Read Mizo Lushai CHANCHIN ṬHA JOHANA ZIAK 20 Bible Online

CHANCHIN ṬHA JOHANA ZIAK 20 - Mizo Lushai bible

CHANCHIN ṬHA JOHANA ZIAK 20

¹Pathianni zîng takah, khua a la thim laiin, Magdala mi Mari chu thlânah chuan a va kal a, lung chu thlân ata lâk sawnin a hmu a.

²Chutichuan, Simon Petera leh zirtîr dang Isuan a hmangaih hnênah chuan a va tlân a, an hnênah, “Thlân ata Lalpa chu an la chhuak a, khawiah nge an dah kan hre si lo,” a ti a.

³Tichuan, Petera leh zirtîr dang chu thlân lam panin an chhuak ta a.

⁴An pahnih chuan an tlân dûn a; zirtîr dang chu Petera aiin a tlân chak zâwk a, thlân chu a thleng hmasa a.

⁵Kûnin a han bih a, puan zai sîn awmte chu a hmu a, a chhûngah erawh chuan a lût lo.

⁶Simon Petera pawh a hnungah a lo thleng ve a, thlân chhûngah chuan a lût ta a; puan zai sîn awmte chu a hmu a,

⁷a lu tuamna puan pawh chu puan zai sîn zînga awm lovin, inziala a hranga awmin a hmu a.

⁸Zirtîr dang, thlân thleng hmasa pawh chu a lût ve ta a, a hmu a, a ring a.

⁹Mitthi zîng ata a tholeh tûr a ni tih Lehkha Thu kha an la hrethiam rih si lo va.

¹⁰Tichuan, zirtîrte chu an haw leh ta a.

¹¹Mari chu thlân pâwnah ṭap chungin a ding a. Ṭap chung chuan a kûn a, thlân chhûng chu a han bih a.

¹²Isua ruang awmna a lu leh a ke bulah vântîrhkoh pahnih, a vâra inthuam, ṭhu a hmu a.

¹³Anni chuan a hnênah, “Hmeichhia, engati nge i ṭah?” an ti a. Ani chuan, “Ka Lalpa an la bo va, an dahna ka hre lo atin a ni,” a ti a.

¹⁴Chu chu a sawi zawh chuan a han lehhawi a, Isua ding a hmu a, Isua a ni tih erawh chu a hre lo.

¹⁵Isuan a hnênah, “Hmeichhia, engati nge i ṭah? Tu nge i zawn?” a ti a. Ani chuan huan enkawltu emaw a ti a, a hnênah, “Ka pu, amah i la bo a nih chuan i dahna mi hrilh ta che; tichuan, ka la dâwn nia,” a ti a.

¹⁶Isuan a hnênah, “Mari!” a ti a. Ani chuan a lam a han hawi a, Hebrai ṭawngin, “Rabboni,” a ti a (chu chu, ‘Zirtîrtu,’ tihna a ni).

¹⁷Isuan a hnênah, “Mi vuan tawh suh, Pa hnênah pawh ka la chhoh rih loh hi; amaherawhchu, ka unaute hnênah va kal la, an hnênah, ‘Ka Pa, in Pa, ka Pathian, in Pathian hnênah ka chho dâwn,’ a ti e, ti ang che,” a ti a.

¹⁸Mari, Magdala mi chu, a kal ta a, zirtîrte hnênah, “Lalpa chu ka hmu ta,” a va ti a, chûng thu chu a hnênah a sawi tih a hrilh bawk a.

¹⁹Chumi ni, Pathianni tlaiah chuan, Juda-te hlauh avângin zirtîrte awmna kawngkhârte chu an khâr tawh a, Isua a lo kal a, an zîngah a lo ding a, an hnênah, “In chungah thlamuanna awm rawh se,” a ti a.

²⁰Chumi a sawi zawh chuan a kut leh a nâk a entîr a, Lalpa chu an hmuh chuan zirtîrte chu an lâwm êm êm a.

²¹An hnênah, “In chungah thlamuanna awm rawh se,” a ti leh a. “Pain kei mi tîr ang bawkin kei pawhin ka tirh che u hi,” a ti a.

²²Chu chu a sawi zawhin an chungah a thaw a, an hnênah, “Thlarau Thianghlim nei rawh u.

²³Tu sual pawh in ngaihdam chu ngaihdam a ni ang a, in ngaihdam loh chu ngaihdam loh a ni ang,” a ti a.

²⁴Sâwmpahnihte zînga pakhat, Thoma, Phîra an tih chu, Isua lo kal laiin an zîngah a awm ve lo va.

²⁵Zirtîr dangte chuan a hnênah, “Lalpa chu kan hmu ta asin,” an ti a. Ani chuan, “A kuta thîr khenna hmuamhma ka hmuha, thîr khenna hmuamhmaahte ka kut zunga ka khawiha, a nâk ka zen ngei loh chuan ka awih lo vang,” a ti a.

²⁶Ni riat hnuah a zirtîrte chu in chhûngah an awm khâwm leh a, Thoma pawh an zîngah a awm ve a. Kawngkhârte chu kalh a ni a; mahse, Isua a lo kal a, an zîngah a lo ding a, “In chungah thlamuanna awm rawh se,” a ti a.

²⁷Tin, Thoma hnênah chuan, “I kut zungṭang chuan han khawih la, ka kutte en rawh, han ban la, ka nâk zen rawh; ring lovin awm suh la, ring mai rawh,” a ti a.

²⁸Thoman a chhâng a, “Ka Lalpa leh ka Pathian,” a ti a.

²⁹Isuan a hnênah, “Mi hmuh avângin mi ring a ni maw? Hmu lova ringte chu an nihlawh e,” a ti a.

³⁰Isuan zirtîrte hmaah chuan chhinchhiahna thil mak dang tam tak a ti a, chûng chu he lehkhabuah hian ziak a ni lo.

³¹Isua chu Krista, Pathian Fapa a ni tih in rinna tûr leh, in rin avâng chuan ama hminga nun in neih nân hêng hi ziak a ni.