Read Mizo Lushai Deuteronomy 31 Bible Online

Deuteronomy 31 - Mizo Lushai bible

Deuteronomy 31

¹Mosia chuan Israel mite hnênah thu a sawi zêl a,

²“Kum za leh sawmhniha upa ka ni ta a, duh duha chhuakvâk thei pawh ka ni ta lo; LALPA chuan ‘Jordan lui i kân ve dâwn lo,’ min ti si a.

³LALPA in Pathian chuan in hma a hruai zêl dâwn a, chûnga hnam awmte chu a tihboralsak ang che u; in luahlân dâwn a ni; LALPA sawi tawh angin Josua hian a ho ang che u.

⁴LALPA chuan Amor-ho lal Sihona te, Oga te leh an ram te a tichhia a, an mite a tihhlum vek ang khân anni pawh a tiboral ve ang.

⁵LALPA chuan anni chu a pe ang che u, thu ka pêk che u ang tak hian in tiboral tûr a ni.

⁶Intipaukhauh ula, ṭang sauh sauh rawh u; hlau suh ula, zâm hek suh u; anni chu huphurh hek suh u; amah LALPA, in Pathian ngei chuan a kalpui zêl ang che u a, a thlahthlamin a kalsan hek lo vang che u,” a ti a.

⁷Josua chu Mosian a ko va, Israel mi zawng zawng hriatah, “Intipaukhauh la, ṭang nasa rawh, an pate hnêna pêk LALPA tiam ramah chuan Israel mite hi i hruai lût ang a, i luahtîr tûr a ni.

⁸Amah ngei, LALPA chuan a kalpui dâwn che u a, a awmpui zêl ang che u; a thlahthlam lo vang che u a, a kalsan bawk hek lo vang che u, hlau suh ula, zâm hek suh u,” a ti a.

⁹Mosia chuan he Pathian Dân hi lehkhabu-ah a ziak a, Levia chi, Thuthlung Bâwm zâwntu puithiamte chu a pe a, Israel upate pawh a pe a,

¹⁰Mosia chuan an hnênah, “Kum sarihna tâwp, leiba ngaihdamna hun ruat apiangah Bâwkte kût laiin,

¹¹Israel-ho chu LALPA in Pathian hmun ruatah a hmaah an rawn inlan tûr a ni.

¹²Mipui khâwm ula, LALPA, in Pathian ṭih nachâng an hriat a, ka dân bu-a thu chuang zawng zawng hi an zawm theih nân paho te, nuho te, naupang te leh hnam dang in khuaa awm te chuan ngaithla rawh se.

¹³Chutiang chuan LALPA in Pathian dân la hre ve lo, in thlahte pawhin an hre ve ang a, Jordan lui kâna in luah tûr rama in awm chhûng zawng chu LALPA in Pathian ṭih nachâng an hre ve dâwn nia,” a ti a.

¹⁴ LALPA chuan Mosia hnênah, “I dam rei dâwn tawh lo; Josua ko la, Inbiakna bûkah rawn hruai rawh, a tih tûr ka lo hrilh ang e,” a ti a. Mosia leh Josua chu Inbiakna bûkah chuan an kal a, an va inlan a.

¹⁵LALPA chu Inbiakna bûkah chuan chhûm dingin a lo lang a, bûk kawngkaah chuan chhûm chu a ding luah a.

¹⁶LALPA chuan Mosia hnênah, “Ngai teh, i pi leh pu hnênah i mu ve thuai dâwn ta; hêng mite hian i thih hnu chuan min uiresan ang a, thu ka thlunpuite kha an bawhchhia ang a, min kalsan ang a; an va chênna tûra lo awm hnam dangte pathian chu min biaksan ang.

¹⁷An chungah ka thin a rim ang a, ka kalsan ang a, an chhe vek ang. Thil ṭha lo pui puiin a tlâkbuak ang a; kei an Pathianin ka awmpui tawh loh avângin hêng thil hi an tuar a ni tih an hria ang.

¹⁸Thil ṭha lo tak an ti a, Pathian dang an biak tâk avângin an lakah ka hmêl ka thup daih dâwn a ni.

¹⁹“Chuvângin, he hla hi ziak chhuak la, Israel mite chu zirtîr rawh; an chunga ka lungnih lohzia an hriatna tûr a ni ang.

²⁰An thlahtute hnêna pêk ka tiam, khawizu leh hnutetuia luang ram chu ka hruai thleng ngei ang. Amaherawhchu, duh tâwk tâwk ei tûr an neia an thau mûm tul hunah chuan, pathian dangte lam an hawiin chibai an bûk ang a; min hmusitin ka thuthlungte chu an bawhchhia ang.

²¹Thil râpthlâk tak takin a tlâkbuak hnuah pawh he hla hi an fate pawhin an la chham thei zêl ang a, chu chuan an sualzia a hriattîr ang. Pêk ka tiam ka hruai thlen hma pawh hian, an rilru put dân chu ka hre reng alâwm,” a ti a.

²²Chumi ni ngei chuan Mosia chuan hla chu a ziak chhuak a, Israel-te chu a zirtîr ta tlut tlut a.

²³ LALPA chuan Nuna fapa Josua hnênah, “Intipaukhauh la, ṭang nasa rawh, Israel mite hi pêk ka tiam ramah chuan hruai ang che, ka awmpui zêl nâng che,” a ti a.

²⁴Mosia chuan Pathian Dân chu lehkhabu-ah kimchang takin a ziak a.

²⁵A ziak zawh chuan LALPA Thuthlung Bâwm zâwntu Levia chite chu a pe a.

²⁶“He Dân bu hi la ula, LALPA in Pathian Thuthlung Bâwm bulah dah rawh u, in awm dân tehna-ah a ṭang dâwn nia.

²⁷In tihmawhzia leh in luhlulzia ka hria, kei ka la dam lai ngei pawhin LALPA lakah in nuar a, ka thih hnu phei chuan eng ang takin awm ang che u maw.

²⁸In upate leh in hruaitute chu lo pung khâwm sela, hêng hi ka lo hrilh ang e; lei leh vân ka thuhretu atân ka koh hi.

²⁹Ka thih hnu chuan in che khawlo hle ang a, ka thu zirtîr che u kha in zâwm duh lo vang. Nakin deuhvah phei chuan LALPA khap chu in ti lui ang a, a thin in tiur ang a, in boral mai ang,” a ti a.

³⁰Mosia chuan he hla hi a sawi chhuak a, Israel mi zawng zawng chuan an ngaithla ṭhuap a.