Read Mizo Lushai Deuteronomy 29 Bible Online

Deuteronomy 29 - Mizo Lushai bible

Deuteronomy 29

¹ LALPA chuan Mosia hnênah Israel-te nên Moab ramah hetianga thu thlung tûr hian a hrilh a; Horeb tlânga a thuthlung belhchhahna a ni.

²Mosia chuan Israel mi zawng zawng chu pung khâwm tûrin a hrilh a, an hnênah, “In mit ngeiin Aigupta lal Farawa leh a ṭhuihruaite leh an ram chhûnga LALPA thiltih kha in hmu a.

³Hri hlauhawm pui pui te, thil mak tak takte leh thil ropui tak tak a tihte kha in hmu a.

⁴Vawiin thlengin in thil hmuhte kha a ngaihna in hre lo va, a awmzia tak in la hre hek lo.

⁵Kum sawmli chhûng LALPA chuan thlalêrah a vahvaihtîr che u a; mahse, in kawrte leh in pheikhawkte chu a hlui chuang lo va.

⁶Chaw pângngai ei tûr nei lovin, uain leh zu in tûr pawh in nei lo va; mahse, LALPA chuan ei tûr a tumsak che u a ni; LALPA hi in Pathian chu a ni tih in zir theih nân.

⁷He hmun in lo thlen khân Hesbon lal Sihona leh Basan lal Oga chuan min lo bei a, kan hneh a;

⁸an ram pawh kan neihsak a; Reubena thlah te, Gada thlah te leh Manasea thlah zatve te chu an chanpualah kan pe a.

⁹Chuvângin, he thuthlung thute hi zâwm ula, in thil tih apianga in hmuingîl theih nân ti rawh u.

¹⁰“Vawiin hian LALPA in Pathian hmaah in hruaitu te, in hotu te, in mipa te,

¹¹in hmeichhia te, in fa te, in zînga awm ve hnam dang te, thing phura tuichawisaktu che u te nên in vaiin in ding a nih hi.

¹²Vawiin hian LALPA in Pathian chuan thu a thlunpui dâwn che u a ni;

¹³tichuan, Abrahama te, Isaka te, Jakoba te hnêna thu a tiam angin a mite atân a tinghet ang che u a, in Pathian a ni bawk ang.

¹⁴“Nangni nên chauh he thuthlung hi a siam a ni lo.

¹⁵Vawiina heta dingte tân mai ni lovin kan thlah lo la piang tûrte tân pawh he thuthlung hi a siam a ni.

¹⁶“Aigupta rama kan awm laia kan nun dân kha in hria e, kan lo chhuah kawnga hnam dang lo awmte khawsak dân te in hria,

¹⁷thingtum te, lungtum te, tangkarua leh rangkachaka siam milem tenawm tak tak te an bia a,

¹⁸mipa pawh, hmeichhia pawh, chhûngkua emaw, hnam pum emaw pawhin, LALPA kan Pathian hawisanin hêng hnam dang pathiante hi in be hlauh dah ang e, thil zung chawr, tûr kha tak paia ṭhang lian ta ang hi a ni ang.

¹⁹“Vawiina thu urhsûn tak tak kan ngaihthlâk hi kan zînga ngaithla vetu tu mahin, ‘Luhlul taka mahni duh ang anga awm pawh a pawi lo a nih chu,’ ti rilru suh se; chumi avâng chuan mi sual emaw, mi ṭha emaw in boral vek mai ang.

²⁰Chutiang mi chu LALPAN a ngaidam lo vang, a chungah LALPA thinur chu a alh zâwk ang. He lehkhabua ziak thil ṭha lo zawng zawngte hian a tlâkbuak ang a, LALPA chuan a tiboral vek ang.

²¹LALPA Dân bu thuthlung ziaknaa ânchhe dawn tûr chuang zawng zawng chhiatna chu a chungah a thlentîr ang.

²²“Rei fe hnuah chuan, in thlahte leh hnam dangte, ram hla tak taka awmte chuan in rama chhiatna leh tuarna; LALPA thlentîr chu an hmu ang a;

²³in lote chu ram ṭiau, kât leh chi tamna ram a ni ang a, eng mah phun theih a ni lo vang, hnim takngial pawh a ṭo thei lo vang. In ram chu Sodom leh Gomora te, Adma leh Zeboim te, LALPAN thinur taka a tihchhiat tak khuate ang kha a ni ang.

²⁴Khawvêla mi zawng zawngin, ‘LALPA hian engtiziaa he ram hi heti taka sawisa nge maw a nih le? Eng nge chuti taka a thinur chhan?’ an ti huai huai ang.

²⁵Hetiang hian an chhâng ang: ‘An thlahtute Pathian chuan Aigupta ram ata a hruai chhuah lai khân thuthlung a siampui a, LALPA mite chuan chu chu an bawhchhia a;

²⁶tûn hmaa an biak ngai loh hnam dang pathian, LALPAN biak a khapte chu an be ta a;

²⁷chuvângin, LALPA chu a mite chungah a thinur a, he lehkhabua chhiatna ziak zawng zawngte hi an ramah a thlentîr ta a ni,

²⁸LALPA chuan a thinur êm avângin a hnawt chhuak a, hnam dang ramah an awm ta daih a ni,’ an ti ang.

²⁹LALPA kan Pathian hian thurûk ṭhenkhat chu a puang lo; amaherawhchu, a Dân chu a rawn puang a, kan thlahte nên chu chu kan zâwm tûr a ni.