Read Mizo Lushai CHANCHIN ṬHA JOHANA ZIAK 17 Bible Online

CHANCHIN ṬHA JOHANA ZIAK 17 - Mizo Lushai bible

CHANCHIN ṬHA JOHANA ZIAK 17

¹Chûng thu chu Isuan a sawi a, a vânvadâk a, “Ka Pa, a hun a thleng ta; i Fapa chawimawi rawh, Fapain a chawimawi theih nân che.

²Mi zawng zawng chunga thuneihna i pe ang khân ani pawhin a hnêna i pêk apiangte chu chatuan nun a pêk theih nân.

³Hei hi chatuan nunna chu a ni, nang Pathian tak chauh leh i tirh Isua Krista hriat hi.

⁴Thil tih tûr mi pêk kha ka ti zo va, leiah hian ka chawimawi tawh a che.

⁵Ka Pa, khawvêl awm hmaa i hnêna ropuina ka neih khân, tûnah nangma hnên ngeiah mi chawimawi rawh.

⁶“Khawvêl ata kei mi pêkhote hnênah i hming ka tilang ta; i ta an ni a, anni chu mi pe a; i thu pawh an zâwm ta.

⁷Tûnah chuan thil mi pêk zawng zawng nangmaha chhuak a ni tih an hre ta.

⁸Nangin thu mi pêkte kha an hnênah ka pe a, an lo pawm a; i hnên aṭanga lo kal ka ni ngei tih an hre ta bawk a, nangin kei mi tîr tih pawh an ring ta e.

⁹“Keiin an tân ka ngensak hi, khawvêl tâna ngensak ka ni lo, nangin mi pêkte tân zâwk a ni, i ta an ni si a.

¹⁰Ka ta zawng zawng chu i ta a ni a, i ta pawh chu ka ta a ni bawk e, anmahniah chawimawiin ka awm ta.

¹¹Kei khawvêlah ka awm tawh lo vang, anni erawh hi chu khawvêlah an la awm ang; kei zawng i hnênah ka lo haw dâwn ta. Ka Pa thianghlim, nangin mi pêkte hi i hmingin hum rawh, keimahni ang hian pumkhat an nih theih nân.

¹²“An hnêna ka awm chhûng chuan nangin kei mi pêkte hi i hmingin ka hum ṭhîn; anni chu ka vêng a, an zînga pakhat mah an boral lo, boral tûra lo kha chu, Lehkha Thu a lo thlen kimna tûrin.

¹³Tûnah i hnênah ka lo haw dâwn ta, hêng thil hi khawvêlah ka sawi a ni, ka lâwmna anmahniah an neih famkimna tûrin.

¹⁴I thu an hnênah ka pe tawh a, kei khawvêla mi ka ni lo ang bawk hian khawvêla mi an ni si lo va; chuvângin, khawvêlin an hua a ni.

¹⁵“Anni chu khawvêl ata la chhuak tûrin ka ngên lo va che. Mi sual laka hum tûrin ka ngên zâwk a che.

¹⁶Khawvêl mi an ni lo, kei khawvêl mi ka ni lo ang hian.

¹⁷Anni chu thutakin tithianghlim rawh, i thu chu thutak a ni.

¹⁸Khawvêla mi tîr angin anni pawh khawvêlah ka tirh hi.

¹⁹Anmahni avângin ka intithianghlim a ni, anni pawh thutaka an thianghlimna tûrin.

²⁰“Hêngho tân chauh hian ngensak ka ni lo, an thu avânga kei mi la ring tûrte tân pawh ngensak ka ni bawk,

²¹an za-in inpumkhat sela; ‘Ka Pa, nang keimahah i awma, kei nangmaha ka awm ang hian, anni pawh keimahniah awm sela, nangin kei mi tîr tih khawvêlin an rin theihna tûrin.

²²Nangin ropuina mi pêk kha kei pawhin anni ka pe ta, pumkhat an nih theih nân, keini pumkhat kan ni ang bawk hian;

²³kei anmahniah, nang keimahah, an inpumkhatna a famkim nân leh, nangin kei mi tîr a, mi hmangaih ang bawkin anni chu i hmangaih tih khawvêlin an hriat nân.

²⁴Ka Pa, nangin mi pêkte hi ka awmnaa ka hnêna awmah ka duh, nangin mi hmangaih avânga leilung pian hma tawha mi pêk ka ropuina kha an hmuhna tûrin;

²⁵ka Pa fel tak, khawvêl zawngin an hre lo che a, kei erawh chuan ka hria a che; hêngho pawh hian nangin kei mi tîr tih an hria e.

²⁶An hnênah i hming ka hriattîr a, ka hriattîr zêl ang; hmangaihna, keimah min hmangaihna ngei kha anmahnia a awma, kei anmahnia ka awm theih nân,” a ti a.