Read Mizo Lushai Deuteronomy 4 Bible Online

Deuteronomy 4 - Mizo Lushai bible

Deuteronomy 4

¹“Khai le, Israel-te u, thuruat leh awm dân tûr ka zirtîr che u kha pawisa ula, in fate hnênah LALPA in thlahtute Pathianin a pêk che u ram chu dam taka in luah theih nân zâwm rawh u.

²Thu ka pêk che u hi in belhchhah tûr a ni lo va; LALPA in Pathian thu ka hrilh che u chu hmaih in nei tûr a ni hek lo.

³Peor tlânga LALPA thiltih in hmuh ṭheuh kha, Peor tlânga Baal betute a tihhlum vek kha.

⁴Nangni LALPA vuan tlattute erawh chu tûn thlengin in la dam hi.

⁵“Ngai teh u, kan Pathian LALPA min hrilh ang ngeiin, a thuruatte leh awm dân tûr ka zirtîr che u kha, in luah tûr ram in thlen hunah zâwm ngei ang che u.

⁶Hêng dânte hi pawisa ula, zâwm tlat ang che u; hnam dangten an hriat ve hunah, ‘He hnam hi hnam fing tak leh changkâng tak an lo nih hi,’ an ti ang a, in finzia leh in changkân bîkzia an hria ang.

⁷LALPA kan Pathian, a mite au lo chhâwn zêl ṭhîntu ang hi, hnam dang, hnam ropui berte pawhin an nei ve hlei nêm.

⁸Vawiina dân ka zamsak che u anga dân leh thupêk ṭha pawh hi hnam ropui ber te pawhin an nei ve em ni?

⁹Tichuan, fîmkhur ula, in mit ngeia in thil hmuhte kha in dam chhûnga in theihnghilh loh nân vawng tlat ula, in fate leh in tute pawh, hrilh ṭhîn ang che u.

¹⁰Horeb tlângah khân LALPA chuan ka hnênah, ‘Mite chu ko khâwm la, an damchhûng zawnga ka thu an awih a, an fate pawh min ṭih dân an zirtîr theih nân ka thu sawi hi hria se ka duh a ni’ mi ti a; chutiang ngei chuan tlângah khân in Pathian LALPA hmaah in ding a ni tih theihnghilh lovin, in fate chu hrilh ṭhîn ang che u.

¹¹Tlâng chu a kâng a, meikhu chhah takin a khuh tlat a, a thim mup a, vân thlengin a thim a, a bulṭhutah in va kal a nih kha.

¹²LALPA chuan mei aṭangin a rawn bia che u a, a aw chu in hria a; mahse, a riruang hmuh tûr a awm lo va, a aw chauh in hria a nih kha.

¹³A thuthlung chu vawng tlat tûrin a hrilh che u a, thupêk sâwm, lungphêk pahniha a ziak chu zâwm tlat tûrin a ti che u a.

¹⁴LALPA chuan a dân zawng zawng chu zirtîr tûr che uin min ti a. In awmna tûr ram in thlen hunah chûng chu in zawm tlat tûr a nih thu te in fate in hrilh ṭhîn tûr a ni.

¹⁵“Horeb tlângah khân mei aṭangin LALPA chuan in hnênah thu a sawi a; mahse, a riruang chu in hmuh loh kha; fîmkhur hle rawh u.

¹⁶Milem, in biak atân milim siamin intibawlhhlawh suh u; mipa lem emaw, hmeichhe lem emaw tuk suh ula, chher bawk hek suh u.

¹⁷Leia awm rannung rêng rêng lem te, chunglêng sava lem te,

¹⁸leia bawkvâka kal lem te, lei hnuai tuia sangha lem te, in biak atân in siam tûr a ni lo.

¹⁹Vân lam in han thlîr ang a, ni te, thla te, arsi te leh vâna thil dang awm rêng rêng te khi chibai bûka an rawngbâwl in châk hlauh dah ang e; fîmkhur rawh u - LALPA in Pathian chuan khîngte khi hnam dang biak ve atân lek a dah a ni.

²⁰Nangni zawng, Aigupta ram, rawhtuina meipui ata chu a la chhuak che u a, tûna in awm anga ama pual ni tûrin LALPAN a hruai chhuak che u a ni.

²¹Kei zawng, nangmahni avângin LALPA in Pathianin luah atâna a pêk tûr che u ram, ram ṭha taka kal tûrin Jordan lui ka kai ve a phal tlat lo a ni.

²²Kei chu Jordan kal kai ve lovin he lai ramah hian ka thi dâwn a ni, nangni erawh chu kai ula, ram chu in va nei tûr a ni.

²³LALPA in Pathianin thu a thlunpui che u kha in theihnghilh hlauh ang e. Eng lem mah in biak atân LALPA in Pathianin in siam a phal loh kha.

²⁴In Pathian, LALPA hi kan ral hmang mei ang a ni a, Pathian thîkthu chhe tak a ni.

