Read Mizo Lushai CHANCHIN ṬHA JOHANA ZIAK 1 Bible Online

CHANCHIN ṬHA JOHANA ZIAK 1 - Mizo Lushai bible

CHANCHIN ṬHA JOHANA ZIAK 1

¹A tîrin Thu a awm, Thu chu Pathian hnênah a awm a, Thu chu Pathian a ni.

²Ani chu a tîr aṭangin Pathian hnênah a awm.

³Engkim amah hmanga siam a ni a; thil siam rêng rêng amah tel lo chuan eng mah siam a awm lo.

⁴Amahah chuan nunna a awm a, chu nunna chu mihringte tâna êng a ni.

⁵êng chu thim zîngah a lo êng a, thimin chu chu a ngam lo.

⁶Pathianin mi pakhat a rawn tîr a, a hming chu Johana a ni.

⁷Ani chu êng thu chu hriattîr tûra lo kal a ni, mi zawng zawngin a thuchah chu an hriata an rinna tûrin.

⁸Ani chu êng chu a ni lo, êng thu chu hriattîr tûra lo kal a ni.

⁹Chu êng chu êng tak tak, khawvêla lo kala, mi tin rawn êntu chu a ni.

¹⁰Khawvêlah a awm a, amah hmanga khawvêl chu siam a ni a, khawvêlin amah chu a hre si lo.

¹¹Ama ram ngeiah a lo kal a, ama miten an lo lâwm si lo.

¹²Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a.

¹³Chûng mite chu thisen hrin an ni lo va, tisa duhzâwnga hrin pawh an ni lo va, mipa duhzâwnga hrin an ni hek lo, Pathian hrin an ni zâwk e.

¹⁴Tin, thu chu tisaah a lo chang a, kan zîngah a lo awm ta a. A ropuizia kan hmu, Pa Fa mal neih chhun ropuina chu, khawngaih leh thutakin a khat.

¹⁵Johanan a chanchin a hril a, “ ‘Ka hnunga lo kal tûr chu keimah aiin a ropui zâwk,’ ka tih kha he mi hi a ni, ka awm hmaa awm tawh a ni si a,” tiin a au va.

¹⁶A khawngaihna famkim aṭangin khawngaihna kan dawng ṭheuh, khawngaihna hlîr khawngaihna hlîr.

¹⁷Dân chu Mosia hmanga pêk a ni a, khawngaihna leh thutak erawh chu Isua Krista zâra lo thleng a ni.

¹⁸Tu man Pathian an hmu ngai lo va, Pa Fa neih chhun, a ângchhûnga awm chuan a chanchin a hriattîr ta a ni.

¹⁹Jerusalem khuaa Juda-ten, “Tu nge i nih?” tia zâwt tûra Puithiamte leh Levia chite an tirh laia Johana thu lo sawi chu hei hi a ni.

²⁰Zêp lovin, “Kei zawng Krista chu ka ni lo,” tiin chiang takin a inpuang a.

²¹“A nih leh tu nge i nih le? Elija i ni em?” tiin an zâwt leh a. Ani chuan, “Ka ni lo,” a ti a. “Zâwlnei kha i ni em?” an ti a; “Ni lo,” tiin a chhâng leh a.

²²Anni chuan, “Min tîrtute kan chhân theih nân tu nge i nih min hrilh teh, i chanchin eng nge sawi tûr i neih?” an ti a.

²³Ani chuan, “ ‘Lalpa kawng tingîl rawh u,’ tia, Thlalêra au aw, zâwlnei Isaian a sawi kha ka ni e,” a ti a.

²⁴Chûng mite chu Farisai-te tirh an ni.

²⁵Anni chuan, “Krista tal, Elija tal, Zâwlnei tal chu i nih si loh chuan, engati nge i baptis si le?” tiin an zâwt leh a.

²⁶Johana chuan, “Kei chuan tuiin ka baptis a, in zîngah mi pakhat, in hriat loh a ding a ni.

²⁷Ani chu ka hnungah a lo kal a; mahse, a pheikhawk hrui phelh tlâk pawh ka ni lo ve,” a ti a.

²⁸Chûng thil chu Johanan a baptis-na hmun Jordan lui râla Bethani khuaah an ti a ni.

²⁹A tûkah chuan Johanan Isua amah a rawn panin a hmu a, “En teh u, Pathian Berâmno, khawvêl sual la botu saw.

³⁰Saw mi saw a ni, ‘Ka hnunga lo kal tûr, keimah aia ropui zâwk, ka awm hmaa awm tawh,’ ka tiha kha.

³¹Amah chu ka lo hre si lo; nimahsela, Israel-ten amah an hriat theih nân kei hi tuia baptisma chantîrin ka lo kal a ni,” a ti a.

³²Hei hi Johanan thu a hriattîr dân chu a ni, “Thlarau chu ṭhuro angin vân aṭanga lo chhuka, a chunga fu rengin ka hmu a.

³³Amah chu ka la hre lo va; nimahsela, tuia baptis tûra mi tîrtu khân ka hnênah, ‘Mi, a chunga Thlarau lo chhuka, fu ta reng i hmuh chu Thlarau Thianghlima baptistu tûr chu a ni ang,’ a ti a.

³⁴Chu chu ka hmu ta a, he mi hi Pathian Fapa a ni tih ka hriattîr a che u,” tiin.

³⁵A tûk lehah chuan Johana chu a zirtîrte pahnih nên an ding a.

³⁶Isua a vei a vei chu an thlîr a, “En teh u, Pathian Berâmno saw!” a ti a.

³⁷A zirtîr pahnihten a sawi chu an hriat chuan, Isua chu an zui ta a.

³⁸Isua chu a han lehhawi a, amah an rawn zui chu a hmu a, an hnênah, “Eng nge in zawn?” a ti a. Anni chuan, “Rabi, (chu chu zirtîrtu tihna a ni) khaw nge i awm?” an ti a.

³⁹“Rawn en ta che u,” a ti a. Tichuan, a hnênah an kal a, a awmna chu an va hmu a, chumi ni chuan a hnênah an awm ta a. Tlai dâr li vêl a ni.

⁴⁰Johana thu sawi hriaa Isua zuitu pahnihte chu, pakhat chu Andria, Simon Petera unau a ni a.

⁴¹Ani chuan a hmasa berin a unau Simona a va zawng hmu a, “Mesia, (chu chu Krista tihna a ni) kan hmu ta,” a va ti a.

⁴²Tin, Isua hnênah a rawn hruai a. Isuan ani chu a lo en a, “Johana fapa, Simona i ni, Kifa tih i ni ang,” a ti a. Kifa chu Petera tih nên thuhmun a ni a, lungpui tihna a ni.

⁴³A tûkah chuan Isuan Galili rama kal a tum a, Filipa a hmu a, a hnênah, “Mi zui rawh,” a ti a.

⁴⁴Filipa chu Andria leh Petera awmna khua, Bethsaida khuaa mi a ni.

⁴⁵Filipa chuan Nathanaela a hmu a, a hnênah, “A chanchin Dân lehkhabua Mosian a ziak, zâwlneite pawhin an ziak kha, amah chu kan hmu ta, Nazaret Isua, Josefa fapa chu,” a ti a.

⁴⁶Nathanaela chuan, “Nazaret khua aṭangin thil ṭha a chhuak thei em ni?” a ti a.Filipa chuan, “Rawn en ta che,” a ti a.

⁴⁷Isuan Nathanaela lo kal a hmuh chuan a chanchin a lo sawi a, “En teh u, Israel mi tak, mi bum tumna rêng nei lo saw,” a ti a.

⁴⁸Nathanaela chuan, “Engtin nge mi hriat le?” a ti a. Isuan, “Filipan a koh hma che-a, theipui bula i awm lai khân ka hmu che asin,” a ti a.

⁴⁹Nathanaela chuan, “Rabi, Pathian Fapa i ni. Israel-te lalber i nih hi,” tiin a chhâng a.

⁵⁰Isuan, “Theipui bulah ka hmu che asin,’ i hnêna ka tih avângin i ring a ni maw? Hêng aia thil ropui zâwk hi i la hmu ang,” a ti a.

⁵¹Tin, an hnênah, ‘Thu dik tak ka hrilh a che u, vân inhawnga, Pathian vântirhkohte Mihring Fapa chunga chhuk leh chho in la hmu ang,” a ti a.