Read Mizo Lushai Deuteronomy 3 Bible Online

Deuteronomy 3 - Mizo Lushai bible

Deuteronomy 3

¹“Hmâr lam panin Basan ram kan thleng a. Edrei khaw bulah an lal Oga chuan a mi zawng zawng nên min lo bei a.

²LALPA chuan, ‘Huphurh suh, a mite leh a ram hi, amah chawpin ka pe tawh a che. Amor lal Sihona, Hesbon khaw lal i sawisak ang bawk khân sawisa ang che,’ min ti a.

³Tichuan, LALPA kan Pathianin Basan lal Oga chu a mite nên min pe a, pakhat mah zuah lovin kan that vek a.

⁴Argob bial, Basan lal Oga ram chhûnga awm khawpui zawng zawng chu kan la a, khaw sawmruk zet a ni, a khua lâksak loh rêng kan nei lo.

⁵Hêng khuaahte hian kulh bang sâng pui pui, kawngkhâr leh a kalhna ṭha tak tak a awm vek a, an chhehvêl khuate pawh kan la vek a ni.

⁶Hesbon lal Sihona kan sawisak ang bawk khân an khuate chu kan tichhe vek a, a hmei a pa, naupangte nên lam kan that vek a.

⁷An rante leh an thil neihte erawh chu râllâk sumah kan nei zêl a.

⁸“Hêng Amor lal pahnih ram, Jordan lui chhak lama mi hi Arnon lui aṭanga Hermon tlâng thlengin kan chhuhsak a.

⁹Hermon hi Sidon-ho chuan Sirion an ti a, Amor-ho erawh chuan Senir an ti.

¹⁰Basan lal Oga ram zawng zawng chu kan chhuhsak vek a ni; tlângchhîp zâwla khua te, Gilead biala mi te chu Basan bial pum pui Saleka leh Edrei thlengin kan nei ta a.

¹¹Refa-ho zînga la dam chhun chu Basan lal Oga hi a ni; ngai teh, a kuang chu lung kuang a ni a, tawng pangngai tawng kuaa sei, tawng li-a zau a ni: tûn thlengin Amon-ho khua Raba-ah a la awm.

¹²“Hêng ram kan lâk hnu hian Reubena leh Gada thlahte hnênah Arnon lui ruam chung tlânga Aroer khaw hmâr lam ram chu Gilead tlângram chanve nên kan pe a.

¹³Gilead ram la awm leh Basan ram chu Manasea thlah zâtve hnênah kan pe bawk a. Basan ram pum pui hi Refa-ho ram tih a ni ṭhîn.

¹⁴Manasea thlah Jaira chuan Argob bial, Basan ram hi, Gesur-ho leh Maaka-ho ramri thlengin a la a; khuate chu a hming chawiin hming thar a sa a, Havot-jair tûn thlengin an la ti.

¹⁵“Gilead ram chu Makira, Manasea fa ka pe a.

¹⁶Reuben leh Gad thlahte chu Gilead leh Arnon lui inkâr ram hi ka pe a. Chhim lama an ramri chu Arnon lui lai tak zêl a ni a, hmâr lamah chuan Jabok lui a ni, Amon-ho nên an inri.

¹⁷Khawthlang lam ri chu Jordan lui hi a ni a, Galili dîl aṭangin Tuipui Thi, Pisga tlâng bulṭhut a thleng.

¹⁸“Chûng lai chuan thu ka pe che u a, ‘LALPA in Pathianin he ram hi in chanpual atân a pe che u a, in zînga hriam keng thei chin chu in unau Israel nâwlpui hmaah Jordan lui in lo kai hmasa tûr a ni.

¹⁹Ran in ngah hle a, in ran te, in nupui fanaute hi chu hêng ka pêk che u khuaahte hian an lo awm ang a,

²⁰nangmahni ang bawka in unaute hian Jordan thlang lam ram LALPA pêk tûrah râlmuang taka an awm ve theih hma chu in unaute hi in pui tûr a ni. Chumi hnuah chuan ka pêk tûr che u in ram chanpualah hian in haw thei ang.

²¹Josua hnênah pawh ka hrilh a, in mit ngeiin lal pahnih chunga LALPA in Pathian thiltih chu in hmu a; chutiang bawkin in kalna tûra lalte chu LALPA chuan a sawisa dâwn a ni.

²²Anni chu huphurh suh ang che u, LALPA in Pathian chuan a dopui zêl dâwn che u a ni.

²³“Chutih lai chuan LALPA hnênah, ‘Aw LALPA Pathian, i chhiahhlawh hi i ropuizia leh i thiltihtheihzia i entîr ṭan chauh a la ni.

²⁴Leiah leh vânah hêng thil ropui i tih ang ti thei ve hi pathian dang rêng an awm lo.

²⁵Aw LALPA, Jordan lui kal kaiin ram ṭha tak, tlângram mawi tak tak, Lebanon tlângte chu, khawngaih takin min hmuhtîr ve teh,’ tiin ka ngên.

²⁶“Nangmahni avângin LALPA chu ka chungah a thinur a, ka thu chu a ngaithla duh lo va, LALPA chuan, ‘A tâwk e, sawi pawh sawi tawh suh.

²⁷Pisga tlângchhîpah chho la, khawthlang lam te, hmâr lam te, chhim lam te, khawchhak lam te thlîr vêl ang che; i mit chuan hmu la, a rah zawng i rap ve dâwn lo a ni, Jordan lui i kai ve lo vang.

²⁸Josua chu a tum tiruh tûrin fuih sauh sauh la, i hmuh ramah hian he mite hi a hruai ang a, a neihtîr dâwn a ni,’ a ti a.

²⁹Tichuan, Beth-peor khaw ep ruamah chuan kan awm ta rih a.