Read Mizo Lushai Deuteronomy 8 Bible Online

Deuteronomy 8 - Mizo Lushai bible

Deuteronomy 8

¹“In pate hnêna LALPA, in Pathianin ram pêk a tiam chu dam taka in luah a, in neiha, in pun theih nân vawiina thupêk ka hrilh che u hi zâwm vek ang che u.

²LALPA, in Pathian chuan kum sawmli chhûng thlalêrah a vahvaihtîr che u kha hre reng rawh u; a tirethei che u a, a fiah che u a, a thupêkte chu in zâwm dâwn nge dâwn lo in rilru hriat a duh a ni.

³A tirethei che u a, a tirilṭâm che u a, a chângin in hriat ngai loh, in pi pute pawhin an hriat ngai loh chawin a hrai che u a; mihring hi chaw ring ringawtin a nung tûr a ni lo va, LALPA kâ aṭanga thu tinrêng chhuakte chu a ring bawk tûr a ni tih in zir a duh avâng a ni.

⁴Hêng kum sawmli chhûng hian kawr pakhat mah in ha chhe lo va, in keruh a nâin a vûng hek lo.

⁵Miin a fa a thunun a, a hrem ang hian, LALPA, in Pathian chuan a thunun ṭhîn che u a ni tih in hre reng tûr a ni.

⁶LALPA, in Pathian thupêk chu in zâwm ang a, a duh angin in nung ang a, ani chu in ṭih tûr a ni.

⁷LALPA, in Pathian chuan ram ṭha takah a hruai dâwn che u a ni, luite tui luang hawk hawk tamna, tuihna leh lei chhûngrila tui lo chik chhuak tamna, tlâng leh ruam nuam tak tak te,

⁸huit leh barli ṭhatna ram, grep te, theipui te, theibuhfaite rah duhna, Oliv leh khawizu tamna ramah chuan a hruai dâwn che u a;

⁹chutah chuan, tlâkchham nei lovin duh tâwkin chaw in ei ang a; chûng rama lungte chu thîr a ni a, tlângah te chuan dâr laih chhuah tûr a tam mai.

¹⁰Kham tâwk ei tûr in neih a, ram ṭha tak a pêk che u avângin LALPA, in Pathian chu in fak ang.

¹¹“A thupêk te, awm dân tûr a tih te, a thuruatte vawiina ka hrilh che u hi zâwm duh lovin LALPA, in Pathian hi in theihnghilh hlauh ang e, fîmkhur rawh u.

¹²Puar tâwk leh kham tâwk ei tûr in neih a, in ṭha tak tak in saka in luah hunah,

¹³in bâwng te, berâm leh kêl te a lo puna, tangka leh rangkachak in lo ngah a, in neih apiang a lo hmuingîl viau hunah,

¹⁴in chapo anga Aigupta bawih aṭanga hruaichhuaktu che u LALPA, in Pathian chu in theihnghilh hlauh dah ang e.

¹⁵Ani chuan thlalêr ram zau tak leh hlauhawm pui puiah a hruai tlang che u a, rûl te, rûl chuk na mi te leh khawmualkaikuang tamna ramah te, tui awm lohna ram rovah te in kal khân lungpui chang tak aṭangin tui a pe che u a nih kha.

¹⁶Thlalêrah khân in pate pawhin an hriat ngai loh Mana chuan a châwm che u a, fiah nân che u leh in tân a ṭha dâwn nge dâwn lo in hriat theih nân hrehawm a tuartîr ṭhîn che u a ni.

¹⁷Tichuan, in chak avâng leh thil in tih theih avânga hausa emaw inti suh ang che u.

¹⁸LALPA, in Pathianin hausa thei tûrin a tichak che u a ni tih hre reng ang che u; in thlahtute hnêna a thutiam chu ani chuan a la thlah loh avâng a ni e.

¹⁹LALPA, in Pathian chu theihnghilh rêng rêng suh u, pathian dangte ngaihsakin chibai bûksan hek suh u; chutianga in tih vaih chuan, ka hrilh lâwk a che u, in boral ngei ngei ang.

²⁰LALPA, in Pathian aw hi in pawisak loh chuan, LALPAN in luahlan tûr hnamte a tiboral angin nangni pawh a tiboral ngei ang che u.