Read Mizo Lushai Deuteronomy 25 Bible Online

Deuteronomy 25 - Mizo Lushai bible

Deuteronomy 25

¹“Israel mi, thubuai nei, rorêltu hmaa an inkhin chuan, pakhat zâwk chuan thiam a chang ang a, pakhat zâwk chuan a chang lo vang.

²Thiam chang lo chu vuaka hrem tûr a nih chuan rorêltu chuan a hmuh ngeiah a thil sual tih phu tâwk a vuaktîr tûr a ni.

³Vawi sawmli chin vuak theih a ni, a aia tam chu vuak tûr a ni lo; a aia tam in vuak chuan in unau chu in hmusit a ni.

⁴“Bâwngpa buh i chîltîr laiin a hmui chu phuar suh.

⁵“Unauza chhûng khatah awm ho sela, pakhat chu fapa nei lovin thi sela, a nupui chu an chhûngkaw zînga mi ni lo, mi dang neihtîr tûr a ni lo. A pasala unau tu emaw chuan nupuiah a nei ang a, a unau thi ta ai kha a awh ang.

⁶Fapa an neih hmasak ber chu a unaupa thi ta fapa anga ngaih tûr a ni ang a, Israel inthlah chhâwng hming chhiarnaah te a hming chu a bo bîk tûr a ni lo.

⁷Thi ta-a unaupain a neih duh loh chuan, khaw hotute hnênah hmeichhia chu a kal ang a, ‘Ka pasala unau hian unaupa tih tûr, a unau thi ta thlah, Israel zînga an mang loh nân chi a thlahsak duh lo,’ a ti tûr a ni.

⁸Khaw upate chuan an ko ang a, an lo sawipui ang a; a la duh chuan loh chuan,

⁹khaw hotute hmaah a pheikhawk pakhat chu hmeichhia chuan a hlihsak ang a, ‘Mahni unau chi thlahsak duh lo chu hetianga tih a ni ang’ a ti ang a, a hmaiah chil a chhâk tûr a ni.

¹⁰“Chu mi thlahte chu Israel zîngah, ‘Pheikhawk hlihsak chhûng’ an ti ang.

¹¹“Pa pahnih insual sela, pakhat nupui chuan a pasal chhan tumin a sualpuipa zahmawh pawhsak sela,

¹²chu hmeichhia chu khawngaih hauh lovin a kut tansak tûr a ni.

¹³“Bâwmah bûklung rit deuh leh zâng deuh kawl kawp suh.

¹⁴Tehna no lian deuh leh tê deuh pawh nei kawp suh.

¹⁵Bûklung dik tak, tehna no dik tak in hmang tûr a ni; tichuan, LALPA in Pathianin ram a pêk che u-ah hian in dam rei ang.

¹⁶Chutianga thil dik lo tia mi bum chîngte chu LALPA tenzâwng tak an ni.

¹⁷“Aigupta ram aṭanga in lo chhuaha, kawnga in awm laia Amalek-ho thil tih dân kha hre reng rawh u.

¹⁸Pathian ṭihna rêng an nei lovin, in kal hah lai leh in chauh lai khân hnung lam aṭangin an rawn bei che u a; in zînga chau zual, hnufual deuhte chu an thah vek kha.

¹⁹Chuvângin, LALPA in Pathianin ram a pêk che u-ah in hmêlmate laka râlmuang taka a awmtîr hunah che u chuan Amalek-ho hi in that fai vek tûr a ni, vân hnuaiah an sûlhnu hmuh tûr pakhat mah in zuah tûr a ni lo. Theihnghilh rêng rêng suh u.