Read Mizo Lushai CHANCHIN ṬHA JOHANA ZIAK 19 Bible Online

CHANCHIN ṬHA JOHANA ZIAK 19 - Mizo Lushai bible

CHANCHIN ṬHA JOHANA ZIAK 19

¹Tichuan, Pilatan Isua a hruai a, a vuaktîr a.

²Sipaite chuan chawimawi nân hlîng an kual a, lukhumah an khumtîr a, kawrfual senduk an hâktîr bawk a,

³“Chibai, Juda-te lal!” an ti a; a hmaiah an bêng bawk a.

⁴Pilata chu pâwnah a va chhuak leh a, an hnênah, “En teh u, a chungah eng mah thu pawi ka hmu lo tih in hriat nân in hnênah ka rawn hruai chhuah hi,” a ti a.

⁵Tichuan, chawimawina lukhum chu khuma kawrfual senduk ha chuan Isua chu pâwnah a lo chhuak a. Tin, an hnênah, “En teh u, Mihringa hi,” a ti a.

⁶Puithiam lalte leh an ṭhuihruaiten an hmuh chuan, “Krawsah khêngbet rawh, krawsah khêngbet rawh,” tiin an au va. Pilatan an hnênah, “Nangmahnin hruai ula, krawsah khêngbet ta che u, kei zawngin a chungah thu pawi ka hmu lo ve,” a ti a.

⁷Juda-te chuan an chhâng a, “Dân kan nei a, chumi dân ang chuan, Pathian Fapaa a inchhâl avângin a thi tûr a ni,” an ti a.

⁸Pilatan chu thu chu a hriatin a hlau lehzual a.

⁹Inah a va lût leh a, Isua hnênah, “Khawi lam mi nge i nih?” a ti a. Nimahsela, Isuan a chhâng lo.

¹⁰Pilatan a hnênah, “Nangin kei mi be duh lo vei maw? Chhuah thei che ka ni a, krawsa khêngbet thei che ka ni tih i hre lo vem ni?” a ti a.

¹¹Isuan a chhâng a, “Chung lam aṭanga pêk i nih loh chuan ka chungah thuneihna rêng rêng i nei lo vang; chuvângin, i hnêna mi petu khân sual a phur nasa zâwk a ni,” a ti a.

¹²Chuvâng chuan, Pilatan amah chhuah dân kawng a zawng ta a; nimahsela, Juda-te an au va, “He mi hi i chhuah chuan Kaisara ṭhian i ni lo vang; tu pawh lala insiam chu Kaisara do an ni,” an ti a.

¹³Pilatan chûng thu chu a hriat chuan Isua chu a hruai chhuak a, ‘Lungrem,’ Hebrai ṭawng chuan, ‘Gabatha,’ an tih, rorêlna ṭhutthlêngah chuan a ṭhu a.

¹⁴Kalhlên Kût Inrinni a ni a, chhûn lai vêl a ni. Juda-te hnênah chuan, “En teh u, in lal hi,” a ti a.

¹⁵Anni chu an au va, “Tiboral rawh, tiboral rawh; krawsah khêngbet rawh,” an ti a. Pilatan, “In lal hi krawsah ka khêngbet ang maw?” a ti a. Puithiam lalten an chhâng a, “Kaisara lo chu lal dang kan nei lo,” an ti a.

¹⁶Tichuan, ani chu krawsa khenbeh tûrin a pe ta a. Chutichuan, Isua chu an hruai ta a.

¹⁷Mahni kraws puin, ‘Luruh hmun,’ Hebrai ṭawnga, ‘Golgotha,’ an tih hmun chu, panin a chhuak ta a.

¹⁸Chutah chuan krawsah an khêngbet a, mi dang pahnih nên, a sîr tuakah pakhat ve vein, a laiah Isua.

¹⁹Pilata chuan hriattîrna a ziak a, kraws lêrah a târ a, “Nazaret Isua, Juda-te lal,” tia ziak a ni.

²⁰Hriattîrna chu Juda tam takin an chhiar a, Isua an khenbehna hmun chu khawpui kiang a nih avângin Hebrai ṭawng te, Rom ṭawng te, Grik ṭawng tein ziak a ni.

²¹Juda puithiam lalte chuan Pilata hnênah, “ ‘Juda-te lal,’ tiin ziak suh, ‘Juda-te lal ka ni a ti,’ tiin ziak zâwk rawh,” an ti a.

²²Pilatan a chhâng a, “Ka ziak kha ka ziak zo tawh,” a ti a.

²³Sipaiten Isua krawsa an khenbeh zawh chuan a silhfênte an lâksak a, sipai pakhat tân chan khat zêl tûrin chan li-ah an sem a. A kawrfual an la bawk a, chu chu ṭhui loh kawr a ni a, a nghâwng aṭanga a tlâng thlengin a pumin tah vek a ni.

²⁴Anni chuan, “Hei hi chu i pawt thlêr suh ang u, tu ta ber tûr nge hriat nân ṭhum i vâwr zâwk ang u,” an ti a, “Ka silhfênte an insem a, Ka kawr atân ṭhum an vâwr a,” tih Lehkha Thu kha a lo thlenna tûrin. Sipaihote chuan chûng chu an ti ta ngei a.

²⁵Isua kraws kiangah chuan a nu te, a nu laizâwn Mari, Klopa nupui te, Mari Magdala mi te an ding a.

²⁶Isuan a nu leh a kianga ding zirtîr a hmangaih chu a hmuhin a nu hnênah chuan, “Ka nu, en teh, i fapa kha,” a ti a.

²⁷Zirtîr hnênah pawh chuan, “En teh, i nu kha,” a ti a. Chuta ṭang chuan chu zirtîr chuan ama inah ani chu a hruai ta a.

²⁸Chumi hnuah chuan Isuan thil zawng zawng a thleng kim ta tih a hria a; Lehkha Thu a thlen nân, “Ka tui a hal e,” a ti a.

²⁹Chutah chuan bêl, uain thûra khat a awm a; tichuan, sponj, uain thûra an chiah chu, husop tiangah an târ a, a hmui an han thlen a.

³⁰Isuan uain thûr chu a lo in zawh chuan, “A kim ta!” a ti a; tin, a lu a kûn a, a hnuk a chat ta a.

³¹Juda-te Inrinni a ni a, ruangte chu sabat nia krawsa a awm reng loh nân, chu sabat chu ni ropui a ni si a, Juda-te chuan Pilata hnênah mi khenbehho kête tihtliaha, an ruang lâk sawn an dîl a.

³²Chutichuan, sipaite an lo kal a, Isua ruala khenbehte, a tawn tirha mi leh pakhat zâwk kête chu an titliak ta a.

³³Isua an va pan a, a thi tawh tih an hria a, a kête chu an tihtliahsak ve lo va.

³⁴Amaherawhchu, sipai zînga pakhat chuan a nâkah feiin a chhun a, thisen leh tui a lo luang chhuak ta nghâl a.

³⁵Mit ngeia hmutu sawi a ni, nangni pawhin in rinna tûrin. A thu hriattîr hi a dik a, thu dik a sawi tih hretu pakhat a awm.

³⁶Lehkha Thu, “A ruh pakhat mah tihtliah a ni lo vang,” tih thlenna tûra chûng thil chu lo thleng a ni.

³⁷Lehkha Thu dangin, “An chhuna chu an la en ang,” a ti bawk a.

³⁸Chumi hnu chuan Arimathai khaw mi Josefa, Isua zirtîr, Juda-te a hlauh avânga inthup chuan, Pilata chu Isua ruang lâk a dîl a. Pilatan a lo phalsak a. Tichuan, a ruang chu a va la ta a.

³⁹Nikodema, tûn hmaa zâna a hnêna lo kal kha, mura leh aloe inpawlh sa Kg. sawmthum leh pali lai kengin a lo kal ve a.

⁴⁰An pahnih chuan Isua ruang chu an la a, Juda-te inphûm dân angin englo rimtuite nên chuan puan zai sînin an zem a.

⁴¹Amah an khenbehna hmunah chuan huan a awm a; huanah chuan thlân thar, tu mah an la zalh ngai lohna a awm.

⁴²Juda-te Inrinni a nih avângin, thlân chu an kiang lawka awm a ni bawk a, Isua chu an zalh ta a.