Read Mizo Lushai Deuteronomy 27 Bible Online

Deuteronomy 27 - Mizo Lushai bible

Deuteronomy 27

¹Mosia chuan Israel upate nên mite hnênah, “Vawiina thupêk ka hrilh zawng zawng che u hi zâwm vek ang che u.

²Jordan lui in kân a, LALPA, in Pathianin ram a pêk che u in va luh hunahin chuan lung hlai tak tak phun ang che u; chinaiin zût mâm ula;

³tah chuan, hêng Dân zawng zawng hi ziak ang che u. LALPA in Pathianin pêk a tiam che u, khawizu leh hnutetui luanna ram chu in luh a,

⁴Jordan thlang lam rala in awm hunah vawiina ka hrilh che u ang hian Ebal tlângah lung pathum phun ula, chinaiin zût mâm ang che u.

⁵Thîra chher loh lungin maichâm siam ang che u.

⁶LALPA in Pathian tâna maichâm in siam rêng rêngin lung chher loh hman tûr a ni; chutah ngei chuan hâlral thilhlan chu in hâl tûr a ni,

⁷Remna thilhlan pawh chutah chuan in hlân ang a, in ei tûr a ni, LALPA hmaah chuan hlim takin awm ang che u.

⁸Lungphunah chuan hêng Dân thute hi in ziak tûr a ni,” a ti a.

⁹Mosia chuan Levia thlah puithiamte nên Israel mi zawng zawng hnênah, “Aw, Israel-te u, in beng chhi ula, ka thu hi ngaithla teh u. Vawiin hian in Pathian, LALPA mite in nih tâk hi.

¹⁰A thu awih ula, a thuruat, vawiina ka hrilh zawng zawng che u hi zâwm rawh u,” a ti a.

¹¹Mosia chuan Israel-te chu thu a pe a:

¹²“Jordan lui kai hnuah chuan mipuite malsâwm tûrin hêng hnam - Simeon-ho te, Levia chi te, Juda-ho te, Isakar-ho te leh Benjamin-ho te hi Gerizim tlângah an ding ang a;

¹³ânchhia puang chhuak tûrin hêng hnam: Reuben-ho te, Gad-ho te, Aser-ho te, Zebulun-ho te, Dan-ho leh Naftali-ho te hi Ebal tlângah an ding tûr a ni.

¹⁴Hêng thu hi Levia chite chuan ring takin an sawi tûr a ni:

¹⁵‘Themthiam kut chhuak LALPA tenzâwng milem chher chawp emaw, chhûn chawp emaw kawl ru a, chibai bûktu chuan ânchhia dawng rawh se,’ an ti ang a. Mipui zawng zawngin, ‘Amen’ tiin an lo chhâng ang.

¹⁶‘A nu emaw, a pa emaw, zah lo chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

¹⁷‘Ṭhenawmte ramri lung sawntu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

¹⁸‘Kawng ni lova mitdel kaltîrtu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

¹⁹‘Hnam dang te, fahrah te leh hmeithai te laka hleih neih chîng chuan ânchhia dawng rawh se,’ an ti ang a. Mipui zawng zawng chuan, ‘Amen’ tiin an lo chhâng ang.

²⁰‘Mahni pa nupuite zînga mi lo mutpui a, pate timualphotu chuan ânchhia dawng rawh se,’ an ti ang a. Mipui zawng zawng chuan, ‘Amen’ tiin an lo chhâng ang.

²¹‘Ran pâwltu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

²²‘Nu hrang emaw, pa hrang emaw pawh ni se, mahni farnu sualtu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

²³‘Mahni pizawn mutpuitu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

²⁴‘A rûka tualthattu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

²⁵‘Pawi khawih lo that tûra thamna latu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.

²⁶‘Hêng Dânte hi pawm ṭha duh lova, zâwm duh lotu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang.