Read Mizo Lushai Deuteronomy 26 Bible Online

Deuteronomy 26 - Mizo Lushai bible

Deuteronomy 26

¹“LALPA in Pathianin ram a pêk tûr che u in va thlen a, in hneha, awmhmun in benbel hunah,

²LALPA in Pathianin ram a pêk che u a thil in thar hmasak ṭhenkhat chu êmah in dah ang a, LALPA in Pathian hming awmna tûra a hmun thlanah chuan keng ang che u.

³Chuta puithiam lo awm hnênah chuan, ‘Kan pate hnêna LALPA ram pêk tiam chu kan va luah ta tih vawiinah hian LALPA i Pathian hmaah ka puang e,’ i ti tûr a ni.

⁴Puithiam chuan êm chu a la ang a, LALPA in Pathian maichâm hmaah chuan a hûng ang.

⁵“LALPA in Pathian hnênah hetiang hian in sawi bawk tûr a ni: ‘Ka pa chu mi vâkvai, Aram mi a ni a. Aigupta ramah a chhuk a, tah chuan a awm ta a; an la tlêm hle a; mahse, chutah chuan hnam ropui tak, chak tak leh rual tak an ni ta a.

⁶Aigupta mite chuan bawihah min siam a, min tinawmnah a, min chhawr rethei êm êm a.

⁷LALPA, kan pate Pathian chu kan au ta a, LALPA chuan a lo ngaithla a, min tihretheihzia te, kan rimzia te, min tihduhdahzia te chu a hmu a.

⁸LALPA chuan Aigupta ram ata chu, a bân tha chak hmangin, thil mak leh chhinchhiahna râpthlâk tak tak a ti a, min hruai chhuak ta a,

⁹khawizu leh hnutetui luanna ram hi min pe ta a.

¹⁰Aw LALPA i ram min pêka thar hmasa ber chu, hei, ka rawn kensak a che,’ i ti ang a; LALPA i Pathian hmaah chuan i dah ang a, a hmaah chuan i kûn tûr a ni.

¹¹LALPA, in Pathianin thil ṭha, nang leh i chhûngte a pêk avângin lâwmthu sawi la, in zînga awm leh Levia chiten lâwm takin in zâr zo rawh se.

¹²“A kum thumnaah in thlai thar sâwma pakhat chu, in zînga awm Levia chi te, hnam dang te, fahrah te leh hmeithai te pe ang che u; tichuan, khaw tinah ei tûr an nei ṭheuh dâwn nia.

¹³Chutia in tih hnu chuan, ‘Thil serh, sâwma pakhat chu, ka inah tûnah pakhat mah ka kawl tawh lo; thu min pêk angin Levia chi te, hnam dang te, fahrah te, hmeithai te hnênah ka pe tawh a ni; sâwma pakhat pêk chungchânga i thupêk zawng zawng zawm loh rêng ka nei lo va, theihnghilh ka nei hek lo.

¹⁴Lusûn laiin pakhat mah ka ei lo va, mitthi chaw atân pakhat mah ka hlân hek lo; aw LALPA, i thu ka awih a, sâwma pakhat pêk chungchânga i thupêk zawng zawng chu ka ti ta vek a ni.

¹⁵I vân hmun thianghlim aṭang chuan han thlîr thla la, i mi Israel-te hi mal han sâwm ang che. Min thlahtute hnêna pêk i tiam tawh ram, khawizu leh hnutetui luanna ram hi malsâwm ang che,’ in ti tûr a ni.

¹⁶“Vawiin hian LALPA in Pathian chuan hêng thuruatte leh awm dân tûrte hi zâwm tûrin a tih che u hi. Rilru zawng zawngin, tihtakzetin zâwm rawh u.

¹⁷Vawiin hian LALPA chu Pathianah in pawm ta a, a thuruat te, a thupêk leh awm dân tûr a tih te chu zâwma tih in tiam a.

¹⁸Vawiin hian LALPA chuan a tiam angin a mi atân a pawm ta tak tak che u a ni.

¹⁹A siam, hnam dang zawng zawng aiin a tiropui che uin, fak in hlawh ang a, in hming a thang bawk ang a, miin an chawimawi ang che u, a tiam ang ngeiin LALPA in Pathian tân hnam thianghlim in ni ang” a ti a.