Read Mizo Lushai CHANCHIN ṬHA JOHANA ZIAK 12 Bible Online

CHANCHIN ṬHA JOHANA ZIAK 12 - Mizo Lushai bible

CHANCHIN ṬHA JOHANA ZIAK 12

¹Kalhlên Kût hma ni rukah, Isua chuan a mitthi kaihthawh Lazara awmna Bethani a lût a.

²Chutah chuan a tân zanriah an buatsaih a, Marthiin chaw kîl ho chu a vil a, Lazara pawh a kîlpuitute zîngah a tel a.

³Marin nard hriak rimtui hlîr hlak, man tam tak, no khat a rawn keng a, Isua keah a chulh a, a ke chu a samin a hru a. Hriak rim chu inah chuan a khat ta rum rum a.

⁴A zirtîrte zînga pakhat, Juda Iskariota, amah mantîrtu tûr chuan,

⁵“Engati nge he hriak rimtui hi duli zathuma hralhin mi retheite an pêk zâwk loh?” a ti a.

⁶Mi retheite a ngaihsak avânga chu chu sawi a ni lo, rûkru a ni a, tangka ip a kawl a, a chhûnga awm chu a lâk ṭhin avâng zâwk a ni.

⁷Isuan, “Eng mah tih suh u, mi phûm ni atân ring rawh se.

⁸In zîngah mi retheite chu an awm reng alâwm, kei erawh chu in zîngah ka awm reng dâwn lo,” a ti a.

⁹Juda mi tam takin chutah chuan a awm tih an lo hre ta a, Isua chauh hmuh duha lo kal an ni lo va, mitthi zîng ata a kaihthawh Lazara hmuh an duh bawk a ni.

¹⁰Puithiam lalte chuan Lazara pawh chu tihhlum an tum ta a,

¹¹amah avânga Juda-te tam takin an pakaisana, Isua an rin tâk avângin.

¹²A tûkah chuan kûta lo kal mipui nasa takin Isua Jerusalemah a lo lût dâwn tih an hria a,

¹³tûmkaute an keng a, a hmuak tûrin an chhuak a, “Hosana, Lalpa hminga lo kal chu fakin awm rawh se, Israel lal chu fakin awm rawh se,” tiin an au dual dual a.

¹⁴Isuan sabengtung a hmu a, a chungah a chuang a,

¹⁵“Hlau suh, Zion fanu, En teh, i lal chu a lo kal e, Sabengtung no chunga chuangin,” tih ziak ang khân.

¹⁶Chûng chu a zirtîrten a tîrin an hrethiam lo va; nimahsela, Isua chawimawia a awm hnu chuan a chungchâng chutianga ziak a ni a, a chungah chûng thil chu an lo ti a ni tih an hre ta a.

¹⁷Lazara thlân ata a koh chhuaha, mitthi zîng ata a kaihthawh laia a hnêna mipui awmte khân chu thu chu an hriattîr zêl bawk a.

¹⁸Chu chhinchhiahna thil mak chu a ti tih an hriat avângin a ni, mipuite chuan amah an va hmuah ni.

¹⁹Farisai-te chuan, “Eng mah in tih thei lo a nih hi; en rawh u, khawvêlin amah an zui tâk hi,” an in ti a.

²⁰Kût laia Pathian chibai bûk tûra han kalte zîngah Grik tute emaw an tel a.

²¹Chûngte chu Galili rama Bethsaida khaw mi Filipa hnênah an kal a, “Ka pu, Isua hmuh kan duh e,” tiin an ngên a.

²²Filipa chuan Andria a rawn hrilh a, Andria leh Filipa chuan Isua an va hrilh a.

²³Isuan a lo chhâng a, “Mihring Fapa chawimawia a awm hun a lo thleng ta.

²⁴Thu dik tak ka hrilh a che u; buh fang leia a tlâka a thih loh chuan, a malin a awm reng mai a, a thih erawh chuan rah tam tak a chhuah ṭhîn.

²⁵Mahni nun thlahleltu chuan a hloh ṭhîn, he khawvêla mahni nun hawtu chuan a vawng reng ang a, chatuan nun a nei bawk ang.

²⁶Tu pawhin ka rawngbâwl an tum chuan mi zui rawh se, ka awmnaah ka rawngbâwltu pawh an awm ve ang. Tu pawhin ka râwng an bâwl chuan Pain a chawimawi ang.

²⁷“Tûnah ka rilru a mangang hle, eng nge ka sawi tâk ang le? ‘Ka Pa, hemi hun lakah hian mi chhandam rawh,’ ka ti dâwn em ni? Dâwn lo ve, he thil tuar tûr hian he hun hi ka lo thleng a ni.

²⁸Ka Pa, i hming chawimawi rawh,” a ti a. Chutichuan, vân aṭangin aw a lo chhuak a, “Ka chawimawi tawh, ka chawimawi leh ang,” a ti a.

²⁹Chuta mipui ding vete chuan aw chu an hriatin, “Khawpui a ri a ni,” an ti a; a ṭhenin, “Vântîrhkohvin a bia a ni,” an ti a.

³⁰Isuan a chhâng a, “Chu aw chu ka tâna lo chhuak a ni lo, in tân a ni zâwk e.

³¹Tûn hi khawvêl chungchâng ngaihtuah lai a ni, tûnah he khawvêl rorêltu hi paih chhuah a ni ang.

³²Kei lei ata khai kâna ka awm chuan, mi zawng zawng ka lamah ka hîp ang,” a ti a.

³³Chu chu eng tiangin nge a thih dâwn entîr nân a sawi a ni.

³⁴Mipui chuan an chhâng a, “Krista chu kumkhuain a awm reng dâwn tih Dân lehkhabu aṭangin kan hria a ni, engtiziaa nangin, ‘Mihring Fapa chu khai kânin a awm ang,’ ti nge i nih? Chu Mihring Fapa chu tu nge ni?” an ti a.

³⁵Isuan an hnênah, “Êng hi rei lo tê in zîngah a la awm rih ang; êng in la neih chhûng hian lêng rawh u, thimin a nang dâwn lo che u nia; thima lêng chuan a kalna chin a hre si lo;

³⁶êng in la neih chhûng hian êng hi ring rawh u, êng fate in nih theih nân,” a ti a. Chûng thu chu Isuan a sawi a, a kal ta daih a, an hmuh loh tûrin a biru ta a.

³⁷Chutiang chhinchhiahna thil mak tam tak chu an mit hmuhah ti mah se amah an ring si lo,

³⁸Zâwlnei Isaian: “Lalpa, kan thu sawi tuin nge ring? Lalpa kut pawh tu hnênah nge a lan?” a tih kha a lo thlen nân.

³⁹Hemi avâng hian an ring thei lo va ni, Isaian,

⁴⁰“An mit a tidel a, an thinlung a tingawng a, An mitin a hmuh loh nân leh, an thinlungin a hriatthiam loh nân. Chuti ni lo se, an hawi kîr leh ang a, Anni chu ka tidam tûr,” a tih leh ang khân.

⁴¹Isaian chûng thu a sawi chu a ropuizia a hmuh avângin a chanchin a sawi a ni.

⁴²Chuti chung pawhin hotute zînga mi tam takin Isua chu an ring ta a; amaherawhchu, Farisai-te avângin an insawi lang ngam lo, sunagog-a an hnawn loh nân.

⁴³Pathian chawimawina aiin mihring chawimawina an duh zâwk si a.

⁴⁴Isua a au chhuak a, “Tu pawh mi ring chu kei mi ring a ni lo va, mi tîrtu ring a ni zâwk e.

⁴⁵Tu pawh mi hmu chu mi tîrtu hmu a ni.

⁴⁶êntu atân khawvêla lo kal ka ni, mi ring apiang chu tu mah thima an awm loh nân.

⁴⁷Tu pawhin ka thu hriain zâwm lo sela, ani chu keiin thiam loh chantîr tûra lo kal ka ni lo va, khawvêl chhandam tûra lo kal ka ni zâwk si a.

⁴⁸Tu pawh mi hnara, ka thu pawm lo chuan a chungthu rêlsaktu tûr pakhat a nei. Ka thu sawi ngei kha ni kin ni-ah chuan a chungthu rêlsaktu a ni ang.

⁴⁹Keima phuahchawpin ka sawi lo va, mi tîrtu, Pa ngei chuan, ka sawi tûr leh ka ṭawng tûr thu mi pe zâwk a ni.

⁵⁰A thupêk chu chatuan nunna a ni tih kan hria. Chuvângin, Pain sawi tûra mi hrilh ang chu ka sawi a ni,” a ti a.