Read Mizo Lushai Deuteronomy 28 Bible Online

Deuteronomy 28 - Mizo Lushai bible

Deuteronomy 28

¹“LALPA in Pathian thu hi in awih a, a thupêk vawiina ka hrilh zawng zawng che u hi in zawm thlap chuan khawvêla hnam dang zawng zawng aia ropuiin a siam ang che u.

²LALPA, in Pathian thu chu awih phawt ula, hêng malsâwmna zawng zawng hi in dawng ang a, in dawng zui zêl ang.

³In lam leh ram lamah Pathianin mal a sâwm ang che u.

⁴“Fanau malsâwmna in dawng ang a, in buhbâl a tihlâwk ang a, in ran vulhte a tihhmuingîlsak ang che u.

⁵“Pathianin in êm te, in chawthlêng te mal a sâwm ang.

⁶“In thiltih apiangah a tihmuingîl ang che u.

⁷“In hmêlmate nêna in inbeihin LALPA chuan a hnehtîr ang che u; a huhovin rawn bei che u mah sela, kil tinah an tlânchhia ang a, an darh vek ang.

⁸“LALPA in Pathian chuan in hnathawh apiang mal a sâwm ang a, in buh inte a tikhat ang a, LALPA in Pathianin ram a pêk che u chu a tihhlâwksak ang che u.

⁹“LALPA in Pathian thu hi in awih a, a thupêkte in zawm takzet chuan a tiam angin ama pual, a mi thianghlim atân a tinghet ang che u.

¹⁰Khawvêla mi zawng zawngin LALPA mi thlante in ni tih an hria ang a, an hlau ang che u.

¹¹In pate hnêna pêk a tiam ramah LALPA chuan fa te, ran rual te, buhbâl te a neihtîr ṭeuh ṭeuh ang che u.

¹²LALPA chuan a robâwm ata a hun takah ruah a rawn sûrtîr ang a, in thiltih mal a sâwm ang a, hnam tinrêng in thil neih in pûktîr ang a; an thil erawh chu in pûk a ngai ve lo vang.

¹³LALPA in Pathian chuan hnam dangte zuitu ni lovin, an hruaituah a siam ang che u; a thupêk vawiina ka pêk che u hi rinawm taka in zawm phawt chuan in lo hmuingîl ang a, in hlawhchham ngai lo vang.

¹⁴Engti kawng mahin in bawhchhe tûr a ni lo va, pathian dangte biain an rawng in bâwl tûr a ni hek lo.

¹⁵“LALPA in Pathian thu in awih lohva, a thupêkte leh a thuruatte vawiina ka hrilh che u hi in zawm duh lohva, in tih duh hek loh chuan hêng thil ṭha lo hi in chungah a thleng ang:

¹⁶“In lam leh ram lamah chhiatna in tâwk ang.

¹⁷“LALPA chuan in êm leh in chawthlêng a leihbuaksak ang che u.

¹⁸“LALPA chuan ânchhia a lawh ang chia, fa thu-ah te, buhbâl thu-ah te, ran vulh thu-ah te in hmuingîl lo vang.

¹⁹“In thiltih apiangah in hlawhchham ang.

²⁰“Thil in tihsual a LALPA in kalsan chuan ânchhia in dawng ang a, in hnathawh rêng rêngah in hmuingîl lo vang a, in buaiin in beidawng ang a, rang takin in chhe vek ang.

²¹“In ram neih tûrah chuan vânduaina hlîrin a tlâkbuak ang che u a, dam khawchhuak tu mah in awm lo vang.

²²LALPA chuan hri a veitîr ang che u a, khawsikpui te in vei ang a, in vûng bawk ang. Khua a tikhêng ang a, in thlai te a tiro bawk ang a, in thi mai ang.

²³Ruah rêng a sûr lo vang a, in lote chu thîr angin a châr ang.

²⁴In lovah lei dip leh vaivut a sûrtîr ang a, a rawn tichhe vek ang che u.

²⁵“LALPA chuan in hmêlmate chu hnehtu zâwkah a ṭantîr ang a, a huhovin bei mah ula, kil tinah in tlânchhia ang a, in darh vek ang. Khawvêla mi zawng zawngin in chunga thil thleng chu râpthlâk an ti ang.

