Read Mizo Lushai CHANCHIN ṬHA JOHANA ZIAK 14 Bible Online

CHANCHIN ṬHA JOHANA ZIAK 14 - Mizo Lushai bible

CHANCHIN ṬHA JOHANA ZIAK 14

¹“In thinlung mangang suh se, Pathian ring ula, kei pawh hi mi ring rawh u.

²Ka Pa inah awmna tam tak a awm a; chuti ni suh sela, in tân hmun siama ka kal tûr thu ka hrilh dâwn che u em ni?

³In tân hmun siama ka kal hnuah ka lo kîr leh ang a, ka hnênah ka hruai ang che u, ka awmnaah in awm ve theih nân.

⁴Ka kalna tûr kawng pawh in hria e,” a ti a.

⁵Thoman a hnênah, “Lalpa, i kalna tûr kan hre lo asin, engtin nge a kawng kan hriat theih ang?” a ti a.

⁶Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo.

⁷Kei mi hria ni ula, ka Pa pawh in hre tûr; tûnah zawng amah in hria e, in hmu tawh bawk,” a ti a.

⁸Filipan a hnênah, “Lalpa, Pa chu min hmuhtîr la, kan tân a tâwk ang,” a ti a.

⁹Isuan, “Filip, hei leh chen hi in hnênah ka awm a, mi la hre lo cheu maw? Kei mi hmu chu Pa hmu a ni. Engtiziaa Pa chu min hmuhtîr rawh ti nge i nih le?

¹⁰Kei Paah ka awm a, Pa keimahah a awm tih in ring lo vem ni? In hnêna thu ka sawite hi keima phuahchawpin ka sawi lo. Pa, keimaha awm reng chuan ama hna a thawk a ni zâwk.

¹¹Kei Paah ka awm a, Pa keimahah a awm ka tih hi ring rawh u; a nih loh leh thiltih avâng tal hian mi ring rawh u.

¹²Thu dik tak ka hrilh a che u, tu pawh mi ring chuan thil ka tih ang hi a ti ve ang; hei aia ropui zâwk pawh hi a la ti ang, Pa hnêna ka kal dâwn avângin.

¹³Ka hminga eng pawh in dîl chuan ka ti zêl ang; Pa chu Fapa avânga chawimawi a nih theih nân.

¹⁴Ka hmingin eng pawh mi dîl chuan ka ti zêl ang.

¹⁵“Nangnin mi hmangaih chuan, ka thupêkte in zâwm ang.

¹⁶Tin, keiin Pa ka dîl ang a, Awmpuitu dang a pe ang che u, in hnêna awm kumkhua tûrin,

¹⁷Thlarau dik tak, khawvêlin a hmuh lohva a hriat hek loh avânga a chan theih loh chu. Nangmahniah a nun avângin nangni chuan amah in hria e, in hnênah a awm reng si a.

¹⁸Fahrahin ka kalsan lo vang che u, in hnênah ka lo kal leh ang.

¹⁹Rei lo tê a chinah khawvêlin mi hmu tawh lo vang, nangni erawh chuan mi hmu ang, kei ka nun avângin nangni pawh in nung ve ang.

²⁰Chutih hunah chuan kei Paa ka awm te, nangni keimaha in awm te, kei nangmahnia ka awm te in la hria ang.

²¹Tu pawh ka thupêkte pawma zâwmtu chu mi hmangaihtu a ni; mi hmangaihtu chu ka Pain a hmangaih ang a, kei pawhin ka hmangaih ang a, a hnênah ka inlâr bawk ang,” a ti a.

²²Juda, Iskariot ni lo zâwk chuan a hnênah, “Lalpa, kan hnênah i inlâr ang a, khawvêl hnênah i inlâr si lo tûr chu engtizia nge?” a ti a.

²³Isuan a chhâng a, “Miin mi hmangaih chuan ka thu a zâwm ang, ka Pain ani chu a hmangaih ang a, a hnênah kan lo kal ang a, a hnênah kan awm reng ang.

²⁴Mi hmangaih lotu chuan ka thu a zâwm lo, thu in hriat hi keima thu a ni lo va, Pa mi tîrtu thu a ni zâwk e.

²⁵In hnêna ka la awm chhûng hian hêng thu hi ka hrilh che u a ni;

²⁶Awmpuitu, Thlarau Thianghlim, ka hminga Pain a rawn tirh tûr chuan engkim a zirtîr ang che u, in hnêna ka sawi zawng zawng pawh a hriat chhuahtîr leh ang che u.

²⁷Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se.

²⁸“‘Ka kal bo dâwn a, in hnênah ka lo kîr leh ang,’ ka tih kha in hria e. Mi hmangaih chuan Pa hnêna ka kal tûr hi in lâwm ang: Pa chu kei aiin a ropui zâwk si a.

²⁹Chu chu a lo thlen huna in rin theih nân, tûnah a lo thlen hmain ka hrilh che u a ni.

³⁰In hnênah thu ka sawi tam tawh lo vang, he khawvêl lal hi a lo kal dâwn avângin. Ka chungah thu eng mah zawng a nei lo;

³¹amaherawhchu, keiin Pa ka hmangaih a, Pain thu mi pêk ang zêlin ka ti ṭhîn tih khawvêlin a hriatna tûr a ni. Tho rawh u, heta ta hi i chhuak ang u.