Read Mizo Lushai Deuteronomy 5 Bible Online

Deuteronomy 5 - Mizo Lushai bible

Deuteronomy 5

¹Mosia chuan Israel mi zawng zawng chu a ko khâwm a, an hnênah “Israel-te u, hêng thuruat leh awm dân tûr in beng hriata ka sawite hi ngaithla rawh u, zir ula, zâwm rawh u.

²Kan Pathian, LALPA chuan Horeb tlângah thu min thlunpui a.

³LALPA thuthlung hi kan pate tân a ni lo, keini, vawiina heta awmte tân hian a ni zâwk.

⁴Tlânga mei aṭang khân LALPA chuan inhmachhawnin in hnênah thu a sawi a nih kha.

⁵Khatih lai khân LALPA leh nangni inkârah ka ding a, mei in hlauh avângin tlângah in lâwn ngam ve si lo va, LALPA thu sawi sawichhâwngtuah ka ṭang a nih kha.

⁶“LALPA chuan hetiang hian a ti, ‘Bawiha in awmna Aigupta ram aṭanga hruaichhuaktu che u LALPA, in Pathian chu ka ni.

⁷“Kei lo hi chu Pathian dang rêng rêng nei suh.

⁸“I tân milem siam suh, chung lam vâna awm emaw, leia awm emaw, lei hnuai tuia thil awm lem emaw i siam tûr a ni lo.

⁹Chûng chu kûnin chibai i bûk tûr a ni lo va, an rawng i bâwl tûr a ni hek lo. Kei LALPA, i Pathian hi, Pathian thîkthu chhe tak ka ni; min hawtute chu an thlahte chhuan thum chhuan li thleng pawhin ka hrem ṭhîn a,

¹⁰min hmangaiha ka thupêk zâwmtute erawh chu an thlah, a sânga sâng thleng chungah pawh ngil ka nei ṭhîn.

¹¹“I Pathian, LALPA hming chhâlin dâwt sawi suh; dâwta a hming chhâltu chu LALPA chuan hrem lohvin a chhuah lo vang.

¹²LALPA i Pathianin thu a pêk che angin sabat ni hi hmang la, serh ang che.

¹³Ni ruk chhûng hna i thawk ang a, i hna zawng zawng i thawk tûr a ni.

¹⁴A ni sarih ni erawh hi chu LALPA tâna sabat ni a ni a, hna eng mah i thawk tûr a ni lo; i fapa te, i fanu te, i bawihpa te, i bawihnu te, i bâwngpa te, i sabengtung te, i ran rêng rêng te leh in khaw chhûnga hnam dang awm ve te pawhin hna an thawk tûr a ni lo; nangmah ang bawkin, a hmei a pa, an châwl ve tûr a ni.

¹⁵Aigupta ramah, mi chhiahhlawh in nih kha hre reng rawh u. Chuta ṭang chuan LALPA in Pathian hian a thiltihtheihna ropui tak hmangin a hruai chhuak che u a nih kha. Chuvângin, LALPA in Pathian chuan sabat ni hi serh tûrin a ti che u a ni.

¹⁶“LALPA i Pathianin thu a pêk che ang khân i nu leh i pa chawimawi rawh; chutichuan, i dam rei ang a, LALPA i Pathian pêk che ramah i hmuingîl ang.

¹⁷Tual that suh.

²⁰“I vêngte dâwtin hêk suh.

²¹I vêngte nupui i ît tûr a ni lo, a in te, a bawihpa te, a bawihnu te, a bâwngpa te, a sabengtung te, a ta rêng rêng i awt tûr a ni lo.

²²LALPA chuan hêng thupêkte hi a ni Horeb tlâng bula in lo kal khâwm laia a hrilh che u kha. Mei aṭang leh chhûm chhah thim mup aṭangin hêng thu hi ring takin a sawi a nih kha; thu dang sawi a nei tawh lo. Lungphêk pahnihah a ziak a, min pe a nih kha.

²³“Tlâng chu a alh hluah hluah a, thim chhah mup aṭanga aw in hriat khân, hnam tin hruaitute leh in upate nên ka hnênah in lo kal a;

²⁴‘LALPA kan Pathian chuan a ropuizia leh a lenzia min hmuhtîr ta, mei aṭanga a aw chu kan hria a, vawiin hian Pathianin mihring a bia a, mihring chu a thi kher lo tih kan hre ta a ni.

²⁵Amaherawhchu, engah nge thi mai theia kan awm leh ang? Mei râpthlâk tak khân min rawn kâng ral ang a, LALPA kan Pathian aw chu kan hriat leh chuan kan thi tawh ngei ang.

²⁶Mei aṭanga Pathian aw hre si mihring dam khawchhuak rêng an awm ve em ni?

²⁷LALPA kan Pathianin a sawi zawng zawng chu min hrilh la, kan lo ngaithla ang a, kan zâwm ang,’ an ti a.

²⁸“LALPA chuan ka hnêna in thu sawi chu a lo hria a. LALPA chuan ka hnênah, ‘Hêng miten i hnêna an thu sawi hi ka lo hria a, an sawi dik e.

²⁹Chutiang rilru chu pu fo ṭhîn sela a va ṭha dâwn em! Min ṭih ang a, ka thupêkte an zâwm ang a, an fate nên lam an hmuingîl kumkhua tûr:

³⁰An hnênah zuk chhuk la, an bûkah hawtîr rawh.

³¹Nang erawh chu ka bulah hian lo ding la, ka thupêk zawng zawng te, ka thuruat te leh awm dân tûr ka tih ka lo hrilh ang che; chu chu anniho hi i zirtîr dâwn nia; tichuan, ro atâna ram ka pêk tûrah chuan in zâwm ṭhîn dâwn nia,’ a ti a.

³²“LALPA in Pathian thupêk hi in zâwm fîmkhur hle tûr a ni; pakhat mah in hmaih tûr a ni lo va, in belh tûr a ni hek lo.

³³LALPA in Pathianin in kalna tûr a tihah chuan in kal zêl tûr a ni; tichuan, in dam ang a, in hmuingîl ang a, in ram neih tûrah chuan rei tak in dam dâwn nia.