²⁵“Chu rama rei tak in awm hnu, fate neia tuchhuan, chhuan hnih chhuan thum in neih hunah pawh milem rêng rêng in siam a, LALPA in Pathian duh loh zâwng in tih chuan, lei leh vân chhâlin ka sawi hi,

²⁶Jordan lui kâna in va luah tûr ramah chuan in dam rei lo vang a, in boral mai ang.

²⁷LALPA chuan hnam tin zîngah a tidarh ang che u a, chûngah chuan a dam khawchhuak chu tlêm tê chauh in ni ang.

²⁸Chûng ramah chuan mihring siam milim, thing emaw, lung emaw, ṭawng thei hlei lo, hre thei bawk si lo, hmu thei lo leh thil rim pawh hre thei lo in bia ang.

²⁹Mahse, chûng ram aṭang chuan, LALPA in Pathian in ṭih takzeta, rilru zawng zawng nêna amah in zawn chuan in hmu leh ang.

³⁰Ni hnuhnûngahte chuan hrehawm in tuar ang a, a thu in awih tawh ang.

³¹In Pathian, LALPA hi Pathian ngilnei tak a ni a, a hlamchhiah lo vang che u a, a tichhe hek lo vang che u; in pate hnêna thu a tiam tlat chu a theihnghilh bawk hek lo vang.

³²“Tûn hma, in pian hma daih, Pathianin leia mihring a siam aṭang khân chhui teh u; khawvêl pum pui hi zâwt chhuak ula, in thil hmuh ang leh in thil hriat ang hi an hre ve ngai em zâwt teh u.

³³Nangni anga mei aṭanga Pathian thu sawi ngaithlaa dam khaw chhuak hnam dang tu nge awm ve le?

³⁴Aigupta ram ata in Pathian LALPA chuan a mi atân a hruai chhuak che u ang khân tu Pathianin nge hmun khat aṭangin a mi tûr hnam hruai chhuak ve ngai? Nangni zawng, in Pathian chuan, a thiltihtheihzia leh a chakzia in hmuhah a tilang a; hri te leh indona te a awmtîr a; thil mak leh chhinchhiahna mak tak tak a ti a; thil hlauhawm pui puite thlentu a nih kha.

³⁵LALPA hi Pathian chu a ni a; amah lo hi Pathian dang rêng an awm lo tih in hriat theih nân chûng chu a hmuhtîr che u a ni.

³⁶A zirtîr theih nân che u vân aṭangin a aw a hriattîr che u a, leiah ngei a mei ropui chu a hmuhtîr che u a, chuta ṭang chuan a rawn bia che u a nih kha.

³⁷In pate kha a ngainat êm avângin an thlahte chu a thlang che u a, Aigupta ram aṭangin amah ngeiin hneh takin a hruai chhuak ta che u a ni.

³⁸In hmaah, in aia hnam lian zâwk leh thiltithei zâwkte a ûm chhuak a, an awmnaah a hruai lût ang che u a, ro atân an ram chu a pe dâwn che u a ni. Tûn thlengin chûng chu in ta a la ni ngai lo.

³⁹Chuvângin, vawiin hian hre rawh u, theihnghilh hauh suh ang che u: LALPA hi chung lam vân leh hnuai lam leia Pathian awm chhun a ni, Pathian dang rêng an awm lo.

⁴⁰Chuvângin, a thuruat te leh a thupêk te chu zâwm rawh u, in tân a ṭha ang a, in fate tân pawh a ṭha ang; kumkhuaa in neih atâna a pêk che u ramah chuan in dam rei bawk ang.”

⁴¹Jordan lui chhak lamah inhumhimna tûr khawpui pathum a ruat a.

⁴²Chûng khuaah chuan miin a hmêlma pawh ni lo, mi a tihhlum palh chuan a tlân thei ang a; an lo hum dâwn a ni.

⁴³Reuben thlahte ramah, tlâng zâwl Bezer khua te, Gad thlahte ramah Gilead biala awm Ramot khua te, Manasea thlahte ramah Basan bial Golan khua te chu a ruat a.

⁴⁴Hei hi Israel-te tân Mosian Dân a târlan chu a ni.

⁴⁵Hêng thupêk te, thuruat te leh awm dân tûr te hi Aigupta ram aṭanga Israel-te an lo chhuah lai khân Mosian a hrilh a.

⁴⁶A hrilhna hmun chu Beth-peor tlâng ep, Jordan lui chhak lam Amor lal Sihona ram chhûngah a ni a, ani chu Mosia leh Israel-ten an hneh a nih kha.

⁴⁷Chu ram chu an neihsak a, Basan lal Oga ram pawh an neihsak bawk a. Hêng Amor lal pahnihte hi Jordan lui chhak lama awm an ni.

⁴⁸An ram lâk chu Arnon luiruam ko chunga awm Aroer khua aṭanga Hermon tlâng an tih inkâr ram hi a ni.

⁴⁹Jordan lui kam chhak lam phai pawh Tuipui Thi thlengin tlâng pang nên a huam.