Read Mizo Lushai Deuteronomy 33 Bible Online

Deuteronomy 33 - Mizo Lushai bible

Deuteronomy 33

¹Pathian mi Mosia chuan a thih hmain hetiang malsâwmna hi Israel mite tân a dîlsak a.

²“LALPA chu Sinai tlâng aṭangin a lo kal a, Ni angin Edom ramah a chhuak. Paran tlâng aṭangin a mite a rawn chhun êng a, Vântirhkoh sâng sâwmin an zui a, Mei a alh hluah hluah mai, a ding lamah.

³ LALPA chuan a mite a lainat a, A tâte chu a vêng. A thupêkte an dawng a, A hniakhnung an zui a,

⁴Mosian Dân thu min pe a, Jakoba thlahte ro hlu ber chu.

⁵ LALPA chu a mi Israel-te lal a ni, Hnam hruaitute leh Israel pungkhâwmho chungah chuan a lal.”

⁶Reubena chungchâng hetiangin a sawi: “Reubena chu thi mang suh se, Tlêm hle tawh mah se.”

⁷Juda chungthu sawiin: “Aw LALPA, Juda mangang au ngaithla la, A unaute fin leh rawh se, A hmêlmate beihpui ang che.”

⁸Levia chungthu a sawi a: “I chhiahhlawh rinawm Levia thlahte chuan, Urim leh Thumim kawl se, i thu hrilh ṭhîn ang che, Masa-ah khân i fiah a, Meriba tuiah in inchhuahchhalh kha.

⁹A nu leh pa, a unaute leh a fate pawh Hrechang lovin a vuan che a. I thupêk a awih a, I thuthlung a vawn tlat kha.

¹⁰Jakoba thlahte chu i thuruatte an zirtîr ang a, Israel fate chu i dân an zirtîr ang. I hmaah rimtui an hâl ang, I maichâmah hâlral thilhlan an hâl ṭhîn ang.

¹¹Aw LALPA, a neihte chu malsâwm la, A thiltihte lo lâwm ang che. A hmêlmate chu an tha chhahsak la, A hawtute chu dingchhuak suh se.”

¹²Benjamin thlahte chungchâng hetiangin a sawi: “LALPA duhsak leh lainat, A thla hnuaiah a khawsa, Nilênga a vên, a puak tlat ṭhin a ni.”

¹³Josefa thlahte chungchâng hetiangin a sawi: ‘An ram chu LALPA chuan vân daifîmin châwm sela, Lei chhûngril aṭanga tui nên.

¹⁴An theirahte chuan ni hmu ṭha sela, A hun takah hmin tiar tuar rawh se,

¹⁵An tlâng chhuanawm tak tak leh mualte chu Thei tui tak takin khat rawh se.

¹⁶An ramah chuan thil ṭha khat sela, Hnimbuka thusawitu khân malsâwm rawh se, A malsâwmna chu Josefa lu-ah rawn vûr sela, A unaute kaihruaitu a ni asin.

¹⁷Josefa zawng, bâwngchal anga chak a ni, Sele ki ang ki ṭha a nei, A kîte chu Manasea thlah sâng rual Efraim thlah sîng rual an ni. Hnam dang a si ang a, Kâwlkil thlengin a vawrh darh ang.”

¹⁸Zebulun leh Isakar chungchâng hetiangin a sawi: “Tuifinriata sumdâwng, Zebulun chu hmuingîl rawh se, Isakar pawh in lamah a chan ṭha rawh se.

¹⁹An tlângrama awm tûrin hnam dang an sâwm a, Tah chuan inthawina dikin an inthawi ang. Tuifinriat hausakna an chaw a, A kam ṭiauva thil ṭha an khâwm.”

²⁰Gada chungchâng hetiangin a sawi: “Gad ram tizautu chu fak rawh u; Bân seh chhûma, lu vun hîk tûra Sakeibaknei biru ang hi a ni.

²¹Ram ṭha ber an thlang a, Israel hruaitute an pun khâwm khân Hotu chanvo an chantîr a, LALPA thupêk leh dân an zâwm.”

²²Dana thlah chungchâng hetiangin a sawi: “Dana chu sakeibakneituai; Basan ram aṭangin a lo zuang chhuak a ni.”

²³Naftali chungchâng hetiangin a sawi: “Naftali chuan LALPA malsâwmna a dawng a, Hnianghnârin duhsakna a dawng; A ram chuan dîl aṭangin chhim lam a thleng.”

²⁴Asera chungchâng hetiangin a sawi: “Fa dangte aiin Asera chu a nihlawh e, A unaute duhsakna dawng sela, A ke chu hriakah chiah rawh se.

²⁵Thîr leh dârin an khua chu an kalh ang a, Him takin chêng reng rawh se.”

²⁶“Israel-te u, in Pathian ang hi pathian dang an awm lo, Ṭanpui tûr che u-in ropui taka chhûm chunga chuangin Vân khi a fang zung zung.

²⁷Chatuan Pathian chu in vêngtu a ni, A bân chak chuan a hum ṭhîn che u a, In hmaah hmêlma a hnawt chhuak a, ‘Tiral vek rawh u,’ a ti.

²⁸Jakoba thlah Israel-te chu muang takin an awm ta a, Buh leh uain tamna ramah an awm der der, Vân daifîm châwm len te chu an ring.

²⁹Aw Israel, i va nihlawh kher êm! Nang ang rêng tu mah an awm lo, LALPA chhandam hnam i ni a, I himna tûr leh hnehtu i nih theih nân LALPA chu i phaw leh i khandaih a ni. I hmêlmaten khawngaih an dîl ang che; Nangin i lo rapbet ang.”