²⁶In thih hunah in sa chu sava leh ramsaten an rawn tlân ang a, tu mah lo hnawttu an awm lo vang.

²⁷Aigupta-ho vei ang dam thei lo khawihli te, ngâwt te, pânchhia te, uithak te LALPA chuan a veitîr ang che u.

²⁸LALPA chuan a ti-â ang che u a, in mit a tidel ang a, a timangang hle ang che u.

²⁹Mitdel angin chhûn êngah pawh in dap dun dun ang; in thil tih rêng rêngah in hmuingîl lo vang a, an tirethei hle ang che u, an tichêp hle ang che u; an rawk fo ang che u a, chhantu rêng in nei lo vang.

³⁰“Nupui in hual ang a, mi dangin an nei hlauh vang; in in sa ang a, in luah lo vang; grep huan in siam ang a, a rah in ei lo vang.

³¹In bâwngpa chu an talh ang a, a sa pawh in ei ve lo vang; in hmuh lai ngeiin in sabengtung chu an lâksak ang che u, tu man an chhan lo vang che u.

³²In fanu in fapate chu in hmuh lai ngeiin hnam dang bawihah an pe ang a; ni tin anmahni ngaiin in thlîr ang a, in mit a vai zo vang.

³³Hah taka in thlawh chhuah chu in hriat ngai loh hnam dangin an rawn lâksak ang che u; a manah tihduhdah leh chêksawlh mai lo chu eng mah in têl lo vang.

³⁴In thil hmuhte chu in ât phah ang.

³⁵LALPA chuan in ke-ah pân dam thei lo a veitîr ang che u a, kephah aṭanga in chhîp thlengin khawihli in vei ang.

³⁶“LALPA chuan in lalte nên, hnam dang ram, in pi pute la awm ngai lohna ramah chuan salah a hruai ang che u; chûng ramah chuan thing leh lunga siam pathiante in bia ang.

³⁷LALPA tihdarhna che u ramah chuan a hmu apiang che u chuan in chunga thil thleng chu mak an ti ang a, an hmusit ang che u a, nuihza siam nân an hmang ang che u.

³⁸“Thlai chi in chîng ṭeuh ang a, tlêm tê chauh in seng si ang; khauvin a ei zawhsak ang che u.

³⁹Grep huan in siam duai ang a, ngun takin in enkawl ang a; mahse, a rah lawh tûr emaw, uain in tûr emaw in hmu lo vang a, a ngêt zo vek ang.

⁴⁰In ram pumah oliv thing awm chûk mah se, a hriak thih tûr pawh in nei lo vang, a hlamtla zo vek ang.

⁴¹Fanu fapa in ngah hle ang a, an tha in chhawr si lo vang, salah an awm vek ang.

⁴²In thei kûng leh thlai dangte chu khauvin a ei kawlh vek ang.

⁴³“In zînga hnam dang awm vete chu an lal tual tual ang a, nangni chan erawh chu a chau tial tial ang.

⁴⁴Tangka an pûktîr ang che u a, nangni chuan pûktîr tûr tangka in nei ve lo vang. A tâwpah chuan in pute an la ni ang.

⁴⁵“LALPA in Pathian thu in awih lohva, a thupêk leh a thuruat an hrilh che u kha in zawm lohva, in tih duh loh chuan hêng thil ṭha lo zawng zawng hian a tlâkbuak ang che u, in tuar zêl ang.

⁴⁶In chungah leh in fate chungah Pathian a lungawi lo tih in hriat theih nân chhinchhiahna a ni ang;

⁴⁷malsâwmna tinrêngin a vûr che u a, hlim leh lâwm taka LALPA, in Pathian rawng chu bâwl tûr in ni asin.

⁴⁸Rilṭâm leh tuihâlin, saruak leh engkim tlachhamin LALPA tirh, in hmêlmate rawng chu in bâwl ang a, in chauh dêr thlengin in nghâwngah thîr nghâwngkawl an bahtîr ang che u.

⁴⁹“An ṭawng pawh in hriat ngai loh mi râwng pui pui, kâwlkil aṭangin LALPA chuan a rawn beihtîr ang che u, mu angin an lo bir thut ang.

⁵⁰Naupang pawh, tar pawh, tu mah rêng an khawngaih lo vang.

⁵¹In ran te, in thlaite an ei zo vang a, rilṭâmin in thi ang; in buh te, in uain te, in oliv hriak te, in ran te an zuah lo vang; rilṭâmin in thi ang.

⁵²LALPA in Pathianin a pêk tûr che u rama in chênna khua zawng zawng an bei ang a, in kulh sâng tak tak, nghet in tih êm êmte chu an tichim vek ang.

⁵³“In hmêlmaten in kulhte an hual hunah chuan in ril a ṭâm khawp ang a, LALPA in Pathianin a pêk che u in fate sa in ei ang.

⁵⁴Mi ṭha leh mi neinung ber ṭhîn, eng mah ren nei ngai lo chuan a unaupa emaw, a nupui pawm lai ngei emaw, a fa la dam chhunte emaw pawh ei tûr pe phal lovin a rûkin a ei duh ang a;

⁵⁵hmêlmaten in khua an hual rei êm avângin ei tûr a nei lo mangangin a fate sa ngei a ei ang a, mi dang a pe ve phal lo vang.

⁵⁶Hausanu, lei pawh rap ngai lo, ngilnei tak tak ṭhînte pawhin an pasalte, an fanu leh fapate hriat lohvin a rûkin an ei ang.

⁵⁷Hmêlmaten an hual rei êm avângin eng mah ei tûr a awm tawh lo vang a, an rilṭâm mangangin an nau hrin leh an chhûl chu a rûkin an ei ang.

⁵⁸“He lehkhabua ziak Dân thu chuang zawng zawng hi ṭha taka in zawm lohva, in tih duh lohva, LALPA hming ropui tak leh hlauhawm tak hi in chawimawi duh loh chuan,

⁵⁹in thlahte nên tihdam theih loh hri a veitîr ang che u a, in pûl puk puk ang.

⁶⁰Aigupta rama an vei ang hri hlauhawm tak tak in hmuh kha a veitîr ang che u a, in dam khawchhuak tawh lo vang.

⁶¹He Dân lehkhabua chuang tel lo, natna chi hrang hrang LALPA chuan a veitîr bawk ang che u.

⁶²LALPA, in Pathian thu in zawm loh chuan vâna arsi zâtin tam mah ula, dam chhuak in awm pheuh pheuh lek ang.

⁶³LALPA chuan thil ṭha tihsak che u leh tihpunsak che u a châk ṭhîn; chutiang bawkin tihchhiata tihhlum che u a châk dâwn a ni. In luah tûr ram aṭang hian a la chhuak dâwn a che u.

⁶⁴“LALPA chuan khawvêl pum puiah, hnam tin zîngah a tidarh ang che u; chûngah chuan thinga siam leh lunga siam pathiante chibai in bûk ang a, in pi pute pawhin an biak ngai lohte chu in be dâwn a ni.

⁶⁵Khawiah mah râlmuang taka awm hle hle theihna hmun in nei lo vang. LALPA chuan a tithlaphâng reng ang che u a, in beidawngin in beisei a bo hial ang.

⁶⁶Thih hlau rêng rêngin in awm ang a, a chhun a zânin thlabâr takin in awm ang a, in dam khawchhuak dâwn nge dâwn lo pawh in hre lo vang.

⁶⁷In thil hlauh leh in mita hlauhawm in hmuhte avâng chuan zîngah, ‘Tlai ni tawh se,’ in ti ang a, zânah chuan, ‘Khua vâr tawh mai se,’ in ti ang.

⁶⁸LALPA chuan Aigupta ramah lawngin a tawlh thla ang che u; in chhuk leh tawh lo vang, ka ti na a; mahse, in chhuk ang a, in hmêlmate lei tûrin bawihpa emaw, bawihnu atân emaw in inzuar ang a; mahse, tu man an lei duh lo vang che u.”