Read Mizo Lushai Deuteronomy 34 Bible Online

Deuteronomy 34 - Mizo Lushai bible

Deuteronomy 34

¹Mosia chu Moab phai, Jeriko khaw ep aṭang chuan Nebo tlângchhîp, Pisga an tihah chuan a lâwn chho va. LALPA chuan ram chu Gilead aṭangin Dan thlengin a entîr a.

²Naftalia te, Manasea te, leh Efraima te ram chu Mediteranean tuipui thlengin a thlîr a.

³Judai ram chhim lam ram, Zoar aṭanga Tûm khawpui Jeriko khaw thlengin a thlîrtîr bawk a.

⁴ LALPA chuan a chhiahhlawh Mosia hnênah, “Abrahama te, Isaka te, Jakoba te hnêna an thlahte pêk ka tiam ram chu hei hi a ni. Ka entîr che a, i kal erawh chu ka phal lo,” a ti a.

⁵ LALPA sawi angin Moab ramah chuan Mosia chu a thi ta a.

⁶Beth-peor khaw dep, Moab phaiah chuan a phûm a, tûn thlengin tu man a thlân awmna chu an hre lo.

⁷A thih chuan Mosia chu kum za leh sawmhnih a upa a ni a, a mit pawh a la thim lo, a la chak hle a ni.

⁸Moab phaiah chuan Israel-te chuan ni sawmthum an sûn a.

⁹Nuna fapa Josua chu Mosian a aiawhtua a ruat a nih avângin a fing êm êm a, Israel-te chuan Josua thu chu an zâwm a, Mosian LALPA thupêk a hrilhte pawh an ti a.

¹⁰Israel zîngah Mosia ang zâwlnei an awm ngai lo; LALPA chuan hmaichhanah a be ṭhîn a ni.

¹¹Aigupta lal leh a ṭhuihruaite mit hmuhah leh an ram chhûngah te Mosia hmanga thil mak leh chhinchhiahna ropui a tih ang ti tûrin zâwlnei dang tu mah a hmang ngai lo.

¹²Israel-te hmuha thil ropui leh hlauhawm, Mosia tih ang ti ve zâwlnei dang an awm hek lo.