Read Mizo Lushai Deuteronomy 9 Bible Online

Deuteronomy 9 - Mizo Lushai bible

Deuteronomy 9

¹“Aw Israel-te u, ngaithla teh u, vawiin hian Jordan lui in kân dâwn ta a; nangni aia tam leh chak zâwk hnam luahlan tûr leh khawpui lian tak tak, an kulh bang vân tawng hial te chu in lâksak dâwn a ni.

²A mi chêngte lah mi lian pui pui, sâng tak tak, Anak-ho thlahte an ni a, ‘tu nge Anak-hote chu dang zo vang?’ an tih ṭhinte chu an ni.

³Vawiin hian hre rawh u, LALPA, in Pathian chu in hmahruaitu a ni, in hmaah meialh chak tak angin a kal zêl dawn, a tichhia ang a, in hmaah a titlâwm zêl dâwn. LALPA lo sawi tawh angin in hnawt chhuak vek ang a, an boral thuai ang.

⁴Hêng mite hi LALPA, in Pathianin a hnawh chhuah hunah, ‘kan ṭhat avângin LALPA chuan he ram hi min pe a, hêng hnamte hi an sual avângin a hnawt chhuak a ni,’ in ti ang e.

⁵In ṭhat avâng leh in nun a ngîl avânga an ram hi neihsak in ni lo; hêng hnamte hi an sual êm avângin LALPA, in Pathian hian a hnawt chhuak a ni; Abrahama te, Isaka te, Jakoba te hnêna a thutiam kha tihpuitlin a tum a ni.

⁶Chuvângin, LALPA, in Pathianin ram ṭha tak hi, in ṭhat avânga pe che u a ni lo tih hre reng rawh u, mi luhlul tak in nih hi.

⁷“Thlalêrah khân LALPA, in Pathian chu in tihthinur ṭhin kha hre reng ula, theihnghilh suh u. Aigupta ram in chhuahsan ni aṭanga tûn thlengin LALPA lakah hel in chîng hle a ni.

⁸Horeb tlângah pawh khân LALPA chu in tithinur a, tihboral vek che u duh hial khawpin a thinur a nih kha.

⁹Nangni nêna LALPA thuthlung, lungphêka ziak chu, la tûrin tlângah ka han kal a, ni sawmli leh zan sawmli eng mah ka ei lo va, ka in hek lo.

¹⁰Inkhâwmpui lai khân mei aṭangin LALPA chuan in hnênah thu a sawi a, chûng zawng zawng chu lungphêkah, Pathianin ama kut ngeiin a ziak a, LALPA chuan mi pe a.

¹¹Ni sawmli leh zan sawmli a ral hnu chuan thuthlung ziakna lung phêk pahnih chu LALPA chuan mi pe a.

¹²“LALPA chuan ka hnênah, ‘Tho la, chhuk thla vat teh, Aigupta ram aṭanga i mi hruai chhuahte khu an che khawlo nasa mai, awm dân tûr ka hrilh an pênsan a, milim chhûn chawp an siam tâk khu,’ a ti a.

¹³“LALPA chuan, ‘Hêng mite luhlulzia hi ka hria alâwm.

¹⁴Lo ngawi mai rawh, tu ma hriat tawh hauh loh tûrin ka han tiboral teh ang. Nangma thlahte aṭangin anni aia thil ti thei zâwk leh tam zâwk hnam ka din mai teh ang,’ a ti bawk a.

¹⁵“Tlâng aṭang chuan ka kîr thla a, thuthlung ziakna lungphêk pahnih chu ka keng a.

¹⁶LALPA, in Pathianin awm dân tûr a hrilh che u kha in lo pênsan dêr tawh a, bâwngno lim chhûng chawpin in Pathian lakah thil sual in ti ta tih ka hmu a.

¹⁷Lungphêk pahnih chu ka keng a, in hmuh ngeiah ka vawm keh ta a nih kha.

¹⁸In sualna avâng leh LALPA tithinur tûra a pawi in khawih luih avângin LALPA hmaah chuan ni sawmli leh zan sawmli eng mah eia in lovin ka bawkkhup leh a.

¹⁹Nuai bo vek che u duh khawp hialin LALPA chu a thinur a; a thinurna nasa tak chu a lo thawk ang tih ka hlau a ni; mahse, chumi ṭum pawh chuan ka thu chu LALPA chuan min lo ngaihthlâksak a.

²⁰Tihhlum duh hial khawpin Arona chungah pawh LALPA chu a thinur a, a tân pawh ka ngensak a.

²¹In thil sual tih bâwngno lim chu ka la a, meiah ka rawh a; vaivut anga dipin ka râwt a, tlâng aṭanga lui lo luang thlaah chuan ka phul a.

²²“Tabera-ah te, Masa-ah te, Kibrot-hatava-ah te khân LALPA in Pathian chu in tithinur a.

²³Kades-barnea-ah khân, ‘Kal ula, ram ka pêk tûr che u chu han luah rawh u le,’ tiin LALPA chuan a tîr che u a; mahse, LALPA in Pathian thupêk chu in do tlat a, a thu chu in ring ngam lo va, in ngaithla duh lo a nih kha.

²⁴Ka hriat tirh che u aṭangin LALPA lakah in hel reng mai.

²⁵“Tihhlum vek che u a tum avângin ni sawmli leh zan sawmli chu LALPA hmaah ka bawkkhup a;

²⁶LALPA hnênah chuan ka ṭawngṭai a, ‘Aw LALPA Pathian, i mi, i rochante hi tihlum vek teh suh, Aigupta ram ata chu ropui takin i tlan chhuak a, kut chak takin i hruai chhuak a nih kha.

²⁷I chhiahhlawh Abrahama te, Isaka te, Jakoba te hre reng la, hêng mite luhlulna te, an sualna leh an khawlohnaah te ngawt hian en teh suh.

²⁸Chutilo zawng, Aigupta miten, ‘LALPA chuan pêk a tiam ram chu a hruai thleng zo lo a ni; a huat avângin thlalêra thah atân a hruai chhuak a lo nih zâwk hi,’ an ti ang asin.

²⁹I mi, i rochante an ni miau a, kut chak leh bân phar meuhva i hruai chhuahte kha an ni si a,’ ka ti a.