Read Mizo Lushai CHANCHIN ṬHA JOHANA ZIAK 16 Bible Online

CHANCHIN ṬHA JOHANA ZIAK 16 - Mizo Lushai bible

CHANCHIN ṬHA JOHANA ZIAK 16

¹“In tlûkchhiat loh nân hêng thu hi ka sawi a ni.

²Sunagog-ahte an hnawntîr ang che u a; a tihhlum che u apiangin Pathian duhzâwng tia an inngaih hun a lo la thleng ang.

³Pa leh kei mi hriat loh avângin chutiang thil chu an ti ang.

⁴A hun a lo thlen tikah ka hrilh tawh che u tih in hriat reng nân hêng thu hi in hnênah ka sawi a ni e. “In hnêna ka la awm avângin a tîr ata hêng thu hi ka la hrilh lo rêng che u a ni.

⁵Tûnah chuan mi tîrtu hnênah ka kal dâwn tawh a, in zînga tu mahin, ‘Khawiah nge i kal dâwn?’ tiin mi zâwt si lo.

⁶Mahse, hêng thu hi in hnênah ka han sawi ta a, in thinlung chu lungngaihnain a khat leh si a.

⁷“Nimahsela, thu dik tak ka hrilh a che u, ka kal hi in tân a ṭha zâwk e, ka kal loh chuan Awmpuitu chu in hnênah a lo kal dâwn si lo; ka kal erawh chuan in hnênah ka rawn tîr ang.

⁸Ani chu a lo thlen chuan, sual thu te, thiam chantîrna thu te, rorêlna thu te an lo ngai sual tih khawvêl a hriattîr ang.

⁹Sual thu-a an dik lohna chu kei mi rin lohna hi a ni a;

¹⁰Thiam chantîrna thu-a an dik lohna chu, Pa hnênah ka kal dâwn a, mi hmu leh dâwn tawh lo hi a ni:

¹¹rorêlna thu-a an dik lohna chu, he khawvêl rorêltu hi rorêlsakin a awm tawh a ni.

¹²“In hnênah thu tam tak sawi tûr ka la nei cheu va; amaherawhchu, tûnah chuan in la tlin rih lo vang.

¹³Thlarau dik tak chu a lo thlen hunah erawh chuan thutak zawng zawngah a hruai lût ang che u. Ama phuahchawpin thu a sawi dâwn si lo; thu a dawn chu a sawi zâwk ang a, thil lo la thleng tûr pawh a hrilh ang che u.

¹⁴Ani chuan kei mi chawimawi ang; ka ta-a mi a la ang a, a hrilh dâwn che u a ni.

¹⁵Pain thil a neih zawng zawng ka ta a ni; chuvâng chuan a ni, ‘Ka ta-a mi lain a hrilh ang che u,’ ka tih ni.

¹⁶“Rei lo têah nangnin mi hmu tawh lo vang a, rei lo têah bawk mi hmu leh ang,” a ti a.

¹⁷A zirtîrte ṭhenkhatin, “Kan hnêna a thu sawi hi eng nge ni? ‘Rei lo têah mi hmu tawh lo vang a, rei lo têah bawk mi la hmu leh ang,’ a tih leh, ‘Pa hnêna ka kal dâwn avângin,’ a tih hi?” an inti a.

¹⁸Chutichuan, “ ‘Rei lo tê,’ a tih hi eng tihna nge ni? Eng nge sawi a tum kan hre lo ve,” an ti a.

¹⁹Isuan thu an zâwt duh tih a hria a, an hnênah, “ ‘Rei lo têah mi hmu tawh lo vang a, rei lo têah bawk mi la hmu leh ang,’ ka tih kha in zâwt a ni maw?

²⁰Thu dik tak ka hrilh a che u, nangni in mittui a tlain in ṭap ang a, khawvêl erawh chu an hlim ang; nangni in lungngai ang a; mahse, in lungngaih chu lâwmah a chang ang.

²¹Hmeichhiain nau a neih dâwn chuan nasa takin a tuar a, a hun a thlen avângin; nimahsela, nau a lo pian chuan a tuarna chu a hre reng tawh ṭhîn lo, khawvêla mihring lo piang chu a lâwm avângin.

²²Chutiang chuan nangni pawh tûnah in lungngai a; nimahsela, ka hmu leh ang che u a, in thinlung a hlim ang a, in hlimna chu tu man an lâksak lo vang che u.

²³Chumi ni-ah chuan nangnin eng mah mi zâwt tawh lo vang. Thu dik tak ka hrilh a che u, Pa hnênah eng pawh in dîl chuan ka hmingin a pe ang che u.

²⁴Tûn thleng hian ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin.

²⁵“Chûng chu a thawiin in hnênah ka sawi ṭhîn a; in hnênah pehhêla sawi tawh lovin, chiang taka Pa thu ka hrilh hun che u a lo thleng dâwn.

²⁶Chumi ni-ah chuan nangnin ka hmingin in dîl ang; keiin in tân Pa hnênah ka dîl ang ka ti lo ve.

²⁷Pa ngei chuan a hmangaih si che u a, Pa hnên aṭanga lo kal ka ni tih in rin avângin mi hmangaih si a.

²⁸Pa hnên aṭangin ka lo chhuak a, khawvêlah ka lo lût a, khawvêl ka chhuahsan leh dâwn a, Pa hnênah ka kal dâwn a ni,” a ti a.

²⁹A zirtîrte chuan, “Tûnah zawng chiang takin thu i sawi ta a, a thawiin i sawi ta lo ve.

³⁰Engkim i hria a, tu man an zawh che pawh i ngai lo tih tûnah chuan kan hre ta; hemi avâng hian Pathian hnên aṭanga lo kal i nih kan ring ta e,” an ti a.

³¹Isuan a chhâng a, “Tûnah in ring ta maw?

³²Ngai rawh u, nangni hi mahni in ṭheuhvah kal darhin, keimah chauhva mi thlah fâl hun a lo thleng dâwn, a thleng tawh mêk a ni; nimahsela, keimah chauhvin ka awm lo ve, Pa chu ka hnênah a awm si a.

³³Keimahah thlamuanna in hmuh nân hêng hi in hnênah ka sawi a ni; khawvêlah hian hrehawmin in awm ṭhîn; nimahsela, thlamuang takin awm rawh u, keiin khawvêl ka ngam ta,” a ti a.