Read Mizo Lushai Deuteronomy 32 Bible Online

Deuteronomy 32 - Mizo Lushai bible

Deuteronomy 32

¹“Vânte u, ka thu hi bengkhawn ula, leilung pawh hian ka thu hi ngaithla rawh se.

²Ka zirtîrna hi ruah angin a sûr ang a, ka thu hi dai angin a tla ang. Hlobet chunga ruah si tla, thlai chawrno nan seng seng ang hian.

³ LALPA hming chu ka puang ang a, Kan Pathian chu chawimawi rawh u.

⁴Engkim ṭha taka titu, Lungpui a ni, Dik takin ro a rêl ṭhîn, Pathian rinawm, khawlohna nei lo, Thil ṭha leh dik ti ṭhîntu a ni.

⁵Khawlohna a nei em ni? Nei suh e, A fate a ni demawm chu, Chhuan bengtla lo leh tihmawhte chu.

⁶Mi â leh mi chhâwte u, hetiang hian em ni LALPA in thungrulh dâwn? A hringtu che u, in pa a ni, a siam che u a, a tipuitling che u a ni.

⁷Tûn hma kha ngaihtuah chhuak teh u, Hun liam daih tawhte kha, Eng thil nge thleng in pate zâwt ula, Hmânlai lal chanchin in upate sawitîr teh u.

⁸Chungnungberan hnamte ram a sem a, Mite awmna tûr a ruatsak lai khân, Pathian fate zâtin an ramri a khamsak a.

⁹ LALPA chuan a chanpual atân Jakoba thlahte a thlang a ni.

¹⁰Thlalêra an vâkvai a hmu a, Ram ṭiau, thlichhe tlehnaah chuan A hliahkhuh a, a duat hle a, A mitnautê angin a vêng;

¹¹Mupuiin a bu a thai darh a, A note vilin a thlâwk vut vut a; A thla zârin a dâwm a dâwm a, A thlawhpui ṭhîn ang hian.

¹² LALPA chauh chu an hruaitu a ni a, Hnam dang pathian an tel ve lo.

¹³Tlângramah a chuanchhuahtîr a, Rama thil ṭote chu an ei a, Lung kârah khawizu an la a, Lung hmunah pawh an oliv a rah tiar tuar.

¹⁴Hnutetui an ngah, an bâwngte leh kêlte nên; An berâmte lah an thau, Basan ram berâm leh kêlchal ang, Buh tui ber leh uain ṭha ber an nei.

¹⁵Israel-te chu an lo hausa a, An induh ta hle a, An thau mûm tûl a, Siamtu, an Pathian chu an kalsan a, Chhandamtu, an Lungpui chu an ngainêp.

¹⁶Milem an bia chu a haw êm êm a, Thil tenawm an tihte chuan a tithinur.

¹⁷Pathian ni lo, ramhuai an bia a, An pate hriat ngai loh leh hlauh ngai loh An be ta, pathian tharlâm tê tê chu.

¹⁸Anmahni hringtu Lungpui chu an pawisa lo va, Anmahni siamtu Pathian chu an kalsan ta.

¹⁹ LALPA chuan a hmuhin a thin a ur a, A fanaute chu a hnâwl ta.

²⁰‘Ka bîkbosan ang a, Engtin nge an awm dâwn ka thlîr teh ang, Chhuan tihmawh tak leh Fa sual rin tlâk loh tak an ni.

²¹Pathian ni hlei lo an bia, Ka thîkthu an chawk tho va, An milemte chuan min tithinur. Chî anî-a chhiar tham lohte ka thîktîr ang, Hnam â takte hmangin ka tithinur bawk ang.

²²Ka thinur chu mei angin a alh ang a, Leia thil zawng zawng a kâng ral ang. Seol pawh a kâng thleng ang a, Tlâng nghahchhante a kâng ral ang.

²³Chhiatna tinrêng an chungah ka thlentîr ang a, Thalin ka kâp ang.

²⁴Rilṭâm khawsikin an thi ang a, Hri râpthlâk tak tak an vei ang. Ram sakawlhten an seh ang a, Vaivuta tleng rûl tûr neiten an chu ang.

²⁵Tuallaiah khandaih an tawng ang a, In chhûngah thil râpthlâk tak tak nên, Nula tlangvâl, ṭhalai an that ang a, Naupang pawh, tar pawh an zuah lo vang.

²⁶Tu ma hriat tawh loh tûrin Tihmang dêr ka tum hial a.

²⁷Mahse, an hmêlmaten uangthuang takin, ‘A mite chu kan sawisa nek,’ an tih ka hlau a ni.

²⁸Hnam â tak zawng an lo ni, Thil rêng an hrethiam lo.

²⁹Fing deuh se chu an hrethiam tûr An awm dân tûr an thlîr thiam ang a.

³⁰An Lungpui chuan kalsan lo se, An Pathian, LALPA chuan thlauhthla lovin, Pakhatin sâng têl a ûm dâwn em ni? Pahnih lekin sîng têl an ngam ang maw?

³¹An hmêlmate pawhin an pathian chu Israel-te Pathian ai chuan a nêp zâwk tih an hria.

³²An hmêlmate chu Sodom leh Gomora anga sual, Grep kha, tûr nei ang hi an ni.

³³An uain pawh chu rûl tûr ang, Rûl chuk anga hlauhawm a ni.

³⁴ LALPA chuan an hmêlmate thil tih chu a hre reng a, Phuba lâk hun remchâng a zawng.

³⁵An ke rah chu a tleu hunah, Phuba ka la ang a, ka thungrûl ang, An chhiat hun chu a lo hnai ta; An chunga lo thleng tûr chu an tuar thuai ang.

³⁶ LALPA chuan a mite a chhan ang a, A chhiahhlawhte chan chauhzia te, Bawih leh bawih lo te pawh; Thi bâng tlêmzia a hmuhin a lainat ang a, A chhan chhuak ang.

³⁷A mite chu, ‘In pathian thiltithei, In rin ṭhinte chu khawiah nge?

³⁸In thilhlante chuan in châwm a, Uain in tûr nên lam in chhawpsak kha? Lo kal sela, chhan che u rawh se, Lo tlân sela, hum che u rawh se,’

³⁹Keimah chauh hi Pathian chu ka ni. An awm tak tak lo, pathian dang zawng, Ka tihlum a, ka tinung a, Ka hliam a, ka tidam a, Ka ta min chhuhsak thei tu mah an awm hlei nem.

⁴⁰Pathian nung ka nih hi, Bân pharin thu ka tiam ṭhîn.

⁴¹Khandaih ka tât hriam ang a, Dik takin ro ka rêl ang. Ka hmêlmate chungah phuba ka la ang a, Min hawtute chu ka hrem ang.

⁴²An thisen chu ka thalah a luang ang a, Ka khandaih chuan thisen a chhuah ang a, Hmêlma sam sei tak takte chu a sât hlum ang.

⁴³Hnam tinte u, LALPA mite hi fak rawh u, Anni thattute chu a hrem zêl a, A hmêlmate chungah phuba a la, A mite sual a ngaidam ṭhîn.”

⁴⁴Mosia leh Nuna fapa Josua chuan chu hla chu mipui hriatah an sawi a.

⁴⁵Mosian hêng thu hi Israel mite hnêna a sawi zawh chuan,

⁴⁶‘Hêng, thu ka pêk zawng zawng che u hi ngaihtuah ngun ula, hêng dân thute hi zâwm tûrin in fate zirtîr rawh u.

⁴⁷Hêng thu hi thu mai mai a ni lo, nunna thu a ni. Jordan lui kal kâna in va neih tûr ram in thlen hunah chuan zâwm ula, in dam rei ang,’ a ti a.

⁴⁸Chumi ni chuan LALPAN Mosia hnênah,

⁴⁹“Moab ram, Jeriko ep, Abarim tlânga Nebo tlângchhîpah chuan chho la, an chanpual atân Israel-te ka pêk Kanan ram chu thlîr ang che;

⁵⁰I u Arona Hor tlângah a thi a, a mite hnênah hruai a ni ta ang khân tah chuan i thi ang a, i pi leh pute hnênah i kal ve ang.

⁵¹Zin thlalêr, Meriba-kades tui hmunah khân, Israel-te zîngah ka thu i bawhchhia a, Israel-te hmaah min chawimawi lo a ni.

⁵²Chumi avâng chuan ram chu hla tak aṭang chauhvin i hmu thei ang; Israel mite awmna tûra ka pêk ram chu i rap ve lo vang,” a ti a.