Read Mizo Lushai Deuteronomy 7 Bible Online

Deuteronomy 7 - Mizo Lushai bible

Deuteronomy 7

¹“LALPA in Pathian chuan in neih tûr ramah chuan a hruai lût ang che u a, chûnga awm hnam sarih, nangni aia tam zâwk leh chak zâwk, Hit mi te, Girgas mi te, Amor mi te, Kanan mi te, Periz mi te, Hiv mi te leh Jebus mi te chu a hnawh chhuahsak ang che u.

²LALPA in Pathianin in kuta a pêk hunah che u chuan in hneh ang a, in that vek tûr a ni. Thu thlunpui suh ula, lainat hek suh u.

³Inneih pawlh suh u, in fate nupui pasalah neihsak hek suh u.

⁴In fate an hruai kawi ang a, pathian dang an biaktîr mai ang; tichuan, LALPA chu in chungah a thinur ang a, a tiboral mai ang che u.

⁵Chuvângin, an maichâmte chu ṭhiatsak vek ula, an lungphunte tichhia ula, an Aseri lim phunte chu kit ula, an thing milimte chu hâl vek ang che u.

⁶“Nangni zawng, LALPA, in Pathian tâna serh hran in ni a; LALPA, in Pathian chuan khawvêla hnam tinrêng zîng ata a pual bîk ni tûrin a thlang tawh che u a ni.

⁷Hnam dang aia in tam zâwk avânga hmangaiha thlang che u a ni lo va; hnamah chuan a tlêm ber in ni asin.

⁸LALPA chuan a hmangaih hrim hrim avâng che u leh in pate hnêna a thutiam tihpuitlin a duh avângin, Aigupta lal Farawa bawih ata, kut chak takin a tlan chhuak che u a ni.

⁹Chuvângin, hre rawh u, LALPA, in Pathian chauh chu Pathian a ni a, Pathian rinawm, a thutiam vawng tlat a, amah hmangaiha a thupêk zâwmtute chunga chhuan sâng thlênga ngilnei ṭhîn chu a ni.

¹⁰Amah hawtute erawh chu tichhe tûrin a thungrûl ang a, amah hawtu chu a zuah lo vang a, an dam chhûng la lain a hrem ang.

¹¹Chuvângin, thupêk te, thuruat te leh awm dân tûr te vawiina ka hrilh che u hi in zâwm tûr a ni.

¹²“Hêng awm dân tûrte hi in pawisak a, hetianga in awm a, in zawm chuan LALPA, in Pathian chuan in pate hnêna a tiam ang khân a thuthlung chu in tân a hlen ang a, in chungah ngil a nei ang.

¹³A hmangaih ang che u a, malsâwmin a tipung ngei ang che u. In pate hnêna pêk a tiam ramah chuan in fate chu mal a sâwm ang a, in rama in thei phunte a tirah tiar tuar ang a, in buh te, in uain te, in hriak te a tihlâwk ang a, in kêl leh berâm te tam takin a tipung ang.

¹⁴Hnam dang zawng zawng aiin in hmuingîl ang a, in zînga mipa emaw, hmeichhia emaw ching an awm lo vang.

¹⁵LALPA chuan in zîng ata natna tinrêng a la bo ang a, Aigupta rama hri te kha in vei ve lo ang a, nangmahni hawtuten an vei thung ang.

¹⁶LALPA in Pathianin a pêk che u rama hnamte chu tiboral ula, khawngaih suh u, an pathiante pawh in be ve tûr a ni lo; chu chu in awhna tûr thang a ni si a.

¹⁷“Hêng hnamte hi keini aiin an tam a, engtin nge kan hnawh chhuah theih ang?’ ti rilru suh u.

¹⁸Anni chu in hlau tûr a ni lo. Farawa leh Aigupta mite, LALPA, in Pathianin a sawisak dân kha hre reng ang che u.

¹⁹Râpthlâk tak taka Farawa a hrem te kha in hmu a, thil mak leh chhinchhiahna te tiin ama kut chak tak hmangin a hruai chhuak che u a nih kha: khatiang bawk khân in mi hlauhte chungah ti ve leh rawh se.

²⁰Chu lo pawh chu, LALPA, in Pathianin in zîngah khawinghal a tîr ang a, in thah bângte leh biru in hmuh lohte chu an zûk hlum vek ang.

²¹Anni chu hlau rêng rêng suh u, LALPA in Pathian, Pathian ropui tak leh hlauhawm tak hian a awmpui reng che u a ni.

²²“LALPA, in Pathian chuan chûng hnamte chu zawi zawiin a ni a hnawh chhuah dâwn ni; anni chu in tihboral thuai a phal dâwn lo; chutilo chuan ram sakawlh an pung chak lutuk ang.

²³LALPA, in Pathian chuan anni chu a pe ngei dâwn che u a; a tichiai chiam ang a, an chhe zo tho dâwn a ni.

²⁴An lalte chu in kutah a pe ang a, vân hnuaia an hming hriat tawh hauh loh tûrin a tiboral ang; tu mah lo dang thei che u an awm lo vang a; in tichhe vek dâwn a ni.

²⁵Thing milim, an tuk chawpte chu in hâl ang a, a tuamna tangkarua leh rangkachakte chu ît suh ula, la hek suh u; in tân awhna thang hlauhawm tak a ni thei ang. LALPA, in Pathian tân thil tenawm a ni.

²⁶Chutiang thil tenawm chu in inah in la lût tûr a ni lo, nangni pawh chûng ang mai chuan in tenawm ve dah ang e. In ten êm êm ang a, in haw hle bawk tûr a ni, LALPA ânchhe dawng an ni si a.