Read Mizo Lushai Deuteronomy 23 Bible Online

Deuteronomy 23 - Mizo Lushai bible

Deuteronomy 23

¹“Tilmu keh emaw, zahmawh tan emaw chu LALPA mite pung khâwm zîngah an tel ve tûr a ni lo.

²Sâwn chu LALPA mite pung khâwm zîngah an tel tûr a ni lo, a thlah, chhuan sâwmna pawh LALPA mite pung khâwm zîngah an tel thei lo vang.

³“Amon mite leh Moab mite chu LALPA mite pung khâwm zîngah an tel tûr a ni lo; an mite chu chhuan sâwm pawh ral mah se, LALPA mite pung khâwm zîngah an tel hauh tûr a ni lo.

⁴Aigupta ram ata in lo chhuah khân ei tûr leh tuisik takngial pawh kengin an lo hmuak duh lo che u a; Mesopotamia ram, Pethor khaw mi Beora fapa Balaama kha ânchhe lawh tûr che uin an ruai zâwk a nih kha.

⁵LALPA in Pathian chuan Balaama thu chu a bengkhawn duh lo va, LALPA in Pathian hian a hmangaih êm che u avângin a ânchhia chu malsâwmnaah a chantîr ta hlauh va;

⁶chuvângin, eng lai mahin anni nên hian inremna siam suh ula, an hmuingîlna tûr pawh in dam chhûng chu eng mah tihsak suh u.

⁷“Edom mite chu in ten tûr a ni lo, in unaute an ni; Aigupta mi pawh in ten tûr a ni lo, an ramah an lo mikhual che u kha.

⁸An fa chhuan thumnate chu LALPA mite pung khâwm zîngah an tel ve thei tawh ang.

⁹“Hmêlma do tûra in thawh chhuah a, bûka in riah khâwm chuan, thil ṭha lo tinrêng lakah in inthiarfihlîm tûr a ni.

¹⁰In muthilh hlânin in zînga mi tu pawh, a chi tla sela, riahhmun pâwnah nilêngin a awm tûr a ni; bûkah a lo lût tûr a ni lo.

¹¹Tlaiah a inbual ang a, ni a tlâk chuan bûkah a lo lût leh thei tawh ang.

¹²“Riahhmun pâwnah daikalna tûr hmun bîk in nei tûr a ni.

¹³Thil zum in keng ang a, chu chuan lei in cho khuar ang a, in vûr leh tûr a ni.

¹⁴“In bûkah chuan vêng tûr che u leh in hmêlmate hnehtîr tûr che uin LALPA in Pathian chu a lo kal ve ṭhin avângin in bûk chu in vawng thianghlim tûr a ni, thil tenawm a hmuh hlauh chuan a kalsan mai ang che u.

¹⁵“A pu hnên ata bawih tlân bo chu in hnêna a lo tlân luh chuan tîr kîr suh u.

¹⁶In zîngah chuan awm ve sela, in khaw pakhat, a duhna berah awm ve rawh se, tinawmnah suh u.

¹⁷“Israel mi tu mah, mipa pawh, hmeichhia pawh, Tempula nawhchizuarah an ṭang tûr a ni lo.

¹⁸Mipa pawh, hmeichhia pawh, an inzawrh hlawh chu intiamkam tlâkna atân LALPA in Pathian inah ken luh tûr a ni lo; chutiang mite chu LALPA in Pathian tenzâwng tak an ni.

¹⁹“In unau Israel-te hnênah tangka te, buh te leh thil dang rêng rêng, a pung neiin in pûktîr tûr a ni lo.

²⁰Hnam dang chu a pung i ṭhîng thei ang, in unau Israel-te erawh chu a pung in ṭhîng tûr a ni lo; tichuan, LALPA in Pathianin a pêk tûr che u ramah in awm hunin in thil tih apiangah in hmuingîl thei ang.

²¹“LALPA in Pathian hnêna pêk in tiam tawh chuan, muang lovin pe thuai rawh u. LALPA in Pathian chuan in tiam anga in tih a phût dâwn si a; chutilo chuan, thil sual ti in lo ni mai ang.

²²Thil pe tûra intiam loh hi sual a ni lo,

²³in tiam vêk vêk si chuan in hlen ngei ngei tûr a ni.

²⁴“Mi grep huana in kalin in duh tâwk in ei thei ang; amaherawhchu, pakhat mah in êmah in khung tûr a ni lo.

²⁵Mi buh ding lai lova in kalin an buh vui chu duh tâwk in thliak thei ang; amaherawhchu, favahin in hlep tûr a ni lo.