i hriat bawk si loh emaw chuan i inah kai haw ang che.

³A sabengtung bo i hmuhin emaw, a puan hloh i chharin emaw, thil eng pawh, i unau Israel thil hloh i hmuh chuan, chutiang chuan ti ang che.

⁴“In unau Israel bâwngpa emaw, sabengtung emaw kawnga tlu i hmuh chuan haider suh, kaihthawhpui ang che.

⁵“Hmeichhiain mipa thawmhnaw a inbel tûr a ni lo; mipain hmeichhe thawmhnaw a inbel tûr a ni hek lo; LALPA in Pathianin chutiang chu a ten a ni.

⁶“Thingah emaw, leiah emaw sava bu awp lai, a tui keu tawh emaw, keu lo emaw i hmuh chuan a pui man suh,

⁷a notê chu i la thei ang, a pui erawh chu i chhuah tûr a ni; tichuan, i tân a ṭha ang a, i dam rei bawk ang.

⁸“In i sak chuan chungzâwl khuaptu i siam tûr a ni; tichuan, tu emaw pawh tla palhin thi sela, a mawh i phur lo vang.

⁹“Grep huanah thei dang phun suh, i phun kawp chuan i grep rah pawh, i thil phun rah pawh Pathian tâna serh hran a ni ang.

¹⁰Bâwngpa leh sabengtung lei rih duntîr suh.

¹¹La leh sahmul kaih pawlh kawr ha suh.

¹²I puan sin kil li-ah pehbuk siam ṭhîn ang che.

¹³“Miin nupui a nei a, nakin deuhvah chuan a ning ta a.

¹⁴Dâwt phuahchawpin thil ṭha lo pui pui a puh a, ‘nula thianghlim a nihna pawh ka hmu lo’ tiin a timualpho va.

¹⁵Chutiang thilah chuan hmeichhe nu leh pate chuan an induh zâna an âwngphah thisen kai chu nula thianghlim ngei a ni tih fiah nân khaw upate hnênah an thlen tûr a ni.

¹⁶Hmeichhe pa chuan upate hnênah, ‘He mi hi ka fanu ka neihtîr a, a duh leh ta si lo va.

¹⁷Dâwtin thil ṭha lo pui pui a puh a, ‘ka neih khân nula thianghlim a lo ni lo’ te a ti a. Kan fanu hi nula thianghlim ngei a ni tih fiah nân hei, an induh zâna an âwngphah thisen kai hi en teh u,’ a ti ang a; upaho hmaah chuan a phawrh ang.

¹⁸Khaw upate chuan chu pa chu an vua ang.

¹⁹Israel nula thianghlim hming a tihchhiat avângin tangkaraw tlang za an chawitîr ang a, hmeichhe pa hnênah chuan an pe ang, a nupui a ni reng ang a, a dam chhûng chuan a ma thei lo vang.

²⁰Chu pa chuan thu dik a sawi a, nula thianghlim a nihna fiahna a awm loh chuan,

²¹a pa kawtah an hruai ang a, khuaa mite chuan lungin an dêng hlum tûr a ni. Israel mite zîngah thil tenawm tak a ti a ni, a pa ina a la awm lai, pasal a la neih hmain tlangvâl a lo nei a ni. Chutiang chuan Israel zîngah thil ṭha lo in thian fai tûr a ni.

²²Mi dang nupui mutpuitu chu a hmeichhia nên an pahnihin tihhlum tûr an ni. Chutiang chuan Israel zîngah thil ṭha lo in thian fai tûr a ni.

²³“Nula thianghlim, pasal hual nei chu, khaw chhûngah miin a lo mutpui chuan,

²⁴an pahnih chuan khaw kulh kawngka bulah in hruai ang a, lungin in dêng hlum tûr a ni; hmeichhia chu khaw chhûnga awm siin a au lo va, mipa pawh chu mi nupui hual a lo mutpui avângin den hlum tûr a ni.

²⁵“Nula thianghlim pasal hual nei, ram hnuaiah miin lo sual sela, a mipa chauh chu den hlum tûr a ni.

²⁶Hmeichhe chungah chuan kutthlâk tûr a ni lo, thihna khawp eng mah thil sual a ti lo; mi pakhatin mi dang a bei a, a that ta mai ang hi a ni.

²⁷A mipa khân mi nupui hual ramhnuaiah a sual lui a, a hmeichhia chu au mah se tu mah chhan tûr an awm lo va ni.

²⁸“Miin nula thianghlim, pasal hual la nei lo, sual sela,

²⁹mipa chuan hmeichhe pa hnênah nupui man pangngai tangkaraw tlang sawmnga a pe tûr a ni; a sual lui a, a nupui a ni nghâl ang. A dam chhûngin a ma thei lo vang.

³⁰“Tu man, mahni pa nupuite zînga mi mutpuiin a pa chu a timualpho tûr a ni lo.