Read Mizo Lushai Deuteronomy 24 Bible Online

Deuteronomy 24 - Mizo Lushai bible

Deuteronomy 24

¹“Miin nupui nei sela, nakin deuhvah a duh loh zâwng thil eng emaw a hmuh avângin duh leh ta lo sela, inmâkna lehkha a ziak ang a, a pe ang a, a in ata a chhuahtîr ang.

²Chu hmeichhia chuan pasal dang nei leh sela,

³chu mi pawh chuan duh lo leh ta se, inmâkna lehkha ziaksakin a in ata chhuahtîr ve leh sela; a nih loh leh, a pasal pahnihna chu a sûn pawh a ni thei;

⁴a enga pawh chu ni se, a pasal hmasa khân a nei leh tûr a ni lo; tihbawrhbânah a ngai tûr a ni; chutiang chu LALPA tenzâwng tak a ni a, LALPA in Pathianin a pêk che u ramah chutiang thil ṭha lo chu in ti tûr a ni lo.

⁵“Nupui nei hlim chu indonaah a kal ve tûr a ni lo, vântlâng hnaah pawh phût tûr a ni lo; kum khat chhûng chu a nupui nên hlim takin an awm dûn tûr a ni.

⁶“Tu man chhangphut râwtna lung emaw, a chung zâwk chauh emaw pawh, thil pûk dahkhamah hrênsak suh u, an chhûng eizawnna in lâksak tihna a ni.

⁷“Israel miin Israel mi dang ruin bawihah chhawr sela emaw, salah emaw a hralh chuan chu mi chu tihhlum tûr a ni; chutiang chuan in zînga thil ṭha lo chu in thian fai tûr a ni.

⁸“Phâr natna in vei chuan Levia chi puithiamin tih tûr a tih chu ngun takin ti ula, an hnêna ka hrilh ang khân ti ang che u.

⁹Aigupta ram aṭanga in lo chhuah kawngah Miriami chunga LALPA in Pathian thiltih kha hre reng rawh u.

¹⁰“I ṭhenawm thil i pûktîrin a dahkham tûr, a in aṭangin va la suh,

¹¹pâwnah i ding ang a, i thil pûktu chuan a dahkham tûr chu a rawn la chhuak tûr a ni.

¹²Mi rethei tak a nih chuan a puan dahkham chu mut nân hmansak suh.

¹³Ni a tlâk chuan i kîr leh tûr a ni; ama puan ngei chuan a intuam lum ang a, i chungah a lâwm bawk ang; LALPA, in Pathian chuan thil ṭha ti-ah a lo pawmsak ang che.

¹⁴“Mi rethei leh pachhia chu, nangmahni chipui a ni emaw, in khaw chhûnga awm ve hnam dang a ni emaw hna thawka in chhawr chuan tinawmnah suh ang che u;

¹⁵a tlâkbal êm avângin a hlawh chu a nî la lain, ni tlâk hma ngeiin in pe tûr a ni. In laka vuiin LALPA hnênah a thlen hlauh ang a, thil sual ti in ni mai ang.

¹⁶“An fate sualna avângin pate chu tihhlum tûr a ni lo; pate sualna avângin an fate pawh tihhlum tûr a ni hek lo; mi chu ama sualna avâng chauhvin tihhlum tûr a ni.

¹⁷In zînga awm ve hnam dang emaw, fahrah emaw chanvo chu tihheusak suh. Hmeithai puan chu dahkhamah lâksak suh.

¹⁸Aigupta ramah nangni pawh bawih in nih kha hre reng rawh u; LALPA in Pathianin a tlan chhuak che u a nih kha; chuvângin, hêng thu hi ka pe che u a ni.

¹⁹“Buh in sengin buhphal lâk hmaih in neih chuan vai leh tawh suh u; hnam dang te, fahrah te leh hmeithai te chan ve tûr a ni; tichuan, LALPA in Pathian chuan in kutkawih zawng zawngah mal a sâwm ang che u.

²⁰In oliv rah, duh tâwka in sâwi ṭilh hnu chuan sawi ṭilh tum leh tawh suh u; hnam dang te, fahrah te leh hmeithai te tân khêk rawh u.

²¹In grep rah in lawh pawhin in lawh hmaih chu vai leh tawh suh u, hnam dang te, fahrah te leh hmeithai te tân zuah rawh u.

²²Aigupta ramah bawih in nih kha hre reng rawh u; chuvângin, hêng thu hi ka pe che u a ni.