Read Mizo Lushai Deuteronomy 6 Bible Online

Deuteronomy 6 - Mizo Lushai bible

Deuteronomy 6

¹“Hêng thupêk te, thuruat te leh awm dân tûr te hi LALPA, in Pathian chuan zirtîr tûr che uin min ti a ni. Chu ram chu in luah hunah zâwm ṭhîn ang che u.

²In fate leh in tûte pawhin LALPA in Pathian thuruat leh thupêk ka hrilh che u hi an zâwmin an ti tûr a ni; tichuan, an dam rei dâwn nia.

³Chuvângin, aw Israel-te u, hria ula, ti ngei tûrin inpuahchah rawh u; in tân a ṭha ang a, khawizu leh hnutetuia luang ramah hian in pate hnêna LALPA in Pathianin a tiam ang khân nasa takin in pung dâwn nia.

⁴“Aw Israel-te u, ngaithla teh u, LALPA, LALPA chauh hi kan Pathian chu a ni.

⁵LALPA in Pathian chu in thinlung zawng zawngin, in theihtâwpin hmangaih rawh u.

⁶Vawiina he ka thupêk che u hi in thinlungah châm tlat sela,

⁷ngun takin in fate zirtîr ang che u. In chhûnga in ṭhut lai te, kawnga in kal lai te, in mut dâwnah te, in thawh dâwnah te sawi sawi ang che u.

⁸In hriat reng theih nân in bânah te hrêng ula, chalhrênah te hmang ang che u.

⁹In kawngka biangah te ziak ula, in tual kawngkaah te pawh târ ang che u.

¹⁰“In pu Abrahama te, Isaka te, Jakoba te hnêna pêk a tiam ram chu LALPA in Pathianin a pe dâwn che u a; khawpui lian tak tak leh mawi tak tak, in din ni hauh lo chu in nei dâwn a ni.

¹¹Chuta in chhûngah chuan thil ṭha tak tak in dah ni lo a awm ang a; in laih hah loh tuichhunchhuah te a awm bawk ang a; grep huan leh Oliv hmun, in siam hah ni lo te in nei ang. LALPAN chu rama a hruai thlen hunah che u chuan ei tûr eng mah in tlachham lo vang.

¹²Fîmkhur ang che u, bawih in nihna, Aigupta ram aṭanga hruaichhuaktu che u LALPA hi in theihnghilh hlauh ang e.

¹³“LALPA in Pathian chu ṭih ula, amah chauh chibai bûk ula, a hming chauh chhâlin thu tiam ṭhîn ang che u.

¹⁴In vêla awmte pathian chu pakhat mah be ve suh u.

¹⁵In zînga chêng LALPA in Pathian hi Pathian thîkthu chhe tak a ni, in chungah LALPA in Pathian hi a thinur chuan khawvêl ata hi a tibo daih mai ang che u.

¹⁶“Masa tui hmuna in tih ang khân LALPA in Pathian hi fiah suh u.

¹⁷LALPA in Pathian thupêk chu uluk takin zâwm ula, a thupêkte leh a thuruat a hrilh che u chu awih ṭhîn ang che u.

¹⁸LALPA ṭha tihzâwng leh dik a tih chu ti ula, in tân a ṭha ang a, in pate pêk a tiam tawh ramah in lût ang a, in nei dâwn nia.

¹⁹LALPA sawi tawh angin in hmêlmate chu in hmaah a hnawh chhuahsak vek ang che u.

²⁰Nakin hnuah in faten, ‘Hêng thupêk te, thuruat te, awm dân tûr te, LALPA kan Pathian hrilh che u hi engtizia nge?’ tia an zawh hunah che u chuan,

²¹hetiang hian chhâng ang che u, ‘Aigupta ramah Farawa bawih kan ni a, LALPA chuan Aigupta ram ata chu min hruai chhuak a.

²²LALPA chuan thil mak te, chhinchhiahna ropui tak tak leh râpthlâk tak tak Aigupta ramah te, Farawa leh a hote chungah te a ti a.

²³Chuta ṭang chuan min hruai chhuak ta a, he ram, kan pate hnêna pêk a tiam ramah hian min hruai luha min pêk a tum a ni.

²⁴LALPA chuan hêng thuruatte hi ti vek tûrin thu min pe a, kan ṭhatna tûrin LALPA kan Pathian chu ṭih fo tûrin min ti a; tichuan, kan za-in vawiin thleng hian min la zuah ta zêl a nih hi.

²⁵Hêng a thupêk min hrilh zawng zawng hi ngun taka kan zawm chuan kan tân a ṭha ang,’ ti ang che u.