Read Mizo Lushai CHANCHIN ṬHA JOHANA ZIAK 13 Bible Online

CHANCHIN ṬHA JOHANA ZIAK 13 - Mizo Lushai bible

CHANCHIN ṬHA JOHANA ZIAK 13

¹Kalhlên Kût dâwn a ni a, Isuan he khawvêl chhuahsana, Pa hnêna a kal hun a thleng ta tih a hria a; ama mi khawvêla awmte chu a hmangaih a, a tâwp thlengin a hmangaih a ni.

²Tin, zanriah an kîl a, Diabola chuan Simon Iskariota fapa Juda chu Isua mantîr a lo tum rilrûktîr tawh a.

³Isuan, Pain engkim a kutah a dah tih leh Pathian aṭanga lo chhuak a ni a, Pathian hnênah a kal dâwn tih a hria a,

⁴a zanriah kîl lai chu a tho va, a kawrfual a hlîp a, inhrûkna puan a la a, a veng a.

⁵Tin, maihûnah tui a bun a, zirtîrte ke a sîl ta a, inhrûkna puan chuan a hru zêl a.

⁶Simon Petera hnên a lo thleng a, Petera chuan, “Lalpa, nang meuhvin ka ke i sil ang maw?” a ti a.

⁷Isuan a chhâng a, “Ka thiltih hi tûnah i hre lo; nimahsela, nakinah i la hria ang,” a ti a.

⁸Peteran a hnênah, “Ka ke zawng i sil tawp lo vang,” a ti a. Isuan a chhâng a, “I ke ka sil loh chuan eng mah mi ṭâwmpui thei lo vang,” a ti a.

⁹Simon Petera chuan a hnênah, “Lalpa, chuti chu, ka ke chauh ni lovin, ka kut leh ka lu pawh hi le,” a ti a.

¹⁰Isuan a hnênah, “Inbual tawh chu a ke chauh lo chu sil a ngai tawh lo, a pumin a fai alâwm. Nangni in fai e, in za erawh chuan a ni lo,” a ti a.

¹¹Amah mantîrtu tûr chu a hre si a; chuvângin, ‘In za chuan in fai lo,’ a ti a ni.

¹²An ke a sil zawh chuan, a kawr dah kha a ha a, a ṭhu leh ta a, an hnênah, “In chunga ka thiltih hi a awmzia in hria em?

¹³Nangnin, zirtîrtu leh Lalpa mi ti ṭhîn, in ti dik e, ka ni rêng a.

¹⁴Kei Lalpa leh zirtîrtu mahin in ke ka sil chuan, nangni pawh in ke in insilsak tûr a ni.

¹⁵In chunga ka tih anga in tih vena tûrin entawn tûr ka siamsak che u a ni e.

¹⁶Thu dik tak ka hrilh a che u, bawih a pu aiin a ropui lo, tîrhkoh pawh a tîrtu aiin a ropui hek lo.

¹⁷Chûng chu in hre ta a, in zawm chuan in lâwm ang.

¹⁸In zaa thu ka sawi lo; ka thlante chu ka hria; amaherawhchu: “Ka chhang eitu chu ka hmêlma a lo chang ta,” tih lehkha thu kha a lo thleng tûr a ni.

¹⁹Tûnah a lo thlen hma hian ka hrilh che u hi, a lo thlen hunah ani chu ka ni ngei tih in rin theih nân.

²⁰Thu dik tak ka hrilh a che u, ka mi tirh lo lâwmtu chuan keimah mi lâwm a ni a, kei mi lâwmtu chuan mi tîrtu a lâwm a ni,” a ti a.

²¹Isuan chûng thu chu a sawi zawhin a rilru a mangang a, “Thu dik tak ka hrilh a che u, in zînga mi pakhatin mi mantîr ang,” a ti a.

²²Tu ber nge a tih hre lovin zirtîrte chu an inen ta hlawm a.

²³A zirtîrte zînga pakhat, Isuan a hmangaih chu, Isua hnaih berah chaw kîlin a ṭhu a.

²⁴A tu ber nge a tih hriat nân zaizîrin Simon Peteran ani chu a zawhtîr a.

²⁵Tichuan, chu mi chu Isua âwm nghêngin a va thle phei a, “Lalpa, tu hian maw?” a ti a.

²⁶Isuan a chhâng a, “Chhang them ka chiaha ka pêka chu a ni ang,” a ti a. Chutichuan, chhang them chu a chiah a, Simon Iskariota fapa Juda chu a pe a.

²⁷Judan chhang them a lâk hnu chuan a chhûngah Setana a lût ta a. Isuan a hnênah, “I tih tûr chu ti thuai rawh,” a ti a.

²⁸Chuta ṭhuho zînga tu mahin chu chu eng vânga a hnêna sawi nge a nih an hre lo.

²⁹Ṭhenkhatin, Juda chuan tangka ip a kawl avângin Isuan, “Kût atân thil kan mamawhte lei rawh,” a ti emaw, “Mi retheite hnênah englo pêk tûr,” a ti emaw an ti a.

³⁰Juda chuan chhang them chu a la a, a chhuak ta nghâl a; zân a ni tawh a.

³¹A chhuah tâk hnu chuan Isuan, “Tûnah chuan Mihring Fapa chawimawiin a awm ta, amahah Pathian pawh chawimawiin a awm ta.

³²“Amahah Pathian chawimawia a awm chuan, Pathianin ani pawh a hmaah a la chawimawi ang a, a chawimawi nghâl bawk ang.

³³Naute u, rei lo tê in hnênah ka la awm rih a, nangnin mi zawng ang a, ‘Ka kalna tûrah in lo kal thei lo vang,’ Juda-te hnêna ka tih ang khân tûnah nangni hnênah pawh ka tih hi.

³⁴“Thupêk thar ka pe a che u; inhmangaih tawn rawh u; keiin ka hmangaih che u angin nangni pawh inhmangaih tawn rawh u.

³⁵In inhmangaih tawn chuan mi zawng zawngin ka zirtîrte in ni tih chumiah chuan an hria ang,” a ti a.

³⁶Simon Peteran a hnênah, “Lalpa, khawiah nge i kal dâwn?” a ti a. Isuan a chhâng a, “Tûnah chuan ka kalna tûrah mi zui thei lo vang a, nakinah mi la zui ang,” a ti a.

³⁷Peteran, “Lalpa, eng vângin nge tûnah pawh ka zui theih lo vang che? I tân chuan thih ka huam asin,” a ti a.

³⁸Isuan a chhâng a, “Ka tân thih i huam maw? Thu dik tak ka hrilh a che, nangin vawi thum mi phat hma loh chuan âr a khuang lo vang,” a ti a.