Read Mizo Lushai Deuteronomy 30 Bible Online

Deuteronomy 30 - Mizo Lushai bible

Deuteronomy 30

¹“Malsâwmna dawn nge in duh ânchhia, in thlan tûr ka siamsak che u a ni. LALPA chuan in chungah hêng thil ṭha lote hi a thlentîr a, a hnawhchhuahna che u hnam dang rama in awm hunah duh thlang thei in nih kha hre reng ang che u.

²In thlahte nên LALPA lam in lo hawi leh a, vawiina ka hrilh che u, a thupêkte hi tihtakzeta in awih chuan,

³LALPA in Pathian chuan in chungah ngil a nei leh ang a, hnam hrang hrang zînga a tihdarhna che u ram aṭangin a rawn hruai kîr leh ang che u a, a tihmuingîl leh ang che u.

⁴Khawvêl ram hla berah kal daih mah ula, LALPA in Pathian chuan a hruai khâwm leh ang che u a, a rawn hruai kîr leh ang che u;

⁵tichuan, in pi leh pute awmna ṭhin ram chu in nei leh ang a, in thlahtute ai khân in tam zâwk ang a, in neinung zâwk bawk ang.

⁶LALPA in Pathian chuan in thlahte nên thu awih theihna thinlung a pe ang che u a; tichuan, ani chu tihtakzetin in hmangaih ang a, chu ramah chuan in awm reng thei dâwn nia.

⁷Hêng ânchhia zawng zawng hi in hmêlma, nangmahni hawtu leh tiduhdahtute hi a dawntîr ang a;

⁸a thu in awih tawh ang a, vawiina a thupêk ka hrilh zawng zawng che u hi in zâwm tawh bawk ang.

⁹LALPA chuan in thiltih apiangah a tihmuingîl ang che u a, fate in ngah ang a, in ran vulhte nasa takin a pung ang; in lote chu a hlâwk êm êm ang. In pi leh pute tihhmuingîl a châk ang bawk khân nangni pawh tihhmuingîl che u a châk ang.

¹⁰A thu erawh chu in zâwm thlap tûr a ni a, a Dân bu-a chuang thuruat leh thupêk zawng zawng chu in awih vek tûr a ni a, tihtak meuhvin a lam in hawi bawk tûr a ni.

¹¹“Vawiina thu ka pêk che u hi in tân zawm har lutuk a ni lo va, hriat phâk loh tûr a ni hek lo.

¹²‘A thu kan hriat a kan zawm tûrin tu nge vânah han lâwn ang a min rawn lâksak ang?’ tih tûrin vâna awm daih a ni lo.

¹³‘Kan hriata kan zawm tûrin tu nge tuifinriat râlah kal ang a min rawn lâksak ang?’ tih tûra tuifinriat râl daiha awm a ni hek lo.

¹⁴Thu chu hetah, i bula hi a awm reng alâwm, i hriat fo tawh, sawi pawh i sawi fo ṭhin kha a ni a, zâwm mai rawh.

¹⁵“Vawiin hian eng nge in thlan duh, thil ṭha nge thil ṭha lo, nun nge thih, thlang rawh u.

¹⁶LALPA in Pathian thupêk vawiina ka hrilh che u hi in awih a, ani chu in hmangaih a, a thu in ngaihthlâk a, a dânte in zawm chuan in hmuingîl ang a, hnam ropui tak in ni ang.

¹⁷A thu in awih lohva, in ngaihthlâk duh lohva, pathian dangte in biak phawt chuan,

¹⁸chiang takin ka hrilh a che u: in boral ngei ang; Jordan râl, in luah tûr ramah chuan in dam rei lo vang.

¹⁹Vawiinah hian nunna nge in duh thihna, Pathian malsâwm dawn nge in duh ânchhia, a eng zâwk nge in thlan, hretuah lei leh vân ka sâwm e. Nangmahni leh in thlahte in dam zêl theih nân nunna thlang rawh u.

²⁰LALPA in Pathian chu hmangaih ula, a thu awih ula, amah chu vuan tlat rawh u; tichuan, in thlahtu Abrahama te, Isaka te, Jakoba te hnêna pêk a tiam ramah chuan in thlahte nên in dam rei dâwn nia,” a ti a.