Read Mizo Lushai CHANCHIN ṬHA JOHANA ZIAK 15 Bible Online

CHANCHIN ṬHA JOHANA ZIAK 15 - Mizo Lushai bible

CHANCHIN ṬHA JOHANA ZIAK 15

¹“Kei hi grêp tak chu ka ni a, ka Pa a huan enkawltu a ni.

²Ka zawmpui pêng rah lo apiang a paih ṭhîn a, a rah apiang a thian fai ṭhîn, a rah tam lehzual nân.

³In hnêna ka thu sawi zawng zawng avâng chuan in thianghlim tawh pang a ni.

⁴Keimahah awm reng ula, kei pawh nangmahniah ka awm reng ang. Pêng chu grêp hruia a awm reng loh chuan a rah thei lo ang bawkin, nangni pawh keimaha in awm reng loh chuan in rah thei lo vang.

⁵Kei grêp chu ka ni, nangni a pêngte chu in ni. Tu pawh keimaha awm renga, kei pawh amaha ka awm rengna chu tam takin a rah ṭhîn; keimah lovin eng mah in ti thei si lo.

⁶Tu pawh keimaha awm reng lo chu, pêng anga paih chhuahin an awm ṭhîn, pêng paih chu a vuai a, an fawm a, meiah an paih a, a kâng ṭhîn.

⁷Keimaha in awm renga, ka thu nangmahnia a awm reng bawk chuan, in duh apiang dîl ula, in hmu zêl ang.

⁸Tam taka in raha, ka zirtîrte in nih tak meuh hian ka Pa chawimawiin a awm ṭhîn.

⁹Pain mi hmangaih angin kei pawhin ka hmangaih che u hi; ka hmangaihin awm reng rawh u.

¹⁰Ka thupêkte in zawm chuan, ka hmangaihin in awm reng ang, keiin ka Pa thupêkte ka zâwm a, a hmangaiha ka awm reng ang hian.

¹¹“Ka lâwmna hi nangmahnia a awm reng nân leh, in lâwmna chu a famkim nân hêng thu hi in hnênah ka sawi a ni.

¹²Hei hi ka thupêk chu a ni; ka hmangaih che u ang hian nangni pawh inhmangaih tawn rawh u.

¹³Miin a ṭhian tân a nun a pêk aliama hmangaihna nasa zâwk tu man an nei lo.

¹⁴Thu ka pêk che u hi in tih chuan ka ṭhiante in ni ang.

¹⁵Bawih ka ti leh tawh lo vang che u; bawih chuan a pu thiltih a hre si lo va; ṭhiante ka ti zâwk a che u; ka Pa hnên aṭanga thil ka hriat zawng zawng ka hrilh tawh si che u a.

¹⁶Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; tichuan, ka hminga Pa hnêna in dîl apiang a pe dâwn che u nia.

¹⁷He thu hi ka pe a che u, inhmangaih rawh u.

¹⁸“Khawvêlin a huat che u chuan, a huat hma che uin kei mi haw tawh tih hria ang che u.

¹⁹Khawvêl mi ni ula chuan, khawvêlin ama ta chu a hmangaih ang che u; nimahsela, khawvêl mi in ni lo va, khawvêla mi ka thlan chhuah in nih avângin khawvêlin a hua che u a ni.

²⁰Bawih a pu aiin a ropui lo tih thu in hnêna ka sawi kha hre reng rawh u. Annin kei mi tihduhdah ang khân nangni pawh an tiduhdah ang che u; ka thu an zawm chuan in thu pawh an zâwm ang.

²¹Nimahsela, hêng thil zawng zawng hi ka hming avângin in chungah an ti ang, mi tîrtu an hriat loh avângin.

²²Kei lo kalin an hnênah thu sawi lo ila chuan, sual an nei lo tûr; tûnah zawng an sual chhuanlam tûr an nei tawh lo.

²³Tu pawh mi hua chuan ka Pa pawh a hua a ni.

²⁴Mi dang tu ma la tih ngai loh thilte an zîngah ti lo ila chuan, sual an nei lo tûr; tûnah zawng ka thiltihte an hmu a, kei leh ka Pa chu min haw ta bawk a ni.

²⁵Engpawh ni se an Dân Lehkhabuah, ‘Annin a chhan awm lovin min hua,’ tih ziak kha a lo thlenna tûr a ni.

²⁶“Awmpuitu, Pa hnên ata in hnêna ka rawn tirh tûr, Paa chhuak Thlarau dik tak chu a lo thlen hunah, ani chuan ka chanchin a hriattîr ang.

²⁷Nangni pawh ka thu hretute in ni e, a tîr ata ka hnêna in awm avângin.