Read Mizo Lushai CHANCHIN ṬHA JOHANA ZIAK 11 Bible Online

CHANCHIN ṬHA JOHANA ZIAK 11 - Mizo Lushai bible

CHANCHIN ṬHA JOHANA ZIAK 11

¹Bethani khuaa mi pakhat Lazara a damlo va, chu khua chu Mari leh a laizâwn Marthi awmna a ni.

²Damlo chu Mari nuṭa Lazara a ni. Mari chu Lalpa hriak rimtui chulha, a sama a ke hrûksaktu kha a ni.

³Tichuan, a farnute chuan, “Lalpa, i hmangaih kha a dam lo ve,” tiin mi an hrilhtîr a.

⁴Isuan a lo hriat chuan, “He natna hi thihna tûr a ni lo ve, Pathian ropuina tûr a ni zâwk. Hemi avâng hian Pathian Fapa hi chawimawiin a awm dâwn a ni,” a ti a.

⁵Isuan Marthi leh a laizâwnnu leh Lazara chu a hmangaih a;

⁶mahse, a damlo tih a hriatin a awmna ngaiah ni hnih a la awm ta cheu va.

⁷Chumi hnu chuan a zirtîrte hnênah, “Judai ramah i kal leh ang u,” a ti a.

⁸A zirtîrte chuan, “Zirtîrtu, tûn lawkah Juda-ten lunga den che an tum a, chutah chuan i kal leh ang maw?” an ti a.

⁹Isuan a chhâng a, “Chhûnah dârkâr sâwm leh pahnih a awm lo vem ni? Mi chhûna a lên chuan a petek ngai lo, he khawvêl êng hi a hmuh avângin.

¹⁰Zâna a lên erawh chuan a petek ṭhîn, amahah êng a awm loh avângin,” a ti a.

¹¹Chu chu a sawi zawhin an hnênah, “Kan ṭhian Lazara kha a muhîl a; mahse, amah kaitho tûrin ka kal dâwn a ni,” a ti a.

¹²A zirtîrte chuan a hnênah, “Lalpa, a muthilh chuan a ṭha leh mai ang chu,” an ti a.

¹³Isuan a thih thu a sawina chu mut pangngaia a muthilh thu a sawina emaw an ti a.

¹⁴Chutichuan, Isuan fiah takin a sawi a, “Lazara a thi a ni;

¹⁵nangmahni avângin chuta ka awm lo chu ka lâwm a ni, in rin theih nân; eng pawh ni se, a hnênah i kal ang u,” a ti a.

¹⁶Thoma, Phîra an tih chuan a zirtîrpuite hnênah, “Thih leh thih, a hnênah i kal ve ang u,” a ti a.

¹⁷Isua a va thlen chuan ni li thlânah a awm tawh tih a hria a.

¹⁸Bethani chu Jerusalem kiang lawka awm a ni, km. thum vêla hla a ni.

¹⁹Juda-te zînga tam tak, an nuṭa thih chungchânga Marthi leh Mari khawhar lênpui tûrin an lo kal a.

²⁰Marthi chuan Isua a lo thleng dâwn tih a hriat chuan a va hmuak a; Mari erawh chuan in a nghâk a.

²¹Marthi chuan Isua hnênah, “Lalpa, hetah awm ni la chu, ka nuṭa a thi lo tûr.

²²Tûnah pawh Pathian hnêna i dîl apiang Pathianin a pe ang che tih ka hria e,” a ti a.

²³Isuan, “I nuṭa a tholeh ang,” a ti a.

²⁴Marthiin, “Ni kin nia thawhlehnaah chuan a tholeh ang tih chu ka hria e,” a ti a.

²⁵Isuan, “Kei hi thawhlehna leh nunna chu ka ni, tu pawh mi ring chu thi mah sela, a nung reng ang;

²⁶tu pawh mi nung la dam kei mi ring chu, kumkhuain a thi lo vang; chu chu i ring em?” a ti a.

²⁷Ani chuan, “Ring e, Lalpa, Krista, Pathian Fapa khawvêla lo kal tûra chu i ni tih ka ring e,” a ti a.

²⁸Chu chu a sawi zawhin a kal a, a laizâwn Mari chu a rûk têin a va ko va, “Zirtîrtu hetah a awm a, a ko va che,” a ti a.

²⁹Ani chuan chu chu a hriat veleh a tho thuai a, a hnênah a kal ta a.

³⁰Isua chu khuaah a lût rih lo va, Marthiin a va hmuhna hmunah khân a la awm a.

³¹Juda-te, in chhûnga khawhar ṭhutpuia awmte chuan, Mari a tho thuai a, a chhuak ta chu an hmuhin, thlânah ṭap tûrin a kal dâwn emaw an ti a, an zui a.

³²Marin Isua awmna a va thlena, amah a hmuh chuan a ke bulah a bawkkhup a, “Lalpa, heta awm ni la chu, ka nuṭa a thi lo tûr,” a ti a.

³³Isuan Mari ṭap leh amah rawn zuitu Juda-te ṭap chu a hmu a, a rilru a khawih a, a hnuk a ulh a.

³⁴“Khawiah nge in phûm?” a ti a. Anni chuan, “Lalpa, lo kal la, en teh,” an ti a.

³⁵Isua a ṭap ta a.

³⁶Juda-te chuan, “En teh u, Lazara hi a va lo hmangaih êm!” an ti a.

³⁷An zînga ṭhenkhat chuan, “Mitdel mit tivârtu hian he mi pawh hi a thih lohtîr thei dâwn lâwm ni?” an lo ti a.

³⁸Isua chu hnuk ulh ṭeuh chungin thlân chu a thleng ta a. Pûk a ni a, lunga khâr a ni.

³⁹Isuan, “Lung hi dah sawn rawh u,” a ti a. A thia farnu Marthi chuan a hnênah, “Lalpa, tûnah zawng a rimchhe tawh ang, a thihna ni li a ni tawh si a,” a ti a.

⁴⁰Isuan a hnênah, “I rin chuan Pathian ropuizia i hmu ang ka ti lo che em ni?” a ti a.

⁴¹Tichuan, lung chu an dah sawn ta a. Isua chu a vânvadâk a, “Ka Pa, ka thu i ngaihthlâk avângin lâwmthu ka hrilh a che.

⁴²Ka thu i ngaithla ṭhîn tih pawh ka hria; nimahsela, heta pung khâwmte avâng hian chu chu ka sawi a ni, nangin kei mi tîr tih an rin theih nân,” a ti a.

⁴³Chu chu a sawi zawh chuan aw ring takin a au va, “Lazar, lo chhuak rawh,” a ti a.

⁴⁴Mitthi chu a kut a ke thlân puana inzem chungin a lo chhuak a, a hmai pawh inhrûkna puana tuam a ni a. Isuan an hnênah, “Phelh ula, kaltîr rawh u,” a ti a.

⁴⁵Mari lênpuitu, Isua thiltih hmutu Juda-te zînga tam tak chuan amah chu an ring ta a.

⁴⁶Ṭhenkhat erawh chu Farisai-te hnênah an kal a, Isua thiltihte chu an va hrilh a.

⁴⁷Chutichuan, Puithiam lalte leh Farisai-te chuan Sanhedrin an ko va, “He mi hian chhinchhiahna thil mak tam tak a ti ta si a, engtin nge kan tih tâk ang?

⁴⁸Hetianga kan thlahzal chuan mi zawng zawngin amah an ring dâwn a, Rom mite an lo kal ang a, kan hmun thianghlim leh kan hnam hi min rawn tihchhiatsak mai ang,” an ti a.

⁴⁹An zînga pakhat, Kaiafa, chumi kuma Puithiam lalber chuan an hnênah, “In va han hre lo êm!

⁵⁰Mipui aia mi pakhat a thiha, hnam pum pui a chimih loh chu in tân a ṭha zâwk tih in hrethiam lo va ni,” a ti a.

⁵¹Chu chu ama rilru puak chhuaka sawi a ni lo; chumi kum chuan Puithiam lalber a ni a, an hnam aia Isua thih tûr a sawi lâwk a ni zâwk.

⁵²An hnam ai mai pawh ni lovin, Pathian fa khawvêla darhte pâwl khata a hruai khâwm lehna tûr pawh a sawi a ni.

⁵³Chumi aṭang chuan amah tihhlum an tum ta a.

⁵⁴Chuvângin, Isua chu a langin Juda-te zîngah a lêng ta lo va, chuta ṭang chuan thlalêr dep rama khaw pakhat Efraim an tihah chuan a kal a, chutah chuan a zirtîrte nên an awm ta reng a.

⁵⁵Juda-te Kalhlên Kût a lo hnai ta a, thingtlâng aṭangin mi tam tak chu Kalhlên Kût hmaa inthian tûrin Jerusalem-ah an chho va.

⁵⁶Isua chu an zawng a, Tempula an din ho laite chuan, “Eng nge in rin dân? Kûtah hian a lo kal lo vang maw?” an inti hlawm a.

⁵⁷Puithiam lalte leh Farisai-ten amah an man theih nân, tu pawhin a awmna an hriat chuan, thuneitute an hriattîr tûr a ni tih thu an pe si